1 kurinṯus 3 - ŋuɽun ŋun ŋiya ŋun ŋikaiilo elo 1966

asa 3 bulus gwakɩmi ḏɩkenyɩḏiḏio ḏe ganu

¹ na dino lɩmagəri, nyi gwate gwəṯi ŋɩma gwajuməḏɩjo gi liji lun ləṯi gwuɽɩwə no, namɩni gi liji leḏi jiŋɩno kuwei, na gi nyaɽe nyun nyitinyiti ḏi kɩrisṯo.

² nyi gwajici ŋan, ŋate ŋiro gia gun gibɩɽe no; gi gwune nya late ləṯi ŋɩma ganyaʼe no, i na nyajɩre late ləṯi ŋɩma no.

³ gi gwune nya lore liro lɩwainy leḏi jiŋɩno; na ḏa ŋɩmajɩre lagalo ŋe ḏɩɽeḏa ganu kwiji, na ḏɩbereḏa, nya late lore liro lɩwainy leḏi jiŋɩno, na ŋore ŋaṯanyalarre gi liji na?

⁴ na ḏa gwete marno, nyi gweḏi bulus gwiro, na gwete marno, nyi gweḏi abulus gwiro, nya late liro liji kuwei na?

⁵ na dino abulus gwiro gwura? na bulus gwiro gwura? nalro jaḏam jun jəmɩnyanyaje kuwei gi gwune ḏəḏɩlo gwele gwun gwiro elo gwete gwete.

⁶ nyi gwaṯɩkwoi, namɩni abulus gwaṯici, namɩni elo gwaṯɩbuḏi.

⁷ na ŋiro dino gwun gwaṯɩkwoi gwate gwəṯi ŋuɽuna no, na gwun gwaṯici dino, namɩni elo gwiro kuwei gwun gwaṯɩbuḏi.

⁸ na gwun gwaṯɩkwoi na gwun gwaṯici liro letɩdo, na luŋa gwete gwete gwaṯape ŋɩdio ŋeḏi ŋɩru ŋuŋun.

⁹ na liŋə ilro laṯape ŋɩru eloŋale; na nyalro ḏɩri ḏeḏi elo, na ḏuṯa ḏeḏi elo.

ŋɩru ŋeḏi limualɩm

¹⁰ na ŋiro gi gwune ḏiŋiriḏa ḏeḏi elo ḏun ḏiḏəḏɩnyi gi gwiji gwe ḏuṯa gwun gwəṯi ŋadɩgɩɽenya, nyi gwugelo gama na gwiro kaja gwunoṯa elo. namɩni ouwɩricil gwete gwete nuje muma galakwe gwunoṯa elo.

¹¹ gi gwune gwiji gwate gwede gwangele gama giro kaja kworo kweno gwun gwugelɩnu no, na keno yecu kɩrisṯo gwiro.

¹² namɩni ḏa gwiji gwədi manoṯa kama elo keno ḏab ḏe, i baḏa gwe, i nyɩdol nye nyun nyutu jilɩnya, i jɩbur je, i ṯiru ḏe, i ŋwubora ŋwe,

¹³ ŋɩru ŋeḏi gwiji gwete gwete ŋaṯɩlɩŋini. gi gwune lamon leḏi elo laje laŋino, namɩni lar laŋino igo ye, na igo yiḏeije ŋɩru ŋeḏi gwete gwete ŋulaŋu ŋiro ŋɩra.

¹⁴ na ḏa ŋɩru ŋeḏi gwete ŋa ŋimiḏəḏɩni ŋimajaḏaṯa ŋun ŋuṯulo kama elo keno, na gwape ŋɩdio ŋuŋun.

¹⁵ namɩni ḏa ŋɩru ŋeḏi gwete ŋɩmanuni ŋumagereḏe ga, namɩni ŋu kwulo gwuŋun makədəḏɩni ga, namɩni gi gwune mobɩḏini kigo.

¹⁶ nya late lilɩŋiḏi na nyarno nyalro dunu gweḏi elo, na gwuɽɩwə gweḏi elo gwajaḏaṯa lagalo na?

¹⁷ na ḏa gwiji maki duno gweḏi elo, na gwa elo ki dino, gi gwune dunu gweḏi elo gwɩpiḏo pɽul, na nyaŋa liro dunu kweno.

¹⁸ aṯanyanouwɩrico gwete gwirdeijo gwula gwuŋun ganu no. na ḏa gwete lagalo manarno gwəṯi ḏilɩŋeḏena kɩḏilio keno, ouwɩricil ŋwuro gɩɽilo kani ŋwəṯi ḏilɩŋeḏena.

¹⁹ gi gwune ḏilɩŋeḏena ḏeḏi gɩḏilio keno ḏiro ŋɩɽilo gi jei ganu jeḏi elo, gi gwune ŋulinu, ŋu lulməṯo lun ləṯi ḏilɩŋeḏena ḏirdeijo ganu ḏe ḏagin,

²⁰ na dino, gwele gwilɩŋiḏi ḏuməḏɩno ḏeḏi liji lun ləṯi ḏilɩŋeḏena ḏiro ga jai.

²¹ na ŋiro dino aṯanyouwɩrico gwete gwabupaḏe ganu gi liji no, gi gwune ŋɩdi wei ŋalo ŋiro,

²² na ḏa bulus maro, i abulus, i sapa, i gɩḏilio, i ḏɩmiḏa, i ḏaiya, i ŋɩdi ŋun ŋijo, i ŋun ŋila, ŋɩdi wei ŋalo ŋiro,

²³ na nyaŋa leḏi kɩrisṯo liro, namɩni kɩrisṯo gweḏi elo gwiro.