1 ṯimuṯawus 2 - ŋuɽun ŋun ŋiya ŋun ŋikaiilo elo 1966

asa 2 ŋuɽun ŋe ḏorṯeḏa eloŋu kɩniso

¹ nyi gwuɽoṯeḏo gwerre ganu lugwuŋa a liji uməḏɩjo eloŋu ḏiɽoṯeḏa ḏe na ŋuɽun ŋeḏi liji, na ḏeico ḏe eloŋu sukran gwan liji wei.

² na aluməḏɩjo gwan liji lun liro lele na lun laṯape ŋɩru ŋeḏi ŋele, kani ɩlmiḏe iliŋir dugwore ḏɩrra ḏate no, ŋuɽun ŋe wei ŋeḏi elo na ŋeḏi ḏiŋiriḏa muma.

³ na ŋuɽun ŋeno ŋiŋir ŋəmɩnyɩnu ḏi elo gwun gwəkədəḏije ga

⁴ gwun gwubunyu liji wei ləkədəḏɩni ŋa allɩŋe ŋuɽuna ŋun ŋiro gwerkwe.

⁵ gi gwune elo gwo gwetɩdo; na gwun gwiro gɩlɩgi gwo gwetɩdo ḏi eloŋa liji le, gwiji gwun gwan yecu kɩrisṯo,

⁶ gwun gwiḏəḏi gwula gwuŋun gi jili jeḏi ḏɩkədəḏɩnə ga gwan liji wei, ŋuɽun ŋuŋun ŋun ŋəŋinu gi lamon lun larɩle elo.

⁷ elo gwuməṯɩnyi niro gwun gwuməḏɩjo liji niro ḏuwəjo—nyi gwuməḏɩjaŋa gwerkwe nyi gwate gwugelɩjaŋa ŋɩwɩɽɩgala no—na mualɩm gweḏi liji lun liro ga dino gi ḏɩməṯo na ŋuɽun ŋun ŋiro gwerkwe.

⁸ na nyi gwubunyu liji lun liro ləmɩnyo luməḏɩjo eloŋu kalo wei, labujo di elo dun dɩpiḏo pɽul, late ləṯi ḏɩɽeḏa ganu na ḏɩbereḏa no.

⁹ na dino la laṯɩkani ŋɩdio ŋagin namɩni ŋideleḏo gi la ŋun ŋate ŋaṯɩbuḏi jiŋɩno jagin no; late laṯukɩɽe əɽu bubruṯ no, na laṯɩkani ḏab na nyida nyun nyiro ŋwoiny ŋwun ŋwiro bibɩɽŋal no, na jiria jun jutu jilɩnya no;

¹⁰ namɩni ŋɩru ŋe ŋun ŋiŋir, ŋedeleḏo gi la lun laṯarno ləmɩnyu eloŋu.

¹¹ na gwa ŋwalɩmini ḏija ḏe nyɩkwom muma.

¹² namɩni nyi gwate gwəḏəḏə gwa ŋuɽuna ŋe ŋuro mualɩm na gwabuṯane kwiji gwun gwiro gwəmɩnyo no, namɩni aṯuje nyɩkwom.

¹³ gi gwune adam gwiro gwukədɩnu gwerre na awa gɩdo,

¹⁴ na adam gwate gwiro gwun gwirdeijɩlo ganu no namɩni gwa gwiro gwun gwirdeijɩlo ganu nuape ŋuɽuna ŋun ŋɩki.

¹⁵ namɩni gwa gwəbɩrɩni gi ḏilɩŋeḏa ḏeḏi ŋaɽe, ḏa la lɩmaməṯini galo gi ḏɩməṯo ḏəmɩnyo ḏe na gi ḏɩpiḏa pɽul gi ḏijaga muma.