1 kurinṯus 4 - ŋuɽun ŋun ŋiya ŋun ŋikaiilo elo 1966

asa 4 ŋɩru ŋeḏi duwəjo ḏi elo

¹ ouwɩricil gwiji ŋwijiḏuɽə anaŋaije andro jaḏam jeḏi kɩrisṯo na lɩwəkil leḏi ŋuɽun ŋun ŋɩlɩbo ŋeḏi elo.

² na ŋutəno kworo kweno liji laṯɩbunyi lɩwəkilo nalape ŋɩru ŋiŋir ŋɩḏuḏɩnu ga.

³ na ŋeno ŋɩti lugwi ḏa nyalmar liakɩmi, i nyi gwakɩmini ḏakɩmiḏa ḏe ḏeḏi liji; namɩni dino nyi gwate gwaṯakɩmi gwula gwinyi no.

⁴ gi gwune nyi gwate gwilɩŋiḏi ŋɩdio ŋun ŋar ŋiliniakɩmaje no, namɩni ŋuɽun ŋeno ŋate ŋɩmɩnyiduji gwiŋir no, namɩni ŋu gwun gwiakɩmi gwele gwiro gwun gwiro elo.

⁵ na ŋiro dino aṯanyakɩmiḏa ŋuɽun ŋədi kaja gore no, kəbe na gwele wila gwun gwaṯoɽa ŋɩdio ŋun ŋaṯɩlɩbɩjini ŋeḏi girɩm, na ŋwulaŋiḏi ŋeḏi dugwor ḏeḏi liji, na kaja kono gwete gwete gwape ḏɩbuḏia ḏuŋun ḏi elo.

⁶ lɩmagəri, nyi gwarno ŋɩdi ŋeno wei ŋiro gi ŋuun ŋan gwulo gwinyi na abulus gwan nyaŋa, kani anaŋale nyalalɩmini ŋo ŋanyanbaḏaice kworo ganu kweno gwun gwulinu, na gwo gwete gwanbuḏi gwula gwuŋun gwan loro.

⁷ əḏi gwiro gwugelaŋa nabuṯane kworo gwiro kaja? namɩni ŋa gwəṯi aŋe ŋun ŋate ŋɩmalape no? na ḏa ŋɩmalape gwudaro gəko nabuḏi gwula gwuŋa gi ŋate ŋɩmalape no?

⁸ nyalmape wɽi, nyalmuti ḏɩbona wɽi, nyalmaro lele wɽi kaja anate. na nyi gwəmɩnyu ḏa ŋɩmaro gwerkwe nyalmaro lele kani anaro dino lele nyaŋaŋale.

⁹ gi gwune nyi gwuməḏɩnu niarno, elo mijiaŋini gɩdo ŋi liji wei anaŋa lun liro duwəjo, gi liji lun laṯakɩmini ḏaiya ḏe, gi gwune anaŋa laŋinu gi jei ganu gi ḏaiiḏa ga kɩḏilio, gi liji leḏi kanyin na leḏi gɩḏilio.

¹⁰ anaŋa liro jɩɽilo gwan kɩrisṯo; namɩni nyaŋa liro lun ləṯi ŋadɩgɩɽenya ḏi kɩrisṯo. anrebɩna, namɩni nyalbɩɽe nanu. nyaŋa laṯajinəji namɩni anaŋa laṯijiabɩlaṯe.

¹¹ i kəbe na gwunnɩno anaŋa liro jaŋu na ouḏo, nanjiga ŋɩmuɽino, nanəpini di de, anate nəṯi gala muma gananije no.

¹² nanartonyɩḏe gi ḏapa ŋɩru di de dəri, na ḏa anməḏenini nanalmora lun liḏenije; na ḏa lɩmijɩnḏagɩɽini nannamɩni ape ḏɩməṯo ḏe ḏugwore;

¹³ na ḏa lɩmijɩnḏene nanalwɩrlijo mɩce, anaṯɩro ŋwuṯə ŋweḏi gɩḏilio na ŋɩrleḏ ŋeḏi ŋɩdi wei kəbe gwunnɩno.

bulus gwuməḏɩjo liji leḏi kɩniso gi baba

¹⁴ nyi gwate gwulijaje ŋuɽuna ŋeno kani ŋwajiləpijo ḏare no, namɩni ŋiro gi nyaɽe nyinyi nyun nyəmɩnyɩlo ŋajiŋgɩreṯɩnya.

¹⁵ gi gwune ḏa nyalməṯi liji lun lajɩdɩme alɩb di ḏi kɩrisṯo namɩni nyalmete babaŋaije lutu, gi gwune nyi majilɩŋe ḏi kɩrisṯo ŋuɽun ŋe ŋun ŋiŋir ŋeḏi yecu kɩrisṯo.

¹⁶ na ŋiro dino nyi gwaɽoṯeḏe lagalo gworki nyarre gi nyi ŋuɽun ŋe.

¹⁷ na gwan ŋuɽun ŋeno nyi wəḏɩjeje ṯimuṯawusŋ, gwun gwiro ŋaɽe ŋinyi ŋun ŋəmɩnyi na ŋiŋir ŋɩḏuḏɩnu ga kwele gwun gwiro elo, ŋun ŋaṯajaḏɩŋəni gwan daṯ ḏinyi ḏi kɩrisṯo gi gwune aṯɩlalɩmi kalo wei kɩniso ganu wei.

¹⁸ namɩni liji kworo nalbuḏi lula lagin, nalarno nyi gwate gwar gwila lagalo no.

¹⁹ namɩni nyi gwila lagalo cou ḏa gwele məmɩnyi gwun gwiro elo; na nyi gwalɩŋe ŋuɽuna ŋədu ŋeḏi luŋa lun labuḏi lula lagin no, namɩni ŋɩma ŋagin.

²⁰ gi gwune ŋele ŋeḏi elo ŋədu ŋeḏi ŋuɽun no, namɩni ŋeḏi ŋɩma.

²¹ namɩni nyalbunyaŋe? nyalbunyu nyi gwila ṯuwa ḏe, i ḏəmɩnyo ḏe na gwuɽɩwə gwe ḏouwɩrəno a?