1 kurinṯus 16 - ŋuɽun ŋun ŋiya ŋun ŋikaiilo elo 1966

asa 16 ḏɩwəɽeico ŋɩdio ldu gwan liji lun late ləṯi ŋɩdio no urucəlim

¹ na gwan ḏɩwəɽəṯɩjo ŋɩdio ldu gwan liji lun lɩpiḏo pɽul, aṯanyalarre gi gwune uməḏɩjine kɩniso wei geḏi galaṯia.

² gi lamon lun liro lɽa lun laduji loro kwoɽoṯəɽɩl, aṯi gwete gwete lagalo gele ŋɩdio kaja ŋiro gi gwune ŋəṯi ḏibəḏəṯɩjo kani ḏa nyi mila ŋate ŋaro ḏɩwəɽeice ldu no.

³ na gwune niwila, luŋa lun lidilianyalo lilwəje jawab je alape ḏiḏəḏo ḏalo urucəlim.

⁴ na ḏa ŋɩmadeleḏe nyi gwele dino ilwele kal gete. ŋuɽun ŋeḏi bulus na ḏisalɩmia ḏeḏi gɩdo

⁵ na nyi gwila lagalo gwune niwele kɩlɩgi ganu makɩḏunia, gi gwune nyi gwar gwele makɩḏunia;

⁶ namɩni gwəti nyi gwaje lagalo ŋwamon ŋwouwɩrlo, i ḏoɽom ḏe, kani nyilgele gi ṯaṯ kalo gun ginele.

⁷ namɩni nyi gwate gwar gwajaŋu ḏa nyi mar gwadare no; gi gwune nyi gwuḏuḏɩnu nyi gwaŋajiga lagalo ŋwamon ŋwədi ḏa gwele məmɩnyi gwun gwiro elo.

⁸ namɩni nyi gwajiga awɩsus kəbe gi lamon leḏi ḏuɽi ṯoḏɩne;

⁹ gi gwune liminyɩḏijo ouwɩr yɩbuḏo gworki ye ḏapa ŋɩru ŋun ŋapa nyaɽe nyun nyutu, namɩni lo lutu lun lɩkiḏiḏɩle.

¹⁰ na ḏa ṯimuṯawus mila, dɩmiḏɩl gwanyalɩje lagalo gwate gwəṯɩn ŋɩḏe no, gi gwune gwaṯape ŋɩru ŋeḏi gwele gwun gwiro elo gi nyi dino.

¹¹ na dino gwo gwanyaouwɩrico gwete gwunabɩlaṯe, numɩni gele gi ṯaṯ ḏouwɩɽiḏa ḏe kani ŋwila lugwʼi, gi gwune liḏuḏɩnijɩlo lɩmage le.

¹² namɩni gwan abulus gwun gwiro magəri, nyi gwuɽoṯeḏo lugwun gworki gwaŋila lagalo lɩmage le; namɩni gwate gwəmɩnyu ḏuṯ gwar gwila gwunnɩno no, namɩni gwila lamon lun liŋir.

¹³ dɩmenil ga, nyaḏuḏɩni muma ḏɩməṯo ḏe, nyaro ləmɩnyo, nyabɩɽe nanu.

¹⁴ arrɩlo wei ŋun ŋanyalarre ḏəmɩnyo ḏe.

¹⁵ na nyi gwuɽoṯeḏo lagalo gworki lɩmagəri, nyalilɩŋiḏi liji leḏi dunu gweḏi isṯipanas, galakwe nalro lun lɩməṯi ḏɩməṯo gwerre akaia, nalgele ŋwuɽa ŋwagin naṯɩləpijo liji ŋɩru lun lɩpiḏo pɽul;

¹⁶ dɩtienɩl lula lalo gi liji lun liro ḏino, na wei gwete gwete gwun gwilape ŋɩru, na gwaṯape ŋɩru muma.

¹⁷ nyi gwadile ganu gi gwune isṯipanas, na purtunatus, na ikaiikus lɩmila lugwi liməbio ḏijaga kal gete ḏalo ḏun ḏaṯɩlḏijiga limaɽenyeḏe.

¹⁸ gi gwune luga lɩmawiḏiga gwuɽɩwə gwe gwinyi na gwalo dino, lɩŋiḏɩl liji liro gi gworo nanyarno lɩdeleḏo.

¹⁹ kɩniso giro kajakaja geḏi asia gisalɩmiaje. akilaŋa birisɩkila gwe lo lisalɩmiaje kwele gwun gwiro elo gworki, na kɩniso gun gijo kwu dunu gwagin.

²⁰ lɩmage wei lisalɩmiaje. salɩmiḏɩl ŋɩmaga lagaloŋu ḏɩmɩɽəḏo ḏe ḏeḏi liji lun lɩpiḏo pɽul.

²¹ nyi gwan bulus gwo gwulijeje ḏisalɩmia ṯeno ḏi ḏe ḏinyi.

²² ḏa gwete gwate məmɩnyi gwelɩnya gwun gwan yecu kɩrisṯo no ŋu gwiḏenɩnu. gwele gwila gwun gwiro elo.

²³ ḏiŋiriḏa ḏeḏi gwele gwun gwan yecu kɩrisṯo gwanyalije.

²⁴ ḏəmɩnyo ḏinyi ḏanyalije wei ḏi yecu kɩrisṯo. gwerkwe.