1 kurinṯus 12 - ŋuɽun ŋun ŋiya ŋun ŋikaiilo elo 1966

asa 12 ḏiḏəḏo ḏeḏi gwuɽɩwə ḏun ḏiro kajakaja na ḏigakia ḏagin

¹ na gwan ḏiḏəḏo ḏeḏi gwuɽɩwə lɩmagəri, nyi gwate gwarno nyalaro jɩɽilo no.

² nyalilɩŋiḏi nanyarno kaja kono nyalro liji lun liro ga dino, nyalgwuloḏəṯɩnu ŋɩdi ŋun ŋaṯɩlorṯeḏa ŋun ŋate ŋaṯumə no, kalo gun gaṯajigwulo.

³ na ŋiro dino nyi gwarno ŋilɩŋiḏanyalo, gwatɩn gwetɩdo manumə gwuɽɩwə gwe gweḏi elo manarno yecu gwiḏenɩnu no, na gwatɩn gwetɩdo manarno yecu gwiro gwele no namɩni gwuɽɩwə gwe gwun gwɩpiḏo pɽul.

⁴ na ḏiḏəḏo ḏo ḏiro kajakaja ḏeḏi gwuɽɩwə, namɩni gwuɽɩwə gwiro gwetɩdo gwun gwɩpiḏo pɽul.

⁵ na ŋɩru ŋo ŋiro kajakaja, namɩni gwele gwiro gwetɩdo gwun gwiro elo.

⁶ na ŋɩma ŋiro kajakaja ŋaṯape ŋɩru, namɩni elo gwiro gwetɩdo gwun gwaṯape ŋɩru wei ŋɩdi wei.

⁷ namɩni nulḏəḏə wei gwete gwete ḏəŋinio ḏeḏi gwuɽɩwə gwun gwɩpiḏo pɽul kani ŋwuləpijo ŋuɽuna ŋun ŋəṯi jei ganu.

⁸ gi gwune gwete nuḏəḏə ŋadɩgɩɽe ŋe ḏuməḏo gwuɽɩwə gwe gwun gwɩpiḏo pɽul, na gwiro kaja nuḏəḏə ŋuɽuna ŋe ḏilɩŋeḏa gwuɽɩwə gwe kweno dino,

⁹ na gwiro kaja nuḏəḏə ḏɩməṯo gwuɽɩwə gwe kweno dino, na gwiro kaja nuḏəḏə ŋɩma ŋe ḏigela liji muma lun leḏeḏo nanu gwuɽɩwə gwe gwetɩdo,

¹⁰ na gwiro kaja ḏapa ŋɩru ŋɩma ŋe ŋun ŋɩbuṯano kworo gweḏi liji, na gwiro kaja nuḏəḏə ḏaŋiḏio ŋuɽuna ŋun ŋaṯɩl elo aŋijo, na gwiro kaja nuḏəḏə ŋɩma ŋeḏi giloḏa ga gwuɽɩwə gwiro kajakaja, na gwiro kaja nuḏəḏə ḏumədo ḏun ḏiro kajakaja, na gwiro kaja gwaṯiwɩrlijo liji ḏuməḏo ḏun ḏate ḏilɩŋiḏɩlo no,

¹¹ namɩni gwuɽɩwə kweno gwetɩdo ŋaṯularre ŋeno wei, naṯulɩgəjgɩnyeḏɩjo ganu gwete gwete ŋun ŋɩbunyɩlo gwuɽɩwə.

ḏəŋinio ḏedi aŋɩnu

¹² na ŋiro gi gwune aŋɩnu yiro yetɩdo na yəṯi ŋɩdio ganu ŋutu, na ŋɩdi wei ŋeḏi aŋɩnu ŋutu namɩni aŋɩnu yiro yetɩdo, na kɩrisṯo gwiro dino;

¹³ gi gwune liŋə wei gwuɽɩwə gwe gwetɩdo gwun gwɩpiḏo pɽul ilmababṯaijɩni kaŋɩnu yetɩdo, ḏa limaro liju i ligrigi, i lun liro lɩwainy i lun late liro lɩwainy no, na liŋə wei ilmeyu kwuɽɩwə gwetɩdo gwun gwɩpiḏo pɽul.

¹⁴ gi gwune aŋɩnu yate yəṯi ŋɩdio ŋetɩdo no namɩni ŋutu ganu.

¹⁵ na ḏa lara limarno, gi gwune nyi gwate gwiro ḏi nyi gwədu gweḏi aŋɩnu no, na dino gədu geḏi aŋɩnu na?

¹⁶ na ḏa gəni gɩmarno, gi gwune nyi gwate gwiro gei nyi gwədu gweḏi aŋɩnu no, na dino gədu geḏi aŋɩnu na?

¹⁷ na ḏa aŋɩnu wei yɩmaro gei, na ḏidiŋɩna ḏaḏa? na ḏa wei yɩmaro ḏidiŋɩna namɩni ḏiruḏɩno ḏaḏa?

¹⁸ namɩni elo gwugelo ŋɩdio wei ŋete ŋete kaŋɩnu ŋiro gi gwune əminyulo.

¹⁹ na ḏa luŋa wei limaro ŋɩdi ŋetɩdo na aŋɩnu yaḏa?

²⁰ namɩni gwunnɩno ŋɩdi ŋeḏi aŋɩnu ŋutu ganu namɩni aŋɩnu yiro yetɩdo.

²¹ na gei gate gəṯi ŋɩma geico ḏi no, nyi gwate gwubunyaŋa no, i dino lɽa leico ŋwara no, nyi gwate gwubunyaje no.

²² awe, namɩni ŋutəno, ŋɩdi wei ŋeḏi aŋɩnu ŋun ŋaṯaŋiḏi ŋɩrebɩna ŋəṯi jei ganu gworki.

²³ na ŋɩdi ŋun ŋaṯɩlŋarno ŋɩbɩɽaṯo ḏinəjio, limilgaki ḏinəjio ḏutəno, na ŋɩdi ŋage ŋun ŋaṯilɩkɩɽɩbə ga ŋəṯi ḏiŋiriḏa ḏutəno,

²⁴ namɩni ŋɩdi ŋage ŋun ŋiŋir ŋate ŋɩbɩɽaṯɩn ŋɩdi ŋədi no. namɩni elo gwuɽuḏi aŋɩna ganu yetɩdo, nuḏəḏə ḏinəjio ḏuṯəno ŋɩdi ŋun ŋɩbɩɽaṯo,

²⁵ kani ate an ḏɩkenyɩḏiḏia je ganu kaŋɩnu no, na kani a ŋɩdi ŋeno alro ḏidɩmeḏa gworo.

²⁶ na ḏa ŋɩdi ŋete ŋeḏi aŋɩnu miḏe namɩni ŋɩdi wei ŋiḏe dino, na ḏa ŋete ŋɩmanəjini na ŋɩdi wei ŋadile ganu.

²⁷ na nyalro aŋɩnu yeḏi kɩrisṯo, na gwete gwete nyalro ŋɩdi ŋuŋun.

²⁸ na elo gele liji kɩniso, gwerre duwəjo, na nimɩro nɩttən nebɩŋa, na nimɩro ṯəɽɩl limualɩm, na gɩdo ganu lun lagele ŋɩru ŋɩma ŋe ŋun ŋɩbuṯano kworo gweḏi liji, na lun ləṯi ŋɩma laligele muma lun leḏeḏo nanu, na lun laṯɩlɩgelejo uwə, na lun laṯɩdɩme ŋelɩnya ŋeḏi kɩniso, na ḏuməḏo ḏun ḏiro kajakaja.

²⁹ luŋa wei liro duwəjo a? luŋa wei liro nebɩŋa? luŋa wei liro limualɩm a? luŋa wei lapo ŋɩru ŋɩma ŋe ŋun ŋɩbuṯano kworo gweḏi liji a?

³⁰ luŋa wei ləṯi ŋɩma laligele muma a? luŋa wei ləṯi ŋɩma lumə ḏuməḏo ḏiro kajakaja a? luŋa wei ləṯi ŋɩma laliwɩrlijo ŋuɽuna a?

³¹ namɩni aṯanyabunyi gworki ḏiḏəḏo ḏun ḏiŋirano, namɩni nyi gwajaŋijo ṯaṯ ḏun ḏiŋirano gi loro wei.