1 ṯimuṯawus 3 - ŋuɽun ŋun ŋiya ŋun ŋikaiilo elo 1966

asa 3 liji lun lapo ŋɩru ŋeḏi kɩniso

¹ ŋuɽun ŋeno ŋiro gwerkwe: ḏa gwiji mabunyi ŋuɽuna ŋeḏi gwele gweḏi kɩniso gwəmɩnyu ŋɩru ŋun ŋiŋir.

² na dino arram gwele gwate gwəṯi ḏare no, gwəṯi gwa gwetɩdo, gwiro gwele gweḏi gwulo gwuŋun, gwaje muma ŋaḏɩgɩɽe ŋun ŋiŋir, gwəṯi gwilo gwiŋir, gwəmɩnyi liḏa, gwiŋir ŋuɽun ŋeḏi ḏalɩmia,

³ gwate gwaṯɩyu ŋau ŋutu ŋeḏi jaɽe jun jiro gi ḏuɽuṯ no, gwate gwanpi liji no, gwate gwutu jei ganu gi ḏibunya ḏɩbona ḏutu ḏun ḏɩki no, gwəṯi ḏiŋiriḏa gwate gwəṯi ŋuɽuna ŋan ḏɩkiḏiḏia no, gwate gwəṯi ḏəmɩnyo ḏeḏi əlŋɩrucu no.

⁴ ŋwudɩme duno gwuŋun muma, na nyaɽe nyuŋun aldeŋɩnejo ŋuɽun wei ḏiŋiriḏa ḏe,

⁵ namɩni ḏa gwiji gwaṯe malɩŋe ḏidɩmeḏa duno gwuŋun no, namɩni galakwe gwadɩme kɩniso geḏi elo?

⁶ ŋu gwaṯe gwiya gi ḏɩməṯo no gəko na gwara gwabuḏi gwula gwuŋun gwidi kalo geḏi ḏakɩmino ḏeḏi iblis.

⁷ na dino arram gwəṯi ŋuɽuna ŋiŋir gi liji lun liro kaja gəko na gwara gwidi kalo geḏi ḏiluḏe kɩbəɽɩnyo geḏi iblis.

⁸ na ŋiro dino arram liji lun laṯɩgelejo kɩniso uwə ledeleḏe gi ḏinəjio, late ləṯi diŋɩla ganu dɩttən no, laṯe laṯɩnyu ŋau ŋutu geḏi jaɽe jun jiro gi ḏuɽuṯ no, late lutu jei ganu no gi ḏibunya ḏɩbona ḏutu ḏun ḏɩki no,

⁹ naləṯi ŋuɽuna ŋun ŋɩlɩbo ŋeḏi ḏɩməṯo ḏugwore de dun dɩpiḏo pɽul.

¹⁰ namɩni dino ouwɩricɩlo gwerre alɩḏeije na ḏa late lɩməṯi ḏare no, ouwɩricɩlo alape ŋɩru.

¹¹ na dino arram la lagin ledeleḏe gi ḏinəjio, late lanuməḏəṯo gi liji elo no, aṯɩlje muma ŋadɩgɩɽe ŋe ŋiŋir, naliŋir ŋɩdi wei.

¹² na ləmɩnyo lun laṯɩgelejo kɩniso uwə aləṯi gwa gwetɩdo, aldɩme nyaɽe nyagin na lɩdunu lagin na nyaɽe nyagin muma.

¹³ na luŋa lun lɩmape ŋɩru ŋe ḏigeleja uwə muma, laṯɩl liji nəji naləṯi ḏibɩɽeḏa nanu gi ḏɩməṯo ḏeḏi yecu kɩrisṯo.

¹⁴ ŋuɽun ŋeno ŋulɩjaŋalo nyi gwo gɩṯo gwar gwila,

¹⁵ namɩni ḏa nyi gwaṯe mila cou no, ŋamɩni lɩŋe galakwe arram liji lape ŋɩru kwu dunu gweḏi elo gwun gwiro kɩniso geḏi elo gwun gwumiḏo, liḏɩgo leḏi ŋuɽun ŋun ŋiro gwerkwe na ḏɩməṯɩno galo ḏuŋun.

¹⁶ na wutiwuti bucu, ŋun ŋɩlɩbo ŋeḏi gwujana eloŋu ŋɩbuḏo, elo gwimaŋini kaŋɩnu, gwɩpiḏo pɽul kwuɽɩwə, na liji leḏi kanyin gwimaniŋalaḏe, gwimalgwuməḏo gi liji, gwiəmɩnyi ŋɩne kɩḏilio, gwimadiɽi gi ḏoɽeḏa.