Biblia Todo Logo
Bìoball air-loidhne

- Sanasan -

1 yuwana 3 - ŋuɽun ŋun ŋiya ŋun ŋikaiilo elo 1966


asa 3 ḏəmɩnyo ḏeḏi baba ḏijigwuloḏa gi ḏɩmɩḏa ḏun ḏiŋir

1 aŋəḏɩl ḏəmɩnyo ḏun ḏiro kaja ḏun ḏiḏəḏije baba kəbe ilornɩḏini nyaɽe nyeḏi elo. na ilro dino. na ŋeno gɩḏilio ŋate gijilɩŋe no gi gwune gwate gwilɩŋiḏil no.

2 nyaŋa lun ləmmyɩlo, gwunnɩno ilro nyaɽe nyeḏi elo, na ŋore ŋate ŋaŋinu ilaje galakwe no, namɩni ilalɩŋe nilarno, ḏa ŋu maŋino ilaro gi ŋu, gi gwune gwilaŋu gwiro gi ŋu.

3 na liji wei lun ləṯi ḏiḏuḏɩnɩjo ṯeno ŋu gwe lawei lula lagin gi gwune ŋu gwiŋir gworki.


ŋuɽun ŋun ŋɩki na nyaɽe nyeḏi elo nyate nyigakinu berene no

4 na wei lun laṯape ŋuɽuna ŋɩki lɩmaki ŋuɽuna ŋun ŋɩḏuḏɩnu ga ḏɩno, na ŋuɽun ŋun ŋɩki ŋɩro ḏɩkia ŋuɽuna ŋun ŋɩḏuḏɩnu ga.

5 na nyalalɩŋe nyalarno ŋu maŋino kani nuəbɩri ŋuɽuna ŋage ŋun ŋɩki, na ŋuɽun ŋun ŋɩki ŋate lugwun no.

6 gwun gwajaḏaṯa lugwun gwate gwaṯape ŋuɽuna ŋun ŋɩki no; na gwun gwaṯape ŋuɽuna ŋun ŋɩki gwate gwaŋəḏu no, na gwate gwilɩŋiḏu no.

7 nyaŋa nyaɽe, aṯanyouwɩrico gwetɩdo gwajiḏuɽia no. ŋu gwun gwaṯape ŋuɽuna ŋiŋir, ŋu gwiŋir ŋi gwune ŋu gwiŋir.

8 na gwun gwaṯape ŋuɽuna ŋun ŋɩki ŋu gweḏi iblis gwiro, gi gwune uro gwerre iblis gwaṯape ŋuɽuna ŋun ŋɩki. na ḏino ŋaɽe ŋeḏi elo ŋɩmaŋino kani nuki ŋɩru ŋeḏi iblis.

9 na gwun gwilɩŋinu ḏi elo gwate gwaṯape ŋuɽuna ŋun ŋɩki no, gi gwune ŋeno ŋɩkwuḏɩnune elo na ŋajaḏaṯa lugwun, na gwate gwəṯi ŋɩma ŋwaɽe ŋuɽuna ŋun ŋɩki no gi gwune gwilɩŋinu ḏi elo.

10 na nyaɽe nyeḏi elo nyilɩŋiḏinu na nyaɽe nyeḏi iblis. ŋuɽun ŋe ŋeno gwun gwate gwaṯape ŋuɽuna ŋiŋir no gwədu gweḏi elo no, na ḏino gwun gwate gwaṯəmɩnyi megin no.

11 gi gwune ŋuɽun ŋeno ŋiro ŋun ŋidiŋɩnanyalo uro gwerre ŋarno iləmɩnyiḏe iləmɩnyi gworo.

12 nate nilro gi keiyin gweḏi gwiji gwun gwɩki kəbe nuɽinye megin no. na gwudaro nuɽinye? gi gwune ŋɩru ŋuŋun ŋɩki namɩni ŋeḏi megin ŋiŋir.


ḏəmɩnyiḏa ŋɩmaga ŋe

13 aṯanyaobeḏaga ṯuṯ lɩmagəri no ḏa liji leḏi gɩḏilio lɩmajidonye.

14 liŋə ilalɩŋe ilarno ilmubɩḏini gi ḏaiya ilmele gi ḏɩmiḏa gi gwune iləmɩnyu lɩmage. namɩni gwun gwate gwəmɩnyu megin no gwajaḏaṯa gi ḏaiya.

15 gwun gwudonyo megin gwiro gwun gwuɽɩnyiḏo ḏɩmar. na nyalalɩŋe gwun gwuɽɩnyiḏo ḏɩmar gwate gwəṯi ḏɩmiḏa gi gɩḏilio ḏun ḏajaḏaṯa lugwun no.

16 na dino ilmalɩŋe ḏəmɩnyo gi gwune ŋu maḏəḏə gwula gwuŋun ḏaiya gwan liŋə, na liŋə arram ilḏəḏə lula lage lɩmage.

17 namɩni gwun gwəṯi ŋɩdio ŋeḏi gɩḏilio naṯumɩni aŋu megin gwun gwibɩɽaṯo ŋɩdio numɩni laŋiṯi ḏugwor ḏuŋun, namɩni galakwe ḏəmɩnyo ḏeḏi elo ḏajaḏaṯa lugwun?

18 nyaɽe nyinyi, aṯanyəmɩnyo ŋuɽun ŋe na ŋwinyu ŋwe no, nyalmɩni əmɩnyi ŋɩru ŋe na ŋuɽun ŋe ŋun ŋiro gwerkwe.

19 na dino ililɩŋiḏi ilarno ileḏi gwerkwe liro, namɩni ilabɩɽi dugwor daŋe nanu gi jei ganu lugwun.

20 gi gwune ḏa dugwor dimajakɩmi namɩni elo gwubuṯano gi dugwor dage na gwilɩŋiḏi ŋuɽuna wei.

21 nyaŋa lun ləmɩnyuŋilo, ḏa dugwor dage date dimijakɩmi no namɩni iləṯi ḏibɩɽeḏa nanu gi jei ganu jeḏi elo.

22 na ŋun ŋiliɽoṯeḏe ŋilape lugwun, gi gwune ildimiḏi ŋuɽuna ŋuŋun naṯilduji ŋuɽun ŋun ŋəmɩnyɩlo gi jei ganu lugwun.

23 na ŋeno ŋuɽun ŋuŋun ŋiro, iləmɩnyi jiri je jeḏi ŋaɽe ŋuŋun ŋun ŋan yecu kɩrisṯo, na iləmɩnyiḏe iləmɩnyi gworo, gi gwune mijiḏəḏə ŋuɽuna.

24 na gwun gwaṯɩdɩme ŋuɽuna ŋuŋun ŋajaḏaṯa lugwun, na ŋu gwajaḏaṯa lugwun. na dino ilalɩŋe ilarno ŋu gwajaḏaṯa lage gwuɽɩwə gwe gwun gwɩpiḏo pɽul gwun gwiḏəḏije.

Nuba, Otoro New Testament

© British and Foreign Bible Society, 1966.

British & Foreign Bible Society
Lean sinn:



Sanasan