1 kurinṯus 15 - ŋuɽun ŋun ŋiya ŋun ŋikaiilo elo 1966

asa 15 ḏidiɽo ḏeḏi kɩrisṯo

¹ na lɩmagəri, nyi gwilɩŋiḏaje ŋuɽun ŋun ŋiŋir ŋeḏi yecu kɩrisṯo ŋun ŋuməḏɩjejilɩŋe ŋanyalməṯo, na ḏɩməṯo ḏalo məṯini ga dino,

² na ŋuɽun ŋe ŋeno dino eyaləkədəḏɩni ga, ḏa eyalmaməṯəḏə ŋuɽuna ŋun ŋuməḏɩjejilɩŋe, na ḏa nya late lɩməmɩnyi ga jai no.

³ gi gwune nyi gwiḏəḏaje gwerre ŋuɽun ŋun ŋɩməṯilo dino, kɩrisṯo gwɩmai gwan ŋuɽun ŋage ŋun ŋɩki, ŋiro gi gwune arne gɩḏam geḏi elo,

⁴ nukwurini, nudiɽi gi lamon lun laduji loro ṯəɽɩl ŋiro gi gwune arne gɩḏam geḏi elo,

⁵ nuaŋinijo sapaŋ, na gɩdo gi calɩmis jun jiro ḏi na gwuttən,

⁶ nuaɽu nuaŋinijo lɩmage lutəno jɩnei ṯoḏɩne lamtɩdo, na lutəno lagin lore lɩmiḏo, namɩni kworo lɩmai;

⁷ nuaɽu nuaŋinijo yagubŋ, na duwəjo wei;

⁸ na gɩdo ganu nuŋwiaŋinijo dino, ŋiro gi gwete gwun gwilɩŋinu gwate məṯɩmi gaja guŋun no.

⁹ na nyi gwiro gwun gwɩtieno gi duwəjo wei, na nyi gwate gwɩdeleḏo gworniḏini ḏuwəjo no, gi gwune nyi gwaṯɩḏagɩɽini kɩniso geḏi elo.

¹⁰ namɩni ḏiŋiriḏa ḏe ḏeḏi elo nyi maro gi gwunnɩno, na ḏiŋiriḏa ḏuŋun ḏun ḏiḏəḏɩnyi ḏate ḏiro jai no, namɩni nyi gwapano ŋɩru ŋutəno luŋa wei, namɩni nyi gwədu no, namɩni ḏiŋiriḏa ḏeḏi elo ḏiro ḏun ḏijanaḏe.

¹¹ na ŋiro ŋetɩdo, na ḏa nyi maro i luŋa, na ŋuɽun ŋeno ŋiro ŋun ŋaṯanalumə na ŋun ŋanyaŋəmɩnyi.

ḏidiɽo ḏeḏi liji lun laiyo

¹² namɩni ḏa kɩrisṯo muməḏene ŋu gwidiɽu gi liji lun laiyo, na galakwe kworo lagalo laṯarno ḏidiɽo ḏate ḏeḏi lun laiyo no?

¹³ na ḏa ḏidiɽo ḏate ḏeḏi liji lun laiyo no, na dino kɩrisṯo gwate gwaŋadiɽi no;

¹⁴ na ḏa kɩrisṯo gwate madiɽi no, namɩni ḏuməḏo ḏəri ḏaŋaro ga jai, na ḏɩməṯo ḏalo dino ḏaŋaro ga jai;

¹⁵ na dino anaŋa laŋini laṯumə ŋɩwɩɽɩgala ŋan elo, gi gwune anteijo ga di elo anarno ŋu gwidiɽi kɩrisṯoŋ; namɩni gwate mudiɽi no ḏa ŋɩmaro dino liji lun laiyo late laŋadiɽi no.

¹⁶ na ḏa liji late lɩmaḏiɽi lun laiyo no, na kɩrisṯo gwate madiɽi no;

¹⁷ na ḏa kɩrisṯo gwate madiɽi no, na ḏɩməṯo ḏalo ḏaŋaro ga jai, nyaŋa lore ŋuɽun ganu ŋalo ŋun ŋɩki.

¹⁸ na dino lun laiyo ḏi kɩrisṯo lɩmai gi gɩḏilio.

¹⁹ na ḏa ilməṯi ḏiḏuḏɩnɩjo ḏi kɩrisṯo gi ḏɩmiḏa ṯeno kuwei namɩni ilmaro liji lun lɩḏimiḏɩnəno gi liji wei.

²⁰ namɩni kɩrisṯo madiɽi gi liji lun laiyo nuro ḏɽa ḏeḏi liji lun laiyo.

²¹ na gi gwune ḏaiya ḏɩmila gwiji gwe, na dino ḏidiɽo ḏe liji lun laiyo ḏɩmila gwiji gwe.

²² na ŋiro gi gwune ḏi adam liji lai wei, na ŋiro dino liji wei ləmɩḏe ḏi kɩrisṯo.

²³ namɩni gwete gwete kalo guŋun, kɩrisṯo gwiro ḏɽa, na gɩdo ganu liji lun leḏi kɩrisṯo gi ḏaɽuwa ḏuŋun

²⁴ na ŋɩno ŋila kaja ge gɩdo, gwune nuḏəḏə eloŋu ŋelɩnya gwun gwiro baba, na gwune nueti ŋelɩnya wei na ŋɩma wei.

²⁵ gi gwune arram gwuməṯi ŋelɩnya kəbe nugele liji lun lɩkiḏiḏɩle gelio ŋwara ganu ŋwuŋun.

²⁶ na ḏikiḏiḏia ḏun ḏiro gɩdo ḏun ḏete ḏiro ḏaiya.

²⁷ gi gwune elo gelo ŋɩdio wei gelio ŋwara ganu ŋwuŋun. na gwune arune, ŋɩdi wei ŋo gelio ŋele ŋuŋun, ŋaŋinu ŋɩdi wei namɩni ŋu gwetɩdo gwun gwɩtienɩjo ŋɩdi wei lugwun.

²⁸ na gwune na ŋɩdi wei ŋɩtienɩjo ŋelɩnya ŋeḏi elo, na kaja kono na ŋaɽe dino kwulo gwuŋun ŋɩtienɩjo ŋelɩnya ŋeḏi gwun gwɩtienɩjo ŋɩdio wei ŋele ŋuŋun, kani a elo ro ŋɩdi wei gi wei.

²⁹ na ḏa ŋate ŋɩmaro dino no, nalarre galakwe lun libabṯaijinu gwan liji lun laiyo? na ḏa liji lun laiyo late lɩmadiɽo no, gwudaro gəko naṯi liji babṯaijɩni gwan luŋa?

³⁰ na gwudaro gəko nilijiga gi ḏiṯurɩḏa bubruṯ?

³¹ na gwan ŋuɽun ŋe ḏɩbuṯiana ḏinyi lagalo ḏun ḏəṯi ḏi yecu kɩrisṯo gwun gwiro gwele gwage, nyi gweiceijɩno nyi gwaṯai bubruṯ.

³² na ḏa nyi maro gwiji anarre lɩḏe le lun lɩki awɩsus, ŋaḏa ŋe ŋiŋir lugwi? ḏa liji lun laiyo late lɩmadiɽo no, ilʼe nilyu, gi gwune alai giləganu

³³ nya lo louwɩrico liji lajirdəḏeico; ḏuməḏəṯə lijiŋale lun lɩki ḏaṯɩki ŋuɽuna ŋun ŋaṯɩl liji arre ŋiŋir.

³⁴ girinɩl nyaɽuwe ŋaḏɩgɩɽe ŋiŋir, nya lo lape ŋuɽuna ŋɩki, gi gwune kworo late ləṯi ḏilɩŋeḏa ḏeḏi elo no. nyi gwaro dino kani ŋwajəpijo ḏare.

³⁵ namɩni gwiji gwədi gwarno, galakwe na liji ḏiɽi lun laiyo? namɩni lədiɽi jiŋɩno je jɩra?

³⁶ ŋa gwun gwiro gɩɽilo, ŋɩdi ŋun ŋaṯalkwoi ŋate ŋəmɩḏe ḏa ŋate ŋɩmai no,

³⁷ na ŋun ŋɩkwuḏalo, ŋa gwate gwaṯɩkwoi aŋɩna yun yaje no, namɩni ŋwon ŋwun ŋwate ŋwəṯi dirda nanu no, i gwəti kwuləru, i ŋwe ŋwiro kaja.

³⁸ namɩni elo gwiḏəḏi aŋɩna yiro gi gwune yibunyu, na ŋɩdi ŋe ŋɩkwuḏɩlo ŋete ŋete ŋulḏəḏə aŋɩna yuŋun.

³⁹ na jiŋɩno wei jate jiro aŋɩnu yetɩdo no, gi gwune aŋɩnu yeḏi liji yiro yetɩdo, na yiro kaja yeḏi lɩḏe, na yiro kaja yeḏi ŋwumi, na yiro kaja yeḏi nyiɽuwə.

⁴⁰ na jiŋɩno jo jeḏi kanyin, na jiŋɩno jo jeḏi gɩḏilio, namɩni ḏoɽeḏa ḏeḏi jiŋɩno jeḏi kanyin ḏiro ḏetɩdo, na ḏoɽeḏa ḏeḏi jiŋɩno jeḏi gɩḏilio ḏiro kaja.

⁴¹ na ḏoɽeḏa ḏo ḏetɩḏo ḏeḏi anyin na ḏiro kaja ḏeḏi uwə, na ḏiro kaja ḏeḏi ŋwuḏum; gi gwune ludum lete lete ləṯi ḏoɽeḏa ḏiro kaja.

⁴² na ḏiḏiɽo ḏeḏi liji lun laiyo ḏiro dino, nukwoi gi ḏidigɩɽa, na gwidiɽi gwate gwadigɩɽe no;

⁴³ nukwoi ḏare ḏe, na gwidiɽi ḏoɽeḏa ḏe; nukwoi gi ḏɩmumɩḏa, na gwidiɽi ŋɩma ŋe,

⁴⁴ nukwoi aŋɩna ye yiro jɩḏḏi na ŋuwən, numɩni diɽi aŋɩna ye yiro gwuɽɩwə. na ŋiro gi aŋɩnu yo yeḏi jɩḏḏi na ŋuwən, na aŋɩnu yo yeḏi gwuɽɩwə dino.

⁴⁵ na ŋiro dino ŋulinu, adam gwun gwiro gwiji gweḏi gwerre gwugelɩnu gwiji gwun gwumiḏo, na adam gwun gwiro gɩdo gwiro gwuɽɩwəgwun gwaṯugwumiḏi.

⁴⁶ namɩni gwuɽɩwə gwəḏu gwiro gwerre no namɩni yun yiro jɩḏḏi na ŋuwən, namɩni gwuɽɩwə gwiro gɩdo.

⁴⁷ gwiji gweḏi gwerre gweḏi gwɩnyəm gwiro, na gwukədɩnu bulo gwe, na gwiji gwun gwiro nimɩro nɩṯṯən gwiro gwele gwun gwuwiḏi kanyin.

⁴⁸ na liji lun liro bulo liro ŋi gwiji gwun gwukədɩnu bulo gwe gwerre, na dino liji leḏi kanyin liro gi ŋu gwun gwuwiḏi kanyin.

⁴⁹ na gi gwune ildado gwijiŋale gweḏi bulo, na ŋiro dino ildado gwijiŋale gwun gwuwiḏi kanyin.

⁵⁰ na nyi gwaɽeico dino lɩmagəri, jɩḏḏi na ŋuwən ŋate ŋəṯi ŋɩma laɽenyeḏe ŋele ŋeḏi elo no, na ḏidigɩɽa ḏaṯe ḏəṯi ŋɩma ḏaɽenyeḏe ḏun ḏate ḏaṯɩdigɩɽe no.

⁵¹ diŋɩnɩl, nyi gwajaŋijo ŋuɽuna ŋun ŋɩlɩbo, ilate lai wei no, namɩn liŋə wei iləbini ganu,

⁵² cou, kaja ge ḏonina jei je, gi ḏərio gwula ḏe gɩdo ḏedi burujo; gi gwune burujo gwəri gwula, na liji lədiɽi lun laiyo limaro lun late ladigɩɽe no, na liŋə iləbini ganu.

⁵³ gi gwune ŋeno ŋun ŋaṯɩdigɩɽe arram ŋakani ŋun ŋate ŋaṯɩdigɩɽe no, na ŋeno ŋun ŋaiyo ŋalikani ŋun ŋate ŋaṯai no,

⁵⁴ na gwune na ŋeno ŋun ŋaṯɩdigɩɽe ŋɩmakani ŋun ŋate ŋaṯɩdigɩɽe no, na ŋeno ŋun ŋaiyo ŋalikani ŋun ŋate ŋaṯai no, na kaja kono ŋila ŋun ŋulinu, ḏiḏamɩḏa ḏɩmaŋaḏɩni ḏaiya.

⁵⁵ ḏaiya, ŋinya ŋuŋa ŋaḏa? ḏaiya, ḏiḏamɩḏa ḏuŋa ḏaḏa?

⁵⁶ na ŋinya ŋe ḏaiya ŋiro ŋuɽun ŋun ŋɩki, na ŋɩma ŋeḏi ŋuɽun ŋun ŋɩki ŋiro ŋuɽun ŋun ŋigelijɩlo elo musaŋ.

⁵⁷ namɩni ileico eloŋu sukran gwun gwaṯijiḏəḏə ḏiḏamɩḏa gwele gwe gwun gwan yecu kɩrisṯo.

⁵⁸ na dino lɩmagəri lun ləmɩnyɩlo, ḏuḏinɩl ga muma, nya late ligwuɽiṯiḏo ga no, aṯanyauṯəne ŋɩru ŋeḏi gwele gwun gwiro elo ŋwamon wei, nyalilɩŋiḏi ŋɩru ŋalo ŋun ŋɩbuḏu ŋate ŋiro ga jai kwele no.