1 ṯimuṯawus 1 - ŋuɽun ŋun ŋiya ŋun ŋikaiilo elo 1966

asa 1 ḏisalɩmia na ḏiḏɩminu liji ga ḏan ḏalɩmia ḏun ḏiro ŋɩwɩɽɩgal

¹ nyi gwan bulus, gwun gwiro ḏuwəjo ḏeḏi yecu kɩrisṯo ŋuɽun ŋe ŋeḏi elo gwun gwukədəḏije ŋa, na yecu kɩrisṯo gwun gwiro ḏiḏuḏɩnɩjo ḏage.

² nyi gwo gwulijaŋa, ŋaɽe ŋinyi muma gi ḏɩməṯo ŋun ŋan ṯimuṯawus. ḏiŋiriḏa ḏaje lugwuŋa na ŋino na ḏouwɩliḏa ḏeḏi elo gwun gwiro baba gwage na yecu kɩrisṯo gwun gwiro gwele gwage.

³ gi gwune nyi gwuməḏijaŋa ŋajiga awɩsus gi gwune nyi gwar gwawele ŋɩne makɩḏunia, kani uməḏɩjo liji kworo lo lanalɩmi liji ŋuɽuna ŋun ŋiro kaja,

⁴ na lo lanŋele nani ŋuɽun ŋun ŋiro ga jai, na ŋuɽun ŋan lɩgwurnɩnyo ŋun ŋəwɩjeicɩlo galo ŋate ŋəṯi ḏikəɽuḏɩno ḏe ḏɩməṯo ḏeḏi elo no.

⁵ na ŋuɽun ŋun ŋaŋaluməḏɩjo ŋun ŋiro lja ŋiro ḏəmɩnyo gi ḏugwor ganu ḏun ḏɩpiḏo pɽul, na ḏugwor ḏiŋir na ḏɩməṯo ḏun ḏate ḏiro ŋɩwɩɽɩgal no.

⁶ na liji kworo limawɩwɩrle ganu limadɩkaḏaṯa ŋuɽuna nanu ŋun ŋiro ga jai,

⁷ libunyu laro limualɩm leḏi ŋuɽun ŋun ŋigelijɩlo elo musaŋ, namɩni luŋa late lilɩŋiḏi ŋuɽuna ŋun ŋaṯuməḏɩni no, na ŋun ŋuməḏɩlo ḏibɩɽeḏena ḏe nanu ŋate ŋilɩŋiḏɩlo no.

⁸ namɩni liŋə ilarno ŋuɽun ŋun ŋigelijɩlo elo musaŋ ŋiŋir, ḏa ŋɩmal gwiji məṯo ḏiḏuḏɩno ḏe galo,

⁹ ŋuɽun ŋilɩŋenu ganu ŋuɽun ŋun ŋigelijɩlo elo musaŋ ŋate ŋigelɩnu ŋan gwiji gwun gwiŋir no, namɩni ŋan liji lun late ləṯi ŋuɽuna ŋun ŋɩḏuḏɩnu ga no, na lun late ŋaṯɩlideŋɩnejo no, na lun late laṯɩḏonye eloŋu no, na lun lɩki, na lun late ləmɩnyu ḏɩpiḏa pɽul na laṯɩlo eloŋu, na lun laṯɩɽinye babaŋaije na lun laṯɩɽɩnye nanaŋaije, na lun laṯɩɽɩnye liji,

¹⁰ na liji leḏi ŋeḏor na lun laṯure liji lun liro ləmɩnyo, na lun laṯela liji lun lumɩno, na lun liro lɩwɩɽɩgal, na lun laṯərɩmi ga jai, namɩni da ŋɩmanje kworo ŋun ŋar ŋədiɽio ŋuɽuna ŋun ŋiŋir muma,

¹¹ ŋan ŋuɽun ŋun ŋiŋir ŋe ḏoɽeḏa ḏeḏi elo gwun gwaṯɩbuḏɩni ŋun ŋimilḏəḏɩnyi.

bulus eico eloŋu sukran gwan ŋino ŋuŋun

¹² na nyi gweico yecu kɩrisṯoŋ sukran gwun gwiro gwele gwage gwun gwubɩɽonyi nanu, gwun gwarno nyi gwiŋir gwimiduji gwe ŋɩru,

¹³ nyi gwun gwaṯɩḏeniḏi gwerre na gwaṯɩḏagɩɽini gi liji nilgegɩle dəɽi nanu, namɩni nyiminəḏini gi gwune ŋərrɩlo ŋɩɽilo ŋe ḏɩməṯo ḏate ḏijo no.

¹⁴ na ḏiŋiriḏa ḏɩmaṯani ḏeḏi gwele gwage bucu ḏɩməṯo ḏe na ḏəmɩnyo ḏun ḏijo ḏi yecu kɩrisṯo.

¹⁵ ŋuɽun ŋeno ŋiro gwerkwe na ŋedeleḏo wei ŋilape, yecu kɩrisṯo mila ŋɩne kɩḏilio gwar gwəkəde liji ga lun lɩki, na nyi gwiro gwun gwiro lja lagin.

¹⁶ namɩni nyi mabuje ŋino ŋe kani a ḏɩməṯo ḏe ḏugwore ḏeḏi yecu kɩrisṯo ḏun ḏutu aŋini lugwi gwerre, gi sura gi liji lun ləmɩnyi yecuŋ gi ḏɩmiḏa gi gɩḏilio.

¹⁷ ḏinəjio na ḏoɽeḏa gi gɩḏilio ḏaje kwele gi gɩḏilio gwun gwate gwete no, na gwun gwate gwaṯɩlaŋu no, gwun gwiro elo gwun gwiro gwetɩdo. gwerkwe.

¹⁸ nyi gwiḏəḏaŋa ŋuɽuna ŋeno ŋaɽe ŋinyi ŋun ŋan ṯimuṯawus, ŋan ŋuɽun ŋun ŋuməḏɩnu gwerre ŋan ŋa, kani ŋaŋɩrre ḏɩrra ḏe ḏun ḏiro ḏɩrra ḏiŋir,

¹⁹ ŋaməṯo ḏɩməṯo didir na ḏugwor ḏiŋir ḏɩməṯo ḏun ḏɩma liji kworo donye lɩmakɩre ḏɩməṯo ḏaŋin, ŋiro gi gwune an murkab akɩre.

²⁰ na kworo lagin gwan iminayus na iskandara lun limilḏəḏə seiṯanŋ kani alalɩmino aṯɩlḏenɩḏia no.