1 kurinṯus 2 - ŋuɽun ŋun ŋiya ŋun ŋikaiilo elo 1966

asa 2 ḏilɩŋeḏa jei je na ḏilɩŋeḏena ḏi elo

¹ namɩni nyi, lɩmagəri, gwune wiḏi lagalo, nyi wiḏi nyi gwajuməḏɩjo ŋuɽuna ŋiŋir ŋeḏi elo nyi gwate gwuməḏi ŋuɽuna ŋe ḏolenelo i ŋe ḏilɩŋeḏena no.

² gi gwune nyi məṯəḏi ŋuɽuna gi ḏugwor ganu ḏinyi nyi gwate gwilɩŋiḏi ŋuɽuna ŋete lagalo no, namɩni yecu kɩrisṯo kuwei na ŋu gwuɽinyinu gi luɽi lun lɩmalɩḏo ganu.

³ na ilijo gi ḏɩmumɩḏa na ŋɩḏe na gi ḏubəga gworki.

⁴ na ŋuɽun ŋinyi na ḏuməḏɩjo liji ḏinyi ŋuɽun ŋun ŋiŋir ŋeḏi yecu kɩrisṯo ḏate ḏiro ŋuɽun ŋe ŋe ḏilɩŋeḏena ḏeḏi gwiji ŋun ŋaṯɩgwuloḏa no, nalmɩni aŋini gwuɽɩwə gwe gwun gwɩpiḏo pɽul na ŋɩma,

⁵ kani a ḏɩməṯo ḏalo ḏo ḏəḏuḏɩni ḏilɩŋeḏena ḏe ḏeḏi liji, ŋumɩnje ŋɩma ŋe ŋeḏi elo.

⁶ namɩni anaṯumə ḏilɩŋeḏena ḏe gi liji lun luɽun ḏɩməṯo ḏe, namɩni ḏəḏu ḏeḏi gɩḏilio keno no, i ḏeḏi lele leḏi gɩḏilio keno lun lete no.

⁷ namɩni anaṯumə ḏilɩŋeḏena ḏe ḏeḏi elo ḏun ḏilɩbiḏɩnu, i ḏun ḏilɩbiḏɩnu, ḏun ḏarḏe elo no ḏigelu gwerre ganu gwate magele gɩḏilio no gi ḏoɽeḏa ḏage,

⁸ na ŋuɽun ŋeno ŋate ŋan gwete gweḏi lele leḏi gɩḏilio keno lɩŋe no; na ḏa ŋilɩŋiḏɩlo late laŋaɽinye gwelɩnya gwe ḏoɽeḏa gi luɽi lun lɩmalɩḏo ganu no.

⁹ namɩni ŋiro gi gwune ŋulinu, na ŋɩdi ŋun ŋate ŋɩmal jei aŋu, i ŋɩmal nəni diŋɩni no, i ŋun ŋate ŋɩmanəḏi gi ḏugwor ganu ḏeḏi gwiji no, ŋeno ŋɩmal elo kəḏəḏəṯɩjo luŋaije ga lun ləmɩnyu.

¹⁰ na ŋɩmijil elo aŋijo gwuɽɩwə gwe gwuŋun, gi gwune gwuɽɩwə gwaṯɩbunyi ŋɩdio wutiwuti, i ŋɩdi ŋun ŋate ŋəṯi ŋɩma ŋal liji lɩŋe ŋeḏi elo no.

¹¹ gi gwune əḏi gwiro gi liji gwilɩŋiḏi ŋuɽuna ŋeḏi gwiji namɩni gwuɽɩwə gweḏi gwiji gwiro gwun gwaṯɩje lugwun? na ŋiro dino gwatɩn gwetɩdo gwilɩŋiḏi ŋɩdio ŋeḏi elo no, namɩni gwuɽɩwə gwun gwɩpiḏo pɽul gweḏi elo kuwei.

¹² namɩni ilate ilmaməṯo gwuɽɩwə gweḏi gɩḏilio no, namɩni ilmaməto gwuɽɩwə gweḏi elo, kani ilɩŋe ŋɩdio ŋun ŋiḏəḏijɩlo elo ga dino.

¹³ na ŋɩdi ŋeno ŋaṯɩlŋumə dino, ŋədu ŋeḏi ŋuɽun ŋun ŋaṯɩjalɩmi ḏilɩŋeḏena ḏe ḏeḏi gwiji no, numɩni ro ŋuɽun ŋun ŋalɩmilɩlo gwuɽɩwə gwun gwɩpiḏo pɽul, liliwɩrlijo ŋɩdio ŋeḏi gwuɽɩwə lun ləṯi gwuɽɩwə.

¹⁴ namɩni gwiji gwun gwate gwilɩŋinu gwuɽɩwə gwe no, gwate gwaṯəmɩnyi ŋɩdio ŋeḏi gwuɽɩwə gweḏi elo no, gi gwune nalro ŋɩɽilo lugwun, na gwate gwəṯi ŋɩma ŋwullɩŋe no, gi gwune ŋilɩŋinu gwuɽɩwə gwe.

¹⁵ namɩni gwiji gwun gwəṯi gwuɽɩwə gwun gwɩpiḏo pɽul ŋwiḏeije ŋɩdio wei, namɩni ŋu kwulo gwuŋun gwate man gwiji iḏeije gwetɩdo no.

¹⁶ namɩni əḏi gwiro gwilɩŋiḏi ŋadɩgɩɽenya ŋeḏi gwele gwun gwiro elo kani ŋwunalɩmi? namɩni lɩŋə iləṯi ŋədɩgɩɽenya ŋeḏi kɩrisṯo.