1 kurinṯus 8 - ŋuɽun ŋun ŋiya ŋun ŋikaiilo elo 1966

asa 8 ŋuɽun ŋe ḏiḏuga ḏeḏi liji lun liro ga dino

¹ na gwan ŋɩdi ŋun ŋaṯɩḏəḏini ŋɩdio ŋe ḏorṯeḏa; liŋə ililɩŋiḏi wei iləṯi ḏilɩŋeḏa. na dilɩŋeḏa ḏaṯɩbuṯiane gwiji kwulo gwuŋun, namɩni ḏəmɩnyo ḏaṯɩbɩɽi nanu.

² ḏa gwiji manuməḏɩni manarno gwilɩŋiḏi ŋuɽuna ŋədi, namɩni ŋu ŋore ŋate ŋimunilɩŋə gi gwune ŋideleḏo ŋullɩŋe no.

³ namɩni ḏa gwiji gwete manəmɩnyi eloŋu, ŋu malɩŋene ḏi elo.

⁴ na ŋiro dino ŋan ḏiṯa ŋɩdio ŋun ŋaṯɩḏəḏini ŋɩdio ŋe ḏorṯeḏa, na ilɩŋiḏi ŋɩdi ŋe ḏorṯeḏa ŋate ŋəṯɩn ŋuɽuna ŋədi kɩḏilio no, na elo gwatɩn gwede no, namɩni gwiro gwetɩdo kuwei.

⁵ na ḏa lɩmaje lun laṯɩl liji eico eloŋa, kanyin na kwɩnyəm, na gwerkwe eloŋa lo lutu, na lele lo lutu,

⁶ namɩni lagəri elo gwo gwetɩdo, na ŋu gwiro baba, na ŋɩdi wei ŋɩduḏi lugwun, na ilo lugwun, na gwele gwo gwetɩdo gwan yecu kɩrisṯo, na ŋu gwe ŋɩdi wei ŋila na ilo lugwun.

ḏidɩmiḏi ḏugwor ḏeḏi mage gwun gwirebɩna

⁷ namɩni liji wei late ləṯi ḏilɩŋeḏa ṯeno no. na kworo gi gwune gwerre laṯorṯeḏa ŋɩdio nalijɩre laṯarno ŋɩdi ŋun ŋaṯɩlɩne ganu ŋaṯɩlɩnḏoga ŋɩdio ŋe ḏorṯeḏa, na dugwor dagin dun direbɩna dɩmaro ŋɩrleḏ.

⁸ na ḏiṯa ḏate ḏijidirkaḏaica ḏi elo no; gi gwune na ḏa ŋɩmilʼe ilate laniŋirane no, na ḏa ŋate ŋɩmilɩnʼe no ilate lankene no.

⁹ jil muma əri kəbe a ŋuɽun ŋeno ŋun ŋaŋouwɩrico ŋaʼe ŋɩdio wei ŋwuro gi ḏobɩlkeja liji lun lɩrebɩna,

¹⁰ na ḏa gwiji gwədi maŋaŋu, ŋa gwun gwəṯi ḏilɩŋeḏa ŋa gwiṯi kwu dunu gwun gwatɩnorṯeḏa ŋɩdio, ŋu gwate gwidujini gwubɩɽe nanu kalo ge ḏugwor ḏuŋun gi gwune gwirebɩna, gwaʼe ŋɩdio ŋun ŋaṯɩḏəḏini ŋɩdio ŋe ḏorṯeḏa na?

¹¹ na ŋa gwaḏuji mage gi ḏilɩŋeḏa ḏuŋa gwun gwirebɩna gwun gwima kɩrisṯo eiijo.

¹² namɩni ḏa nyalmape ŋuɽuna ŋɩki dino gi lɩmagalo lalo nanyalmaki dugwor dagin dun direbɩna nyalmape ŋuɽuna ŋɩki ḏi kɩrisṯo.

¹³ na dino ḏa ŋɩdi ŋɩmaro ŋe ḏiṯa ŋɩmaḏuji magəri, nyi gwate gwanʼe jɩḏḏi ḏuṯ no kani nyate nyɩḏuji magəri no.