2 buṯrus 3 - ŋuɽun ŋun ŋiya ŋun ŋikaiilo elo 1966

asa 3 lamon leḏi ḏaɽuwa ḏeḏi yecu

¹ ŋajilulijo jawab ceno jun jiro nimɩro nɩttən nyaŋa lun ləmɩnyɩlo, kani ŋajigirini ḏaḏɩŋana ḏe ŋwuɽa ganu ŋwun ŋwiŋir gi jawab ceno berene.

² kani nyaḏɩŋane ŋuɽuna ŋun ŋuməḏɩnu uro gwerre nebɩŋale lun lɩpiḏo pɽul, na ŋuɽun ŋeḏi duwəjo dalo ŋun ŋeḏi gwele ŋiro na gwun gwukədəḏə ga.

³ ŋilɩŋiḏanyalo ŋeno gwerre ganu, liji lun laṯaki jumo laje lila ŋwamon ganu ŋweḏi gɩdo, laṯɩwewele ŋuɽun ŋagin ŋun ŋɩbunyɩlo,

⁴ nalar dino, ŋuɽun ŋaḏa ŋun ŋuməḏulo ŋan ḏaɽuwa ḏuŋun? gi gwune nan lɩgwurninyo ai, ŋɩdi wei ŋore dino ŋiro gi gwune gelinine gɩḏilio.

⁵ na luŋa libunyu lakɩɽi ŋuɽun elo ŋeno, kanyin gwukədɩnu uro kili, na gɩḏilio dino diɽeḏelo ŋau elo na ŋwijo ŋau ganu ŋuɽun ŋe ŋeḏi elo,

⁶ na ŋuɽun ŋe ŋeno gɩḏilio gun gijo uro gwerre na ŋau kɩɽɩbe nalai.

⁷ na ŋuɽun ŋeno kanyin na gɩḏilio gun gijəḏəṯi gwunnɩno lidɩminijo igo, kəbe gi lamon le ḏakɩmiḏa na le ḏiɽinyɩḏa liji lun late laṯɩḏonye eloŋu no.

⁸ namɩni nyaŋa lun ləmɩnyɩlo, nya gela ŋuɽuna ŋeno ŋetɩdo ŋalɩbe lagalo no, lamon letɩdo kwele gwun gwiro elo liro gi jɩḏilio jun jiro alɩb, na jɩḏilio jun jiro alɩb jiro gi lamon letɩdo.

⁹ gwele gwate gwaṯarre ga mɩce ŋuɽun ŋun ŋiḏəḏulo no gi gwune liji kworo laṯarno gwele gwaṯarre ga mɩce; namɩni gwaṯajiməṯɩjo ḏugwore na gwate gwubunyu liji lanai no, nulmɩni bunyi wei lawɩrla ga ŋuɽun ŋun ŋɩki.

¹⁰ namɩni lamon leḏi gwele gwun gwɩro elo laje lila gi gwuɽam. na gi lamon leno nali kanyin giɽɩnyi ŋwal ŋwe ŋwɩbuḏo, na ŋɩdi ŋagiɽɩnyi ḏinuna ḏe; na gɩḏilio ganuni na ŋɩdi wei ŋun ŋijɩne.

arram jil ga muma gi gwune yecu gwar gwaɽuwa

¹¹ na gi gwune ŋeno wei ŋagiɽɩnyi, na arram nya laro gi liji lɩrṯa kwilo gwalo gwun gwɩpiḏo pɽul na gwɩŋir ḏi elo?

¹² nyaləṯeḏi nyalɽoṯeḏo couŋ gweḏi lamon leḏi elo, lun lar lali kanyin giɽɩnyi yawudi gala ga gi diŋɩla deḏi igo, na ŋɩdi ŋagiɽɩnyi ḏinuna ḏe.

¹³ namɩni liŋə ŋuɽun ŋun ŋiḏəḏɩjilo, ileṯeijo kanyinŋ gwun gwiya na gɩḏilio gun giya gun gaṯɩn ŋuɽun je ganu ŋun ŋiŋɩr.

¹⁴ na ŋiro dino nyaŋa lun ləmɩnyɩlo, ḏa nyalmeṯeijo ŋuɽuna ŋeno, bɩɽiḏɩl nanu kani ŋwajɩbuje gi ḏouwɩɽiḏa nya late ləṯi ŋɩrleḏa no, i ḏare no.

¹⁵ ḏuɽəḏɩl ḏiḏuḏɩnəno ḏeḏi gwele ŋuro ḏɩkədəḏinə ga, gi gwune ŋulijajilo mage gwage gwun gwəmɩnyɩmu gwan bulus dino gi ḏilɩŋeḏa ḏun ḏiḏəḏɩlo,

¹⁶ na gi jawab juŋun wei juməḏune ganu gwan ŋuɽun ŋeno. na jəṯi ŋuɽuna ganu kworo ŋɩbɩɽe gi ḏidiŋɩna, na liji lun late lalɩminu na late lɩməṯɩnu ga no, luɽuḏi ŋuɽuna ganu ŋiro gi gwune nalɽuḏi ŋuɽuna ganu ŋun ŋɩṯanu ŋeḏi jɩḏam dɩno, laɽinye lula lagin.

¹⁷ na nyaŋa lun ləmɩnyɩlo, nyaldarano na ŋɩmanyalɩŋe, dɩminil ga, gwəṯi lajiḏuji ḏɩrdəḏeico ḏe ḏeḏi liji lun lɩki gi ḏɩməṯɩno ga ḏalo.

¹⁸ namɩni buḏe gi ḏiŋiriḏa na gi ḏɩlɩŋeḏa ḏeḏi gwele gwage na gwun gwukədəḏije ga gwan yecu kɩrisṯo. gwəṯi ḏoɽeḏa lugwun gwunnɩno kəbe na gi lamon le gɩdo ganu. gwerkwe.