1 kurinṯus 13 - ŋuɽun ŋun ŋiya ŋun ŋikaiilo elo 1966

asa 13 ḏamiyo ḏiro ḏiḏəḏo ḏun ḏɩbuṯano wei

¹ na ḏa nyi mumə ḏuməḏo ḏe ḏeḏi liji na ḏeḏi liji leḏi kanyin, namɩni nyi mete ḏəmɩnyo no, namɩni nyi gwiro ŋi aba yun yiro gwui yun yaṯare ganu na ṯəbəl ḏun ḏɩpiḏɩlo.

² na ḏa nyi məṯi ḏiḏəḏo nyi ŋwaŋiḏi ŋuɽuna ŋun ŋaŋijiŋilo elo, na ŋilɩŋiḏɩlo wei ŋun ŋɩlɩbo na ḏilɩŋeḏa wei, na ḏa nyi məṯi ḏɩməṯo wei kəbe niəbɩri ŋwurgwoma, namɩni nyi mete ḏəmɩnyo no, nyi gwate no.

³ na ḏa limilḏəḏə ŋɩdio ŋinyi wei kani lun late ləṯi ŋɩdio no laʼe, na ḏa nyi məḏəḏə aŋɩna yinyi ḏɩnuna, namɩni nyi mete ḏəmɩnyo no, namɩni ŋate ŋɩbəḏəṯɩjo ŋuɽuna ŋədi ŋun ŋiŋir no.

⁴ ḏəmɩnyo ḏaṯɩməṯo ḏugwore na ḏiro ŋino, na ḏəmɩnyo ḏate ḏaṯɩɽe ganu kwiji no, na ḏate ḏaṯabupaḏe ganu gi jei ganu jeḏi liji no, na ḏate ḏaṯɩbuḏi gwula no,

⁵ na ḏate ḏiro ŋuɽuna garɩbuṯ no, na ḏate ḏaṯɩbunyi ŋuɽuna ŋan gwulo gwuŋun no, na ḏate ḏaṯɩje ganu cou no, na ḏəmɩnyo ḏate ḏaṯɩḏuɽəḏɩjo gwiji ŋuɽuna ŋun ŋɩki no,

⁶ na ḏate ḏaṯɩdile ganu ŋuɽun ŋun ŋɩki no, namɩni ḏaṯɩdile ganu ŋuɽun ŋun ŋiro gwerkwe.

⁷ ḏəmɩnyo ḏaṯɩməṯo ḏugwore ŋuɽun wei, na ḏaṯəṯi ḏɩməṯo ŋuɽun wei, na ḏaṯɩḏuḏɩnɩjo ŋuɽuna wei, na ḏaṯupini ŋuɽuna wei.

⁸ ḏəmɩnyo ḏate ḏaṯete ḏuṯ no, namɩni ḏa ḏaŋiḏio ḏɩmaje ḏeḏi ŋuɽun ŋun ŋaŋijilo elo namɩni ḏete; na ḏa ḏuməḏo ḏɩmaje ḏun ḏiro kajakaja ṯono ḏete, na ḏa ḏilɩŋeḏa ḏɩmaje namɩni ḏete.

⁹ namɩni liŋə nilɩŋiḏi ḏilɩŋeḏa kworo, na nilaŋiḏi ŋuɽuna kworo ŋun ŋaŋijijɩlo elo,

¹⁰ namɩni ḏa ŋɩmila ŋun ŋiro muma, namɩni ŋwuleti ŋun ŋɩti ŋeḏi gwerre.

¹¹ gwune duḏi gwɩti nyi gwaṯumə gi ŋaɽe ŋun ŋɩti, naṯiuməḏɩni gi ŋaɽe ŋun ŋɩti; namɩni gwunnɩno niro gwuɽun na nyi meti ŋuɽuna ŋeḏi ŋwugɩḏe.

¹² gi gwune gwunnɩno liŋə ilaŋalaḏe kwu madara nyinyabir, namɩni kaja gəwei ilaŋiḏe gi jei ganu muma. gwunnɩno ŋilɩŋiḏɩlo kworo namɩm kaja gəwei ŋilɩŋe gi gwune ilɩŋiḏinu.

¹³ na dino ŋuɽun ŋeno ṯəɽɩl ŋajaḏaṯa, ḏɩməṯo na ḏiḏuḏɩnɩjo na ḏəmɩnyo, namɩni ŋun ŋɩbuṯano gi loro lun liro ṯəɽɩl ḏəmɩnyo ḏiro.