2 kurinṯus 11 - ŋuɽun ŋun ŋiya ŋun ŋikaiilo elo 1966

asa 11 ŋɩma yeḏi bulus gi ḏapa ŋɩdio gi gwune gwiro ḏuwəjo

¹ nyi gwubunyaje nyalaməṯo dugwore lugwi ŋuɽun ŋɩti ŋun ŋiro ŋɩɽilo; namɩni gwerkwe nyaŋa nyaməṯo dugwore lugwi.

² gi gwune ḏugwor ḏinyi ḏimɩɽiḏinyi gwan nyaŋa ḏimɩɽiḏo ḏe ḏeḏi elo, gi gwune nyi ŋimilgaki kwəmɩnyo gwetɩdo, kani ŋwajəpijo ḏi kɩrisṯo gi ŋera ŋun ŋiŋir ŋate ŋimɩɽiḏine ganu no.

³ namɩni nyi gwuḏonyo ŋiro gi gwune ḏuŋə dimirdeijo awaŋ ganu ŋuɽun ŋe ŋuŋun ŋun ŋiro ŋɩwɩɽɩgal, na dino ŋadɩgɩɽe ŋalo ŋar ŋaḏuḏe gi ḏəmɩnyo ḏun ḏəṯanya ḏi kɩrisṯo.

⁴ gi gwune ḏa gwiji gwədi gwumila maṯumə yecu gwe gwun gwiro kaja kworo kwe gwilgwumə, i ḏa nyalmape gwuɽɩwə gwiro kaja kworo kwe gwanape, i ŋuɽun ŋun ŋiŋir ŋiro kaja kworo kwe gwanyəmɩnyi nyaməṯo dugwore lugwun.

⁵ na nyi gwuməḏɩnu niarno nyi gwate gwibɩɽaṯɩn ŋuɽuna ŋədi gi duwəjo ṯeno dun diŋirano gworki no.

⁶ na ḏa nyi gwate malɩmini muma gi ḏuməḏɩjo liji ŋuɽuna no, namɩni ŋədu dino gi ḏilɩŋeḏa; ŋɩmanalaŋini ŋeno lagalo ŋuɽun wei.

⁷ na nyi mape ŋuɽuna ŋɩki ŋɩno niduji gwula gwi gwɩtieno kani nyabuḏɩni, gi gwune nyi gwuməḏɩjaje ŋuɽuna ŋiŋir geḏi elo ga dirio a?

⁸ na nyi maʼe kɩniso giro kaja gi gwune nilape əlgɩrucə kə nyi gwapijaje ŋɩru.

⁹ na gwune ji lagalo na nyi gwibɩɽaṯɩn ŋɩdio, nyi gwate gwanɽinyi gwiji ŋɩru lagalo no, gi gwune lɩmage lun limila makɩḏunia lɩmiəpijo ŋɩdio ŋun ŋɩbɩɽaṯo lugwi. na ŋuɽun wei nidɩme gwula gwi nyi gwo gwanɽɩnyi gwiji ŋɩru lagalo, na ŋeno nyi gwəṯɩdɩme gwula gwi.

¹⁰ na ŋiro gi ŋuɽun ŋun ŋiro gwerkwe ŋeḏi kɩrisṯo ŋo lugwi, na ŋate ŋe ŋiakajo gi ḏabupaḏa ganu ṯeno kalo geḏi akaia no.

¹¹ na gwudaro? gi gwune nyi gwate gwəmɩnyaje na? elo gwilɩŋiḏi nyi gwəmɩnyaje.

¹² namɩni ŋun ŋilduji ŋaṯɩlduji, kani nyiakaja liji lamon lagin lun lɩbunyilo lalaŋiḏi gi anaŋa ŋuɽun ŋe ḏapa ŋɩru ŋagin ŋun ŋaṯɩŋabupaḏe ganu.

¹³ gi gwune liji leno liro duwəjo dun diro lɩwɩɽɩgal, na lun laṯape ŋɩru ḏirdeijo ḏe ganu, nalbi lula lagin ganu alro gi duwəjo deḏi kɩrisṯo.

¹⁴ na ŋeno ŋate ŋiro ŋe ḏobeḏaga ṯuṯ no, gi gwune seiṯan dino nubi gwula gwuŋun ganu gwiro gi gwiji gweḏi kanyin gweḏi bure.

¹⁵ na dino ŋeno ŋate ŋiro ŋuɽun ŋɩbuḏo no ḏa jaḏam juŋun dino jiməbi lula lagin ganu alro gi jaḏam jeḏi ŋuɽun ŋun ŋiŋir; na ḏiṯɩmejo ḏagin diro gi ŋɩru ŋagin.

bulus na liji lun lɩḏi ganu

¹⁶ na nyi gwar dino, gwo gwete gwanuməḏɩni gi ḏugwor ganu ḏuŋun gwan nyi nuarno nyi gwiro gɩɽilo, namɩni ḏa nyalmaro dino, nyilmɩni əmɩnyi gi gɩɽilo, kani nyi dino nyi abupaḏe ganu gwɩti.

¹⁷ na ŋuɽun ŋun ŋuməḏijejɩlo, nyi gwate gwuməḏi gwele gwe gwun gwiro elo no, namɩni ŋɩɽilo ŋe, gi ḏibɩɽeḏa nanu ḏe ḏabupaḏe ganu ṯeno.

¹⁸ na gi gwune lutu laṯabupaḏe ganu gwan ŋuɽun ŋeḏi gɩḏilio, na nyi dino nyi gwabupaḏe ganu.

¹⁹ gi gwune nya laṯɩdile ganu nya laṯɩməṯo dugwore gi jɩɽilo, na nyaŋa laṯarno lilɩŋiḏano gi lulo lalo.

²⁰ gi gwune nya ləṯi ḏɩməṯo ḏugwore na ḏa gwete majiduji lɩwainy, na ḏa gwete majenya, na ḏa gwete majaməṯo, na ḏa gwete marno gwubuṯano lagalo, na ḏa gwete majimɩɽi gi jei ganu.

bulus gwo gi ḏiṯurɩḏa na ŋuɽun ŋun ŋɩbɩɽe

²¹ nyi gwarno gwan ḏare ḏinyi anaŋa anmumɩḏo, namɩni ḏa gwete mabɩɽe nanu ŋuɽun ŋədi—nyi gwuməḏi ŋɩɽilo ŋe—na nyi dino nyibɩɽe nanu.

²² luŋa liro lɩbrani a? na nyi gwiro dino. luŋa liro liji leḏi isreiyil a? na nyi gwiro dino. luŋa liro nyaɽe nyeḏi ibraim a? na nyi gwiro dino.

²³ luŋa liro jaḏam jeḏi kɩrisṯo a? nyi mumə gi gɩɽilo, nyi gwiro dino nyi gwidono; nyi gwijo ŋɩru ŋun ŋɩni ŋutəno gworki, na nyi gwijo kɩrkon ŋwamon ganu ŋwutəno, na gi ḏɩpino laical le ḏun ḏate ḏəṯi ŋɩma ḏilḏuɽə no, na ŋwamon ganu ŋwutəno, na ŋwamon ganu ŋwutu nyi gwijo gi ḏɩṯurɩḏa ḏe ḏaiya.

²⁴ na gi liju ŋwamon ganu ṯoḏɩne nyipinu laical le ŋwamon ḏuɽi kwoɽo nuete letɩdo.

²⁵ na ŋwamon ganu ṯəɽɩl nyipinu duwa de; na lamtɩdo nyi gwouwɩcɩnu nyɩdol nye; na ŋwamon ganu ṯəɽɩl nyi gwijo kwu murkab ganu gwun gwakɩro, na gilio na anyine nyi gwijo gi ḏɩrawe ḏun ḏola ganu.

²⁶ na kwilo gwi ŋwamon ganu ŋwutu, gi ḏiṯurɩḏa ŋau ganu, na gi ḏiṯurɩḏa ḏeḏi luɽam, na gi ḏiṯurɩḏa ḏeḏi liji leḏi amɩrɩgen yinyi, na gi ḏiturɩḏa ḏeḏi liji lun liro ga dino, na gi ḏiṯurɩḏa kamɩrɩgen, na gi ḏiturɩḏa gi jaɽe ganu, na gi ḏiṯurɩḏa gi ḏɩrawe, na gi ḏiturɩḏa ḏeḏi lɩmage lun liro lɩwɩɽɩgal;

²⁷ na ŋɩru ŋɩni gworki na ḏɩḏia, na ŋwamon ganu ŋutu nyi gwate gwatɩnḏɩre no, na gi jaŋu na ouḏo, na gi ḏɩməṯo əbuṯo ŋwamon ganu ŋwutu, na gi ḏɩron ḏɩnyidi na gi ḏɩbɩɽaṯa jiria.

²⁸ na ŋutəno kworo kweno, ŋwamon wei nyi gwəṯi ḏidɩmeḏa ḏeḏi kɩniso wei.

²⁹ əḏi gwiro gwimumɩḏo na nyi gwate gwimumɩḏo no? əḏi gwiro gwobɩlkəḏɩnu na nyi gwate gwanuni ḏɩɽeḏa ḏe ganu no?

³⁰ na ḏa nyi mabupaḏa ganu, nyi gwabupaḏe ganu gwan ḏɩmumɩḏa ḏinyi.

³¹ elo na baba gweḏi gwele gwage gwun gwan yecu kɩrisṯo gwun gwaṯɩbuḏɩni gi gɩḏilio gwilɩŋiḏi nyi gwate gwagele ŋɩwɩɽɩgala no.

³² ḏimiska mudir gwo ŋwara ganu ŋweḏi gwele gwun gwan ariṯ gwo gwɩdɩmiḏi amɩrɩgena yeḏi liji leḏi ḏimiska gwar gwɩməṯo,

³³ namɩni kouwɩr yun yɩti ḏimɩlia nanu nildio gɩḏi ge, na nyi mobɩḏɩni gi di duŋun.