1 kurinṯus 9 - ŋuɽun ŋun ŋiya ŋun ŋikaiilo elo 1966

asa 9 ḏəŋinio ḏeḏi bulus kɩniso gwate gwanape gwaŋ gwədi no, namɩni gwəṯi ŋɩma ŋulape

¹ na nyi gwate gwukədəḏɩnu ga na? na nyi gwate gwiro ḏuwəjo na? nyi gwate manaŋu gwelɩnya gwun gwan kɩrisṯo na? nya lədu leḏi ŋɩru ŋinyi kwele na?

² na ḏa nyi gwate maro ḏuwəjo gi liji liro kaja no, namɩni lagalo nyi wəjeje gwerkwe; gi gwune nyalro gi kaṯɩm gun gaŋiḏi ḏuwəjo ḏinyi kwele gwun gwiro elo.

³ na ŋuɽun ŋeno ŋiro ŋɩwəɽijile liji lun liḏeiji:

⁴ ŋate ŋiŋir lagəri anaʼe ki aneyu na?

⁵ ŋate ŋiŋir lagəri anape gwa gwun gwiro mage ḏi kɩrisṯo ŋiro gi gwune arrɩne duwəjo dun diro kaja, na lɩmegin leḏi gwele gwun gwan yecu na sapa na?

⁶ i barnaba na nyi kuwei ŋate ŋiŋir lagəri anouwɩrico ŋɩru ŋeḏi di na?

⁷ əḏi gwiro gwaṯape ŋɩru gi ajana naṯɩlmɩni ḏəḏə ŋɩdio ŋan gwulo gwuŋun? aḏi gwiro gwaṯɩgɩḏi jaɽe jun jiro gi ḏuɽuṯ ki atuiṯa nyaɽe nyeḏi jaɽe no? na əḏi gwiro gwun gwaṯiʼa juɽo naṯumɩni yo ŋan ŋeḏi juɽo no?

⁸ namɩni nyi gwuməḏi ŋuɽuna ŋeno ŋele ŋe ŋeḏi gwiji a? ŋuɽun ŋun ŋigelijɩlo elo musaŋ ŋate ŋaro dino na?

⁹ namɩni ŋulinu ŋuɽun ŋun ŋigelijɩlo elo musaŋ, aṯagakia ŋiḏrio gɩbɩle ḏa ŋɩmano ŋawuɽe ŋwona no. elo gwaṯɩdɩme nyɩḏrio a?

¹⁰ i ŋu gwaro dino gwan liŋə kuwei a? i, ŋulinu dino ŋan liŋə; gi gwune ŋu ŋgwun gwaṯɩkwuri arram gwaṯɩkwuri gi ḏiḏuḏɩnɩjo, namɩni ŋu gwun gwaṯuɽe arram gwaṯuɽe ŋi ḏiḏuḏɩnɩjo gwaʼe kal gete gi ḏɩwona.

¹¹ na ḏa anmakwoi lagalo ŋɩdio ŋeḏi gwuɽɩwə, na ŋuɽun ŋeno ŋɩbuḏo ḏa anamawone ŋɩdio ŋalo ŋeḏi jiŋɩno a?

¹² na ḏa liji lun liro kaja lɩmanduji ŋuɽuna ŋeno ŋun ŋɩdeleḏo lagalo, anate nəṯi ŋɩma ŋutəno na? namɩni anate naduji ŋuɽuna ŋeno no, namɩni ŋanalupini wutiwuti kani anate nangele ŋuɽuna ŋəḏi ŋun ŋakajo ŋujuna ŋiŋir ŋeḏi kɩrisṯo no.

¹³ nyaŋa late lilɩŋiḏi luŋa lun. laṯape ŋɩru ŋeḏi dunu gweḏi elo gwun gwubuḏo laṯeʼe ŋɩdio ŋeḏi dunu gweḏi elo gwun gwubuḏo na? na luŋa lun laṯape ŋɩru ŋeḏi lobo ləṯi ḏijaga kal gete kalo geḏi ŋɩdi ŋun ŋaṯɩlapaḏa gi lobo na?

¹⁴ na ŋiro dino gwele gwun gwiro elo gwugelɩjo liji ŋuɽuna, luŋa lun laṯuməḏɩjo liji ŋuɽuna ŋun ŋiŋir ŋeḏi yecu kɩrisṯo ləmɩḏe ŋuɽun ŋe ŋun ŋiŋir ŋeḏi yecu kɩrisṯo.

¹⁵ uamɩni ŋate ŋɩmalɩnduji ŋetɩdo ŋi loro leno no. namɩni ŋate ŋimɩniuli ŋeno kani alro lugwi dino no, na ŋiŋirano nyi gwaiyo aŋan gwiji gwete gwimuniduji ŋuɽuna ŋe ḏabupaḏa ganu ḏinyi kwɩḏon.

¹⁶ na ḏa nyi mumə ŋuɽuna ŋun ŋiŋir ŋeḏi yecu kɩrisṯo uamɩni ŋeno ŋate ŋəṯi ŋuɽuna ŋe ḏabupaḏa ganu no. gi gwune nyi gwiremeḏeṯɩnu, gi gwune ŋɩki lugwi ḏa late limiluməḏɩjo ŋuɽuna ŋiŋir ŋeḏi yecu kɩrisṯo no.

¹⁷ na ḏa nyi marre dino ḏiḏino ḏe ḏugwor nyi gwəṯi ḏɩbona; na ḏa ŋimalarre nyi gwate gwəmɩnyu no, namɩni nyi gwəṯi ŋɩru ŋiḏəḏɩuyilo kani ŋɩdɩme.

¹⁸ na dino ḏɩbona ḏinyi ḏɩrṯa? ḏiro ṯeno na ḏa nyi mumə ŋuɽuna ŋun ŋiŋir ŋeḏi yecu na nyi gwaduji ŋuɽuna ŋeno ḏiḏəḏo ga dino, kani ate induji ŋuɽuna wei ŋun ŋideleḏo lugwi ŋuɽun ŋun ŋiŋir ŋeḏi yecu kɩrisṯo no.

bulus gwəṯi ḏugwor ḏɩbuḏo gwagwuloḏɩjo liji kɩrɩsṯoŋ

¹⁹ gi gwune nyi gwate gwiro wainy kwiji gwədi no, nimɩni duji gwula gwinyi wainy gi liji wei, kani nyapa liji lutəno.

²⁰ na gi liju nyi maro gwiju kani nyiapa liju, na gi liji lun lijo ŋwara ganu ŋweḏi ŋuɽun ŋun ŋigelijɩlo elo musaŋ na nyi dino nyi gwijo ŋwara ganu ŋuɽun ŋeno, kani nyilapa lun lijo ŋwara ganu ŋweḏi ŋuɽun ŋun ŋigelijɩlo elo musaŋ.

²¹ na lun late lijo ŋwara ganu ŋweḏi ŋuɽun ŋun ŋigelijɩlo elo musaŋ no na nyi dino nyi gwate gwijo ŋwara ganu ŋuɽun ŋeno no—namɩni nyi gwate mədu ŋuɽun ŋun ŋigelijɩlo elo no, namɩni nyi gwijo ŋwara ganu ŋweḏi ŋuɽun ŋeḏi kɩrisṯo—kani nyilapa lun late lijo ŋwara ganu ŋweḏi ŋuɽun ŋun ŋigelijɩlo elo musaŋ no.

²² na gi liji lun lɩrebɩna nyi maro gi gwiji gwun gwirebɩna kani nyilapa lun lɩrebɩna. na nyi maro ŋɩdi wei gi liji wei, kani ŋuɽun ŋe wei lilkəḏə ga kworo.

²³ na nyi gwaduji ŋeno wei gwan ŋuɽun ŋun ŋiŋir ŋeḏi yecu kɩrisṯo, kani analije kal gete ŋuɽun ŋeno.

ḏibɩɽeḏa gi jei gi ḏiḏamɩḏa ḏe

²⁴ nya late lilɩŋiḏi liji lun laṯeneḏeṯe gi ḏidarana laṯeneḏeṯe wei namɩni gwete gwate gwaṯape ḏɩbona na? eneḏeṯɩl nyaŋa kani nyadarane.

²⁵ na wei lun laṯɩbule laṯɩməṯo lula lagin ŋuɽun wei. na luŋa laṯarre dino kani alape laḏe lun laṯɩdigɩɽe, namɩni nilarre kani ilape laḏe lun late laṯɩdigɩɽe no.

²⁶ namɩni nyi gwate gwaṯeneḏeṯe kaja no, na nyi gwate gwaṯɩpiḏe gi gwun gwaṯɩpi ḏɩronia no.

²⁷ namɩni nyi gwaṯɩpi aŋɩna yinyi bucu niduji wainy gwinyi, əri kəbe ḏa limiluməḏɩjo ŋuɽuna ŋiŋir ŋeḏi yecu kɩrisṯo liro kaja nyi gwate maro kwulo gwi madonyini no.