1 ṯasaluniki 2 - ŋuɽun ŋun ŋiya ŋun ŋikaiilo elo 1966

asa 2 ḏəɽinyino ḏeḏi bulus ḏan ḏuməḏɩjo liji lun liro ga dino ŋuɽuna ŋeḏi yecu

¹ gi gwune nyaŋa lɩmagəri, nyalɩŋiḏi ḏəḏio ḏəri lagalo ḏate ḏɩmaro jai no,

² namɩni ŋɩmamalɩḏe nanu gwune anməṯi ḏɩḏia gwerre ganu anmake nanu bilibi, gi gwune ŋilɩŋiḏanyalo, anmabɩɽe nanu elo gwe gwage naṯajɩluməḏɩjo ŋuɽuna ŋiŋir ŋeḏi elo kɩlɩgi ganu ŋɩrəkwənəŋe.

³ gi gwune ḏuməḏo ḏəri ḏate ḏaṯɩrṯəḏe ŋɩwɩɽɩgala no, i ŋuɽun ŋun ŋiro ŋɩrleḏ no, i ŋate ŋan ḏirdeijo ganu no,

⁴ namɩni gi gwune ŋiji elo iḏeije nuŋwijibuje anamadeleḏe gwiḏəḏije ŋuɽuna ŋun ŋiŋir ŋeḏi yecu kɩrisṯo aŋaldɩme, na ŋiro dino anumə, anate nar niŋiri liji no, namɩnl eloŋu gwun gwaṯɩḏeije dugwor dage.

⁵ gi gwune nyalilɩŋiḏi muma, anaṯe naṯare ŋuɽuna ŋun ŋami no; na elo gwiro gwaŋiḏiŋije, anaṯe nalɩbɩji ŋuɽuna ŋe ḏibunya ŋidio ŋutu no,

⁶ nanaṯe nibunyin ḏɩbuḏia ḏeḏi liji no, i laŋalo, i ŋi liji liro kaja no, namɩni ŋi gwune andro ḏuwəjo ḏeḏi kɩrisṯo ŋiŋir lagəri anaɽoṯeḏe ḏinəjio,

⁷ namɩni andro ŋi ḏiḏɩmamaḏa lagaloŋu gi gwune gwa ŋwun ŋwaṯiɽi ŋaɽe ŋan gwiro gwiḏɩre gweḏi nyaɽe nyuŋun,

⁸ na gi gwune dugwor dəri dəmɩnyaje gworki, nanəmɩnyi nanarno lajiḏəḏə ŋate ŋiro ŋuɽun ŋun ŋiŋir ŋeḏi elo kuwei no, namɩni ḏɩmiḏa ḏeḏi lulo ləri dino, gi gwune nyaləmɩnyɩnu lagəri bucu.

⁹ gi gwune lɩmagəri, nyalaḏɩŋane ŋɩru ŋəri ŋun ŋɩni na ŋɩbɩɽe ŋun ŋaṯanalape lagalo, gi gwune naṯanape ŋɩru gənyin gigili kani ate ajilɽinyi ŋɩru no kaja ko gaṯajɩlguməḏɩjo ŋuɽuna ŋiŋir ŋeḏi elo.

¹⁰ nyaŋa liro lun laŋiḏiŋije na elo dino, galakwe ilajiga kal geṯe aniŋir niḏuḏɩnu ga anate nəṯɩn ŋuɽuna nanu ŋəḏi ŋun ŋɩki lagalo no, nyaŋa lun ləmɩnyu eloŋu.

¹¹ gi gwune lilɩŋiḏanyalo galakwe analɩmiḏe gwete gweṯe lagalo gi gwune babaŋa nyaɽe nye nyuŋun, gwajibɩɽi nanu, anḏəḏeje ŋuɽuna ŋɩbɩɽe anarno,

¹² nyawewele ŋuɽun ŋe wei ŋun ŋideleḏo ḏi elo, gwun gworniḏaje ŋele ŋuŋun na ḏoɽeḏa ḏuŋun.

ḏiḏagɩɽina

¹³ na gwan ŋuɽun ŋeno, anaṯeico eloŋu sukran bubruṯ, gi gwune nyalmapa ŋuɽuna ŋeḏi elo ŋun ŋidiŋɩnanyalo lagəri, nanyalməṯo, ŋate ŋiro gi ŋuɽun ŋeḏi liji no, nalmɩni ro gi ŋuɽun ŋun ŋiro gwerkwe ŋeḏi elo, ŋun ŋərrulo lagalo dino nyaŋa lun ləmɩnyu eloŋu.

¹⁴ gi gwune nyaŋa lɩmagəri, nyalaṯarre ŋuɽuna ŋun ŋaṯɩl kɩniso geḏi elo giro kajakaja arre gun gijo yauḏia gun gijo ḏi yecu kɩrisṯo; gi gwune nyaŋa dino nyalməṯi ḏɩdia gi liji lalo gi gwune apilɩne luŋə gi liju.

¹⁵ lun ilɽinyiḏi gwelɩnya gwun gwan yecu na nebɩŋa lagin dino, nujilirri ḏiḏagɩɽina ḏe. na luŋa laṯe liŋiri eloŋu ḏugwore no, nalikiḏiḏɩl liji le wei.

¹⁶ nijilakajo gi anuməḏɩjo liji lun liro ga dino, kani alkədəḏɩni ga, na dino nalṯɩmi ḏiḏuɽəḏɩno ḏeḏi ŋuɽun ŋagin ŋun ŋɩki. namɩni ḏɩɽeḏa ganu ḏɩmila lagin wɽi.

dapa ŋɩru ŋeḏi bulus gi liji lun lapo jawab

¹⁷ namɩni limagəri, gi gwune anḏuḏi ganu lagalo ŋwamon ŋwouwɩrio namɩni nyalro mino gi ḏugwor ḏəri, na jei jimijienyejo nyaŋaije.

¹⁸ na ḏino anəmɩnyu anarno anawila lagalo, i nyi gwan bulus gwun gwar gwaŋila lagalo ŋwamon ganu ŋwɩttən, namɩni seiṯan mijakajo.

¹⁹ gi gwune aŋ gwiro ḏiḏuḏɩnɩjo ḏəri i ḏidila ganu ḏəri, i laḏe ləri le ḏabupaḏa ganu? nyaŋa lədu leno gi jei ganu jeḏi gwele gwage gwun gwan yecu kɩrisṯo kaja ge ḏaɽuwa ḏuŋun na?

²⁰ gi gwune nyalro ḏabupaḏa ganu ḏəri na ḏidila ganu ḏəri.