1 yuwana 4 - ŋuɽun ŋun ŋiya ŋun ŋikaiilo elo 1966

asa 4 ḏɩḏeijo gwuɽɩwə

¹ nyaŋa lun ləmɩnyɩlo, aṯanyamɩnyo gwuɽɩwə wei no, nyamɩni iḏeije gwuɽɩwə gwəri gweḏi elo gwiro a, gi gwune nebɩŋa lutu lɩmədu kɩḏilio lun liro lɩwɩɽɩgal.

² na dino nyalalɩŋe gwuɽɩwə gweḏi elo: gwuɽɩwə wei gwun gwaṯarno yecu kɩrisṯo gwuwiḏi kaŋɩnu, kweno gweḏi elo gwiro.

³ na gwuɽɩwə wei gwun gwate gwideijo yecuŋ ga no, kweno gwədu gweḏi elo no. na ŋeno ŋiro gwuɽɩwə gwun gwɩkiḏiḏɩl kɩrisṯo gwe, gwun gwudiŋɩnanyagwe gwaje gwila, namɩni gwunnɩno gwo kɩḏilio.

⁴ nyaŋa nyaɽe, nyaŋa leḏi elo liro na lɩmanyalḏami, gi gwune gwun gwaṯɩje lagalo gwubuṯano kworo gwun gwaṯɩje kɩḏilio.

⁵ na luŋa leḏi gɩḏilio liro, na dino laṯumə ŋuɽuna ŋeḏi gɩḏilio na laṯɩl gɩḏilio deŋɩnejo.

⁶ liŋə iləḏi elo liro, na gwun gwilɩŋiḏi eloŋu gwijideŋɩnejo. na gwun gwate gweḏi elo gwiro no gwate gwijideŋɩnejo no. na dino ililɩŋiḏi gwuɽɩwə gwun gwiro gwerkwe na gwuɽɩwə gwe ḏiḏujia.

ḏəmɩnyo ḏeḏi elo na ḏeḏi liji

⁷ nyaŋa lun ləmɩnyɩlo, ouwɩricije iləmɩnyiḏe iləmɩnyi gworo, gi gwune ḏəmɩnyɩḏa ḏeḏi elo ḏiro. na wei lun laṯəmɩnyi nalmɩni lilɩŋinu ḏi elo, na lalɩŋe eloŋu.

⁸ na gwun gwate gwaṯəmɩnyi no gwate gwilɩŋiḏi eloŋu no, gi gwune elo gwiro ḏəmɩnyo.

⁹ na dino ḏəmɩnyo ḏeḏi elo ḏimaŋino lage gi gwune elo wəjo ŋaɽe ŋuŋun ŋun ŋiro ŋetido ŋɩne kɩḏilio kani ilmiḏe ŋu gwe.

¹⁰ na ŋeno ŋiro ḏəmɩnyo, ilədu liŋə iləmɩnyu eloŋu no namɩni gwiro ŋu gwəmɩnyije, nuwəjo ŋaɽe ŋuŋun nuro ḏiḏugɩno ḏeḏi ŋuɽun ŋage ŋun ŋɩki.

¹¹ nyaŋa lun ləmɩnyɩlo, ḏa elo gwumijəmɩnyi ḏino, namɩni lire dino arram iləmɩnyiḏe iləmɩnyi gworo.

¹² gwiji gwate gwetɩdo gwun gwumaŋu eloŋu ḏuṯ no. na ḏa ilməmɩnyɩḏe ilməmɩnyi gworo, elo gwajaḏaṯa lage, na ḏəmɩnyo ḏuŋun ḏiməṯɩmeje lage.

¹³ na dino ililɩŋiḏi ilajaḏaṯa lugwun na ŋu gwajaḏaṯa lage, gi gwune gwiḏəḏije gwuɽɩwə gwuŋun.

¹⁴ na anaŋa anaŋəḏi nanəteijo ga nanarno baba gwuwəjo ŋaɽe ŋuŋun nuro ŋun ŋɩkədəḏi liji ga leḏi gɩḏilio.

¹⁵ na gwun gwaṯarno yecu gwiro ŋaɽe ŋeḏi elo, elo gwajaḏaṯa lugwun na ŋu gwajaḏaṯa ḏi elo.

¹⁶ na liŋə ilmalɩŋe iləmɩnyi ḏəmɩnyo ḏeḏi elo ḏun ḏaṯɩje lage. elo gwiro ḏəmɩnyo, na gwun gwajaḏaṯa gi ḏəmɩnyo gwajaḏaṯa ḏi elo, na elo gwajaḏaṯa lugwun.

¹⁷ na dino ḏəmɩnyo ḏɩməṯɩmeje lage kani iləṯi ḏibɩɽeḏa nanu gi lamon leḏi ḏakɩmino, gi gwune ju ŋɩne kɩḏilio na liŋə ilo dino.

¹⁸ ŋɩḏe ŋate gi ḏəmɩnyo no. na ḏəmɩnyo ḏun ḏɩməṯɩmi ḏaṯireje ŋɩḏe kaja gi gwune ŋɩḏe ŋəṯi ŋwuɽedɩnya. na gwun gwaṯɩḏonye gwate məṯɩmi ḏəmɩnyo no.

¹⁹ liŋə gwiləmɩnyi gi gwune əmɩnyije gwerre.

²⁰ ḏa gwete marno, nyi gwaṯəmɩnyi eloŋu numɩnɩ donye megin, ŋu gwiro wɩɽɩgal. gi gwune ŋu gwun gwate gwəmɩnyu megin gwun gwaŋəḏu no, gwate gwəṯi ŋɩma gwəmɩnyi eloŋu gwun gwate gwaŋəḏu no.

²¹ iləṯi ŋuɽuna ŋeno lugwun ŋarno gwun gwəmɩnyu eloŋu gwəmɩnyu megin dino.