1 ṯimuṯawus 4 - ŋuɽun ŋun ŋiya ŋun ŋikaiilo elo 1966

asa 4 limualɩm lun liro lɩwɩɽɩgal na luŋa lillarra

¹ na gwuɽɩwə gwun gwɩpiḏo pɽul gwarno dino muma ŋwamon gwe ŋweḏi gɩdo ganu liji lanje kworo lawalane gi ḏɩməṯo, lagwujane gwuɽɩwə gwun gwaṯɩḏuji liji na ḏalɩmia ḏeḏi ḏiŋerom.

² ŋuɽun ŋagin ŋɩki ŋiro ŋɩwɩɽɩgal, na dugwor dagin ḏiḏɩrṯinu dɩmaro əṯirimo.

³ luŋa lakajo liji gi ḏagiḏa, naṯɩlalɩmi kani ate aṯɩlʼe ŋɩdio kworo no, ŋun ŋigelɩlo elo kani a liji lun ləmɩnyu. na lilɩŋiḏi. ŋuɽuna ŋun ŋiro gwerkwe ŋaṯɩlape, naleico eloŋu sukran.

⁴ gi gwune ŋɩdi wei ŋun ŋigelɩlo elo ŋiŋir, ŋate ŋani gwiji donye no ḏa ŋumulape nueico eloŋu sukran;

⁵ na ŋɩpiḏo pɽul ŋuɽun ŋe ŋeḏi elo na ḏuməḏɩjo ḏe eloŋu.

⁶ na ḏa ŋa madɩŋəni limage ŋuɽuna ŋeno ŋa gwaro gaḏam giŋir geḏi yecu kɩrisṯo, ŋa gwiɽəḏɩnu ŋuɽun ŋe ŋeḏi ḏɩməṯo na ḏalɩmia ḏun ḏiŋir ḏun ḏigwujana.

⁷ namɩni donye ŋuɽuna ŋun ŋaṯɩl la umə ŋɩro gumɩḏi lun luɽun ŋun ŋiro ŋɩrleḏ, ŋabɩɽi aŋɩna yuŋa nanu gi ṯaṯ ḏeḏi elo.

⁸ gi gwune ḏibɩɽeḏa nanu ḏeḏi jiŋɩno ḏiŋir gwɩti, namɩni ṯaṯ ḏeḏi elo ḏutəno ŋuɽuna jei ganu, ḏun ḏɩməṯi ŋuɽuna ŋe ḏɩmiḏa ḏeḏi gwunne na ḏun ḏar ḏila.

⁹ ŋuɽun ŋeno ŋəṯi jei ganu ŋəmɩnyɩnu ḏəmɩnyo ḏe wutiwuti.

¹⁰ gi gwune liŋə ilaṯɩrṯonyiḏe ŋuɽun ŋeno na liji lo, namɩni liŋə limagele ḏiḏuḏɩnɩjo ḏage ḏi elo gwun gwumiḏo gwiro gwe ḏɩkədəḏə liji ga wei na lun ləmɩnyu.

ḏɩmiḏa na ḏalɩmia ḏeḏi ṯimuṯawus

¹¹ aŋiḏi ŋuɽuna ŋeno ŋaŋalɩmiḏe.

¹² ŋanouwɩrico gwete gwaŋanabɩlaṯe no gi gwune ŋa gwiro gamal, namɩni aŋinɩl gi jei ŋanu jeḏi liji lun ləmɩnyu eloŋu kalo geḏi ŋuɽun na gi ḏapa ŋɩru, na gi ḏəmɩnyo, na kwuɽɩwə na gi ḏɩməṯo na gi ḏɩɽiḏa pɽul.

¹³ kəbe na nyi gwar gwila, gelo gei guŋa muma kalo geḏi ḏəgɩriə, na ḏuməḏɩjo liji ŋuɽuna ŋiŋir ŋeḏi yecu kɩrisṯo, na ḏalɩmia.

¹⁴ ŋəduḏa gwuḏuna no ḏiḏəḏo ḏeḏi elo ḏun ḏijo lugwuŋa ḏun ḏɩmaŋa elo ḏəḏə ŋuɽun ŋe ŋun ŋaŋijilo elo lelɩnya leḏi kɩniso gwune abujɩlo ḏi kɩɽelo lugwuŋa.

¹⁵ aṯairi jei galo ŋuɽun ŋeno, ŋalḏəḏə gwula gwuŋa kani a ḏidakaḏa ḏuŋa ŋudakaḏaṯa kɩɽelo ḏaŋini muma gi liji wei.

¹⁶ ji muma kwulo gwuŋa na gi ḏalɩmia ḏuŋa ŋangele gei muma, gi gwune ḏa ŋɩmanarre ŋeno ŋa gwəkədəḏɩni ga ŋa na liji lun laṯaŋadeŋɩnejo dino.