1 kurinṯus 5 - ŋuɽun ŋun ŋiya ŋun ŋikaiilo elo 1966

asa 5 ŋuɽun ŋɩki kɩniso ganu ŋeḏi ŋeḏor gworki

¹ ŋuɽun ŋɩwiḏi ŋarno, ŋeḏor ŋo lagalo, na ŋeḏor ŋun ŋate ŋijo gi liji lun liro ga dino no, na gwiji gwəṯi gwa gweḏi baba gwuŋun.

² na nyalbuḏi lula lalo, na ŋate ŋiŋireḏo lagalo nyalarone na? iril gi jei ganu lagalo ŋu gwun gwiduji ŋuɽuna ŋeno.

³ na nyi gwate lagalo kaŋɩnu no, namɩni gwo gwuɽɩwə gwe, na nyi gwiakɩmi wɽi gwiji gwun gwarro ŋuɽuna ŋeno ŋiro gi gwune nyi gwijo,

⁴ gi jiri jeḏi gwele gwage gwun gwan yecu, nyalaje kal gete gwuɽɩwəŋale gwi, na ŋɩma ŋe ŋeḏi gwele gwage gwun gwan yecu,

⁵ nyəḏəḏə seiṯanŋ gwiji kweno, kani a aŋɩnu keḏe ga, na gwuɽɩwə gwuŋun kədəḏɩni ga gi lamon leḏi gwele gwun gwan yecu.

⁶ ḏabupaḏa ganu ḏalo ḏate ḏiŋir no, nya late lilɩŋiḏi jɩduɽə jɩti jaṯuli jilo wei na?

⁷ mujɩl jɩduɽə lagalo wɽi jun juɽun kani nyaro jilo jun jiya, ŋiro gi gwune nya late ləṯɩn jɩḏuɽə gwunnɩno no; gi gwune kɩrisṯo gwuḏuginjije gwun gwiro lrəmə leḏi gɩmuri ge ḏouwɩrico.

⁸ na ŋiro dino ildɩme gɩmuri go garo jɩduɽu jun juɽun, i je ḏikino maga, i ŋeḏi ŋuɽun ŋun ŋɩki gworki no, ŋwumɩro gia ge gun gate gigelɩnu juduɽə no geḏi ŋuɽun ŋun ŋiŋir na ŋun ŋiro gwerkwe.

⁹ nyi gwulijaje jawab jinyi nya lo laje kal gete liji le lun laṯuriḏe ga dino,

¹⁰ namɩni nyi gwate gweiceijɩno, arram nyalouwɩrico wɽi ŋuɽuna lijiŋale lun liro leḏor leḏi gɩḏilio keno, i lun lɩdeleḏeje ganu no, i lun liro luɽam, na lun laṯorṯeḏa ŋɩdio no, gi gwune ḏa ŋɩmaro dino ŋa gwədu kɩḏilio keno.

¹¹ namɩni nyi gwulijaje nya late lajaḏaṯa kal gete ḏa gwiji maje gwete gwun gwaṯɩleico mage naṯumɩni ure, i gwaṯɩdela ŋɩdio ganu, i gwaṯorṯeḏa ŋɩdio, i gwun gwaṯɩḏenɩḏi, i gwun gwaṯɩrləle, i gwun gwiro gwuɽam, na nya late leʼe gwijiŋale gwun gwiro dino no.

¹² gi gwune nyi gwəṯi ŋuɽuna ŋɩra nilakɩmi lun liro kaja? namɩni nya late lanyalakɩmi lun lijo gɩdəno kɩniso na?

¹³ namɩni lun lijo kaja lai elo akɩmi. dil lagalo gwiji kweno gwun gwɩki.