1 ṯimuṯawus 6 - ŋuɽun ŋun ŋiya ŋun ŋikaiilo elo 1966

asa 6 lɩwainy

¹ na liji wei lun liro lɩwainy lo kalo geḏi ŋɩru ŋun ŋɩni, alduji liji lagin lun lapijɩlo ŋɩru lɩdeleḏo gi ḏinəjio wei kani ate a liji ḏene jiri jeḏi elo na ḏalɩmia ḏuŋun no.

² na lɩwainy lun ləṯi liji lun lapijɩlo ŋɩru lun ləmɩnyu eloŋu, ate alabɩlaṯe gi gwune luŋa liro ŋɩmaga; nalimɩni apijo ŋɩru ŋutəno gi gwune lun ləṯi ḏɩbona ŋɩru ŋagin ləmɩnyu eloŋu, naləmɩnyiḏi. alɩmiḏo ŋuɽuna ŋe ŋeno.

ḏalɩmia ḏun ḏiro ŋɩwɩɽɩgal

³ ḏa gwiji gwɩmanje gwun gwaṯalɩmi liji ŋuɽuna ŋun ŋiro kaja ŋate ŋɩkaiinu ŋuɽun ŋe ŋeḏi gwele gwage gwun gwan yecu kɩrisṯo ŋun ŋiro muma, na ḏalɩmia ḏeḏi ṯaṯ ḏeḏi elo no,

⁴ ŋu gwubuḏi gwula gwuŋun na gwate gwilɩŋiḏi ŋɩdio ŋədi no, na gwəmɩnyu ḏɩbereḏa na ḏɩwəwəɽeico ŋuɽuna ŋwara ŋete ŋete, na ŋuɽun ŋeno ŋaṯapa ḏiḏio gwiji ganu na ḏɩbereḏa, na ḏuməḏəṯo gi liji elo na ḏuməḏɩnɩjo liji ŋanu jai.

⁵ na ŋuɽun ŋun ŋiro ŋɩwɩɽɩgal ŋeḏi ləmɩnyo lun ləṯi ŋadɩgɩɽenya ŋun ŋidigɩɽo late ləṯɩn ŋuɽuna ŋun ŋiro gwerkwe no, laṯarno ṯaṯ ḏeḏi elo ḏiro ŋɩma ŋeḏi ḏɩbona ḏaŋin.

ḏɩbona ḏun ḏate ḏiro muma gwerkwe

⁶ namɩni ṯaṯ ḏeḏi elo ḏiro ḏɩbona ḏeḏi apana ŋɩdio ŋun ŋiŋir ḏa ilmiŋir dugwore ŋɩdi ŋun ŋəṯɩlo.

⁷ gi gwune liŋə ilməḏio ŋɩne kɩḏilio ilate ləḏi ŋɩdi ŋe ŋədi no, namɩni ŋɩlɩŋenu muma ilate ilədu dino ŋɩdi ŋe ŋədi no.

⁸ na ḏilməṯi ŋwona na jiria na lɩdunu ouwɩricije ildile ganu.

⁹ namɩni lun libunyu ŋɩdio ŋutu lidi kalo ge ḏiḏeijo na kɩbəɽɩnyo, na ŋuɽun ŋutu ŋun ŋɩki ŋeḏi jiŋɩno ŋun ŋiro ŋɩɽilo, ŋun ŋar ŋalɩki nanu ŋabɩɽaje liji ŋamuruṯ na ḏaiya.

¹⁰ na ḏəmɩnyo ḏeḏi algɩrucu ḏiro ḏro ḏeḏi ŋuɽun wei ŋun ŋɩki ŋun ŋiro kajakaja. liji kworo yɩmalgwujane lɩmaḏuḏe kalo ge ḏɩməṯo ḏagin na lɩmaḏuge jiŋɩno jagin ḏɩḏia ḏe ḏun ḏutu.

bulus gwubɩɽi ṯimuṯawusŋ nanu ŋuɽun ŋe

¹¹ namɩni ŋa gwun gwiro gwiji gweḏi elo, abɩro ŋuɽun ganu ŋeno; ŋagwujane ŋuɽuna ŋun ŋiŋir na ṯaṯ ḏeḏi elo, na ḏɩməṯo, na ḏəmɩnyo, na ḏɩməṯo ḏugwore na ḏija ḏe ḏugwor muma.

¹² ro ḏɩrra ḏe ḏe ḏɩməṯo ḏun ḏiŋir, ŋaməṯo ḏɩmiḏa gi gɩḏilio ḏun ḏɩməṯinɩjo galo, na ŋa gwaŋiḏi ḏɩteijo ga ḏun ḏiŋir gi jei ganu jeḏi liji lun lutu.

¹³ nyi gwɩḏəḏaŋa ŋuɽuna ŋɩbɩɽe gi jei ganu jeḏi elo gwun gwaṯɩmiḏi ŋɩdio wei, na jeḏi yecu kɩrisṯo gwun gwiteijo ŋuɽuna ga ŋiŋir gi jei ganu jeḏi bɩlaṯus bunti,

¹⁴ ŋadɩme ŋuɽuna ŋɩrleḏ ŋate no na ḏare ḏate no, kəbe an gwele gwage aŋino gwun gwan yecu kɩrisṯo,

¹⁵ gwun gwar gwaŋino ŋwamon ŋwuŋun gwele gwun gwaṯɩbuḏɩni gwun gwiro gwetɩdo, əlmək gweḏi əlmaŋa wei, na gwele gweḏi lele wei,

¹⁶ gwun gwiro gwetɩdo gwate gwəṯɩn ḏaiya no, gwun gwaṯɩje kwu bure gwun gwate gwan gwiji dakaḏa no,. gwun gwate gwuman gwiji aŋu na gwate gwəṯi ŋɩma gwuaŋu no; ḏinəjio ḏaje lugwun na ŋɩma gi gɩḏilio. gwerkwe.

¹⁷ uməḏɩjo liji wei lun ləṯi ḏɩbona ḏutu kɩḏilio keno ate albuḏia lula lagin no; almɩni ate algele ḏiḏuḏɩnɩjo ḏagin ŋuɽun ŋagin ŋun ŋiro ḏɩbona ḏun ḏate ḏajaḏaṯa no, nalmɩni ŋele ḏi elo gwun gwumiḏo gwun gwaṯijiḏəḏə ŋɩdio wei ŋutu gwan ḏidila ganu ḏage.

¹⁸ alape ŋuɽuna ŋun ŋiŋir, alro lun ləṯi ḏɩbona ḏutu kalo geḏi ŋɩru ŋun ŋiŋir, alro lino ŋɩdi ŋagin gi ḏəmɩnyo gi ḏigegila ŋɩdio,

¹⁹ algele ŋɩdio ldu ŋan lulo lagin ŋiro gi gama geḏi jɩḏilio jun jila kani alməṯo ḏɩmiḏa ḏun ḏiro gwerkwe.

²⁰ ṯimuṯawus, dɩmiḏi ŋuɽuna ŋun ŋiḏəḏaŋalo; abɩro ŋuɽun ganu ŋun ŋate eloŋu no na ŋun ŋiro ga jai, na ŋuɽun ŋun ŋaṯɩleico ḏilɩŋeḏa nalmɩni ro ŋɩwɩɽɩgal.

²¹ na liji kworo lun ləmɩnyu ŋuɽuna ŋeno lɩmawalane gi ḏɩməṯo. ḏiŋiriḏa ḏaje lagalo.