1 yuwana 2 - ŋuɽun ŋun ŋiya ŋun ŋikaiilo elo 1966

asa 2

¹ nyaɽe nyinyi, nyi gwo gwulijeje ŋuɽuna ŋeno kani nyate nyape ŋuɽuna ŋun ŋɩki no. na ḏa gwete gwumape ŋuɽuna ŋun ŋɩki, liŋə iləṯi gwete gwun gwuməḏəṯɩjo babaŋ lage gwun gwan yecu kɩrisṯo gwun gwɩŋir.

² na ŋu gwiro ḏiḏugɩno ḏeḏi ŋuɽun ŋage ŋun ŋɩki, namɩni ŋədu ŋage cucun no, namɩni ŋiro dino ŋeḏi gɩḏilio wei.

ḏa gwiji madeŋɩnejo eloŋu laro ŋɩmaga elo gwe

³ namɩni liŋə ililɩŋiḏi nilarno gwilɩŋiḏɩlo da ilmadɩme ŋuɽuna ŋuŋun.

⁴ namɩni gwun gwarno ŋilɩŋiḏulo numɩni ate nudɩme ŋuɽuna ŋuŋun no, ŋu gwiro wɩɽɩgal na ŋate lugwun ŋun ŋiro gwerkwe no.

⁵ namɩni gwun gwaṯɩdɩme ŋuɽuna ŋuŋun na gwerkwe ganu ḏəmɩnyo ḏeḏi elo ḏiməṯɩmeje lugwun. na ŋeno ilalɩŋe ilarno ilo lugwun.

⁶ gwun gwarno gwijəḏəṯi lugwun arram ŋu gwawele dino gi gwune aṯɩn kɩrisṯo wele.

⁷ nyaŋa lun ləmɩnyɩlo, nyi gwate gwo gwulijeje ŋuɽuna ŋun ŋiya no, namɩni ŋuɽun ŋeno ŋuɽun ŋijo lagalo uro gwerre. ŋuɽun ŋun ŋuɽun ŋiro ŋun ŋidiŋɩnanyalo uro gwerre.

⁸ na mɩna, ŋuɽun ŋun ŋiya ŋajilulijo ŋun ŋiro gwerkwe lugwun na lagalo; gi gwune girɩm go giwiwiḏi namɩni gwunnɩno bure gwun gwiro gwerkwe gwoɽa galo.

⁹ gwun gwaṯarno gwo kwu bure numɩni ɽe ganu kwu megin, namɩni ŋu gwore kirɩm.

¹⁰ namɩni gwun gwaṯəmɩnyi megin gwajaḏaṯa kwu bure, na gwate gwəṯi ŋuɽuna ŋetɩdo ŋun ŋobɩlkejo gwiji no.

¹¹ namɩni gwun gwaṯɩdonye megin gwo kirɩm na gwaṯawewele kirɩm, na gwate gwilɩŋiḏi weləḏɩne no, gi gwune ma girɩm rimi gi jei.

¹² ŋajilulijo nyaŋa nyaɽe, gi gwune ŋuɽun ŋalo ŋun ŋɩki ŋɩmajilinḏuḏɩjo gwan jiri juŋun.

¹³ ŋajilulijo nyaŋa babaŋa, gi gwune gwimanyalɩŋe gwun gwijo uro gwerre. ŋajilulijo nyaŋa jamal, gi gwune gwumanyaḏami gwun gwɩki. ŋajilulijo nyaŋa nyaɽe, gi gwune nyalmalɩŋe babaŋu.

¹⁴ ŋɩmajilulijo nyaŋa babaŋa, gi gwune manyalɩŋe gwun gwijo uro gwerre. ŋɩmajilulijo nyaŋa jamal, gi gwune nyalbɩɽe nanu na ŋuɽun ŋeḏi elo ŋijəḏəṯi lagalo, na gwumanyaḏami gwun gwɩki.

¹⁵ aṯanyəminyo gɩḏilio no, na ŋɩdi ŋun ŋijo kɩḏilio no. ḏa gwete maṯəmɩnyi gɩḏilio, ḏəmɩnyo ḏeḏi baba gwun gwiro elo ḏate lugwun no.

¹⁶ gi gwune ŋɩdi wei ŋun ŋijo kɩḏilio ŋeḏi ŋuɽun ŋun ŋɩbunyɩlo jiŋɩno ŋiro na ŋe ḏutɩḏo jei ganu, na ŋe ḏɩbuḏia lula ḏɩbona ḏe, namɩni ŋədu ŋeḏi baba no, namɩni ŋeḏi gɩḏilio ŋiro.

¹⁷ na gɩḏilio go giwiwiḏi na ŋuɽun ŋe ḏibunya ḏuŋun dino; namɩni gwun gwaṯɩduji ŋuɽuna ŋun ŋɩbunyɩlo elo gwajaḏaṯa gi gɩḏilio.

dɩminu ga gwan liji lun lɩkiḏiḏɩl kɩrisṯoŋale

¹⁸ nyaŋa nyaɽe, sa jɩmila jun jiro gɩdo, gi gwune nyalmadiŋɩni ŋarno gwila gwun gwɩkiḏiḏɩl kɩrisṯo gwe, na gwunnɩno lo gɩrɩpi lun lɩkiḏiḏɩl kɩrisṯoŋale. na ḏino ilalɩŋe ilarno sa jɩmila jun jiro ŋɩḏo.

¹⁹ lɩmədu lage gi gwune lədu lage no, na ḏa lage liro laŋajaḏaṯa lage, nalmɩni du kani alaŋiḏi alarno luŋa wei lədu lage no.

²⁰ namɩni nyalwɩrṯinu ŋu gwe gwun gwɩpiḏo pɽul, na nyalalɩŋe ŋɩdio wei.

²¹ nyi gwate gwulijeje niarno ŋɩḏɩmiḏanyalo ŋun ŋiro gwerkwe no, namɩni gi gwune ŋilɩŋiḏanyalo, na ŋɩwɩɽɩgal wei ŋate ŋiro ŋuɽun ŋun ŋiro gwerkwe no.

²² əḏi gwiro wɩɽɩgal namɩni gwiro ŋu gwun gwaṯiŋiŋiɽini nuarno yecu gwədu gwiro kɩrisṯo na? na gwun gwaṯiŋiŋiɽɩni babaŋ na ŋaɽe gwiro gwun gwɩkiḏiḏɩl kɩrisṯo gwe.

²³ gwun gwaṯiŋiŋiɽini ŋaɽe gwate gwəṯi babaŋ no, namɩni gwun gwaṯiteije ŋaɽe ga gwəṯi babaŋ dino.

²⁴ namɩni nyaŋa, ŋun ŋidiŋɩnanyalo uro gwerre ouwɩricɩlo alajaḏaṯa lagalo. na ḏa ŋɩmajaḏaṯa lagalo ŋun ŋidiŋɩnanyalo uro gwerre, nyaŋa dino nyalajaḏaṯa ŋaɽe na ḏi baba.

²⁵ na ŋeno ŋiro ŋun ŋaruŋe ŋijilḏəḏə ŋiro ḏɩmiḏa gi gɩḏilio.

²⁶ ŋulijejɩlo ŋeno ŋan liji lun lar lajiḏuji.

²⁷ namɩni dɩwɩrṯino ḏun ḏimanyape lugwun ḏajaḏaṯa lagalo, na nya late labunyi gwetɩdo gwajalɩmi no. namɩni ḏɩwɩrṯino ṯeno ḏajalɩmi ŋuɽuna wei na ḏiro gwerkwe, ḏate ḏiro wɩɽɩgal no. na ŋiro gi gwune alɩmiaje jəḏəṯɩl lugwun.

²⁸ na gwunnɩno nyaŋa nyaɽe, jəḏətɩl lugwun kani ḏa maje maŋino iləṯi ḏibɩɽeḏa nanu ilate iləṯi ḏare lugwun no gi ḏaɽuwa ḏuŋun no.

²⁹ na ḏa nyalmalɩŋe nyalmarno ŋu gwiŋir nyalalɩŋe nyalarno wei lun laṯape ŋuɽuna ŋun ŋiŋir lilɩŋinu lugwun.