1 kurinṯus 6 - ŋuɽun ŋun ŋiya ŋun ŋikaiilo elo 1966

asa 6 ḏakɩmiḏa ḏeḏi lɩkɩrisṯin gi jei ganu jeḏi lele leḏi giḏilio

¹ ḏa gwete lagalo məṯi ŋuɽuna kwiji gwiro kaja gwun gwiro mage ŋa gwəṯi ḏibɩɽeḏa nanu ŋa gwele ŋicɩgia gi lele lun late liŋir no, na ŋate ŋa gele ŋuɽuna gi jei ganu jeḏi liji lun lɩpiḏo pɽul na?

² nya late lilɩŋiḏi nanyarno, liji lun lɩpiḏo pɽul laje lakɩmi gɩḏilio na? na ḏa gɩḏilio gɩmaje gɩmakɩmini nyaŋa gwe, nyaŋa late lɩdeleḏo nyalakɩmi ḏakɩmiḏa ḏun ḏɩtieno na?

³ nyaŋa late lilɩŋiḏi nanyarno, liŋə ilakɩmi liji leḏi kanyin na? namɩni ŋate ŋutəno ilakɩmi ŋuɽuna ŋe ḏɩmiḏa ṯeno na?

⁴ na ḏa nyalmaməṯo ḏakɩmiḏa ḏan ŋuɽun ŋe ḏɩmiḏa ṯeno nyaŋa lagele liji lun lɩtieno leḏi kɩniso alakɩmi a?

⁵ nyi gwuməḏi ŋuɽuna ŋeno kani ŋajilapi ḏare. gwerkwe, gwate gwete lagalo gwəṯi ŋadɩgɩɽenya gwun gwəṯi ŋɩma gwakɩmiḏe gi lɩmegin na?

⁶ namɩni megin akɩmi megin, na ŋeno gi jei ganu jeḏi liji lun late ləmɩnyu eloŋu no.

⁷ namɩni ŋuɽun ŋeno ŋun ŋɩki ŋimajiḏami wɽi, gi gwune nya ləṯi əcərio ŋɩmaga lagaloŋu. gwudaro gəko nate naṯanyouwɩrico lajərrɩjo ŋuɽuna ŋɩki no? gwudaro gəko nate nanyanouwɩrico lajɩnirdeijo ganu no?

⁸ namɩni nyaŋa gi lulo lalo laṯape ŋuɽuna ŋɩki nanyape ŋwuɽama, na ŋeno gi lɩmage.

⁹ nyaŋa late lilɩŋiḏi nanyarno leno lun lɩki late laɽenyeḏe ŋele ŋeḏi elo na? nya lo laḏuḏe ŋuɽuna ganu ŋun ŋiro gwerkwe, gi gwune lun laṯuriḏe ga dino, i lun laṯorṯeḏa ŋɩdio, i lun liro leḏor, i lun laṯɩgele ŋuɽuna ŋɩki gi jiŋɩno jagin lun laṯɩwɩrliḏe ga liro ləmɩnyo,

¹⁰ i luɽam, i lun lɩdeleḏeje ganu, i lun laṯɩrləle, i lun laṯɩḏenɩḏi, i lun laṯenya liji, late laɽenyeḏe ŋele ŋeḏi elo no.

¹¹ na kworo lagalo liro dino gwerre; namɩni ŋeno ŋɩmanyalwei gi lulo lalo, nanyalmaro lɩpiḏo pɽul, nanyalmədujini liŋir jiri je jeḏi gwele gwun gwan yecu kɩrisṯo, na gwuɽɩwə gwe gweḏi elo gwage.

ŋɩrleḏ na ŋuɽun ŋeḏi lɩkɩrisṯin ŋate ŋɩgakɩnu berene no

¹² ŋɩdi wei ŋiŋir lugwi, namɩni wei ŋaṯe ŋideleḏo lugwi no, na ŋɩdi wei ŋiŋir lugwi namɩni nyi gwate gwəmɩnyu gwaro wainy gweḏi ŋɩdi ŋetɩdo no.

¹³ ḏiṯa ḏigelɩnu ḏan gare na gare gan ḏiṯa; namɩni lai elo eti berene. namɩni aŋɩnu yate yan ḏura no, numɩni ro yeḏi gwele gwun gwiro elo, na gwele gweḏi aŋɩnu.

¹⁴ na elo gwidiɽi gwelɩnya gwun gwan yecu na gwajidiɽi dino ŋɩma ŋe ŋuŋun.

¹⁵ nya late lilɩŋiḏi nanyarno jiŋɩno jalo jiro ŋɩdi ŋeḏi kɩrisṯo na? na ŋiro dino nyi gwapo ŋɩdio ŋeḏi kɩrisṯo ŋilduji ŋɩdi ŋeḏi gwa gwun gwimɩɽiḏi jei ganu a? awe, ŋate ŋaro dino ḏuṯ no.

¹⁶ na nya late lilɩŋiḏi gwiji gwun maṯiḏil ganu gwa gwe gwun gwimɩɽiḏi jei ganu liro aŋɩnu yetɩdo na? gi gwune gɩḏam geḏi elo garno, lɩttən leno alro aŋɩnu yetɩdo.

¹⁷ namɩni gwun maṯaḏo kwele gwun gwiro elo liro gwuɽɩwə gwetɩdo.

¹⁸ abɩrɩl ŋeḏor. ŋuɽun wei ŋun ŋɩki ŋun ŋaṯɩl gwiji duji ŋiro kaja kaŋɩnu, namɩni gwun gwaṯure gwaṯape ŋuɽuna ŋɩki kaŋɩnu yuŋun.

¹⁹ nya late lilɩŋiḏi nanyarno, jiŋɩno jalo jiro dunu gweḏi gwuɽɩwə gwun gwɩpiḏo pɽul gwun gwaṯɩje lagalo, gwun gwəṯənya ḏi elo, na nyaŋa ŋədu ŋeḏi lulo lalo na?

²⁰ gi gwune nyaliḏɩnu jili je, na ŋiro dino buḏɩl eloŋu gi jiŋɩno jalo.