1 kurinṯus 10 - ŋuɽun ŋun ŋiya ŋun ŋikaiilo elo 1966

asa 10 ḏidɩmino ga gi liŋəɽul leḏi liji leḏi isreiyil

¹ gi gwune lɩmagəri, nyi gwubunyaje nyalalɩŋe lɩgwurninyo lage gi gwune luŋa wei lijo gelio gi jəbɩɽu na luŋa wei nalmuri kɩlɩgi ganu gi ḏɩrawe,

² na luŋa wei nalbabṯaijɩni ḏi musa gi jəbɩɽu na gi ḏɩrawe,

³ na luŋa wei nalʼe gia getɩdo geḏi gwuɽɩwə,

⁴ na luŋa wei nalyu ḏiyo ḏetɩdo ḏeḏi gwuɽɩwə, gi gwune lɩmeyu wei gi loɽi leḏi gwuɽɩwə lun laṯɩlgwujane, na loɽi leno liro kɩrisṯo.

⁵ namɩni elo gwate gwiŋir ḏugwore ḏi luŋa lun lutəno lagin no, gi gwune lɩmaliwini kiḏɩwer.

⁶ namɩni ŋuɽun ŋeno ŋɩməṯi jei ganu kani alro ḏaŋiḏio lage, ilate laṯɩbunyi ŋɩdio ŋun ŋɩki ŋiro gi gwune ŋɩbunyɩlo ləwei no.

⁷ na nya lo laro lun laṯorṯeḏa ŋɩdio liro gi luŋa kworo lagin; gi gwune ŋulinu, liji lijiga nalʼe naliyu naldiɽo gi ḏɩriṯa.

⁸ na dino ilo laṯuriḏe gi kworo lagin laṯuriḏe nalidi lamon letɩdo liji alɩb ḏuɽi dɩttən na ṯəɽɩl.

⁹ na dino ilo liḏeije gwelɩnya gwun gwan kɩrisṯo liro gi kworo lagin larro dino nalai juŋə je.

¹⁰ na nya lo lanuməḏɩni ganu, gi luŋa kworo lagin luməḏɩnu ganu na gwiji gweḏi kanyin gwe ḏiɽinyɩḏa nulɽinye.

¹¹ namɩni ŋuɽun ŋeno ŋɩwilijililo gi ḏigireṯɩnyeḏa, na ŋulinu ŋijigɩreṯɩnya, na ŋwamon ŋwage ŋuɽun ŋɩmila ŋun ŋɩṯɩmejo gworo gweḏi jɩḏilio wei.

¹² na ŋiro dino ŋu gwun gwarno gwuḏuḏɩnu ga muma ŋwuje muma gwo gwidi.

¹³ ḏɩḏeijo ḏate ḏɩmila lagalo ḏiro kaja no namɩni ḏiro gi ḏun ḏaṯila gi liji wei; namɩni elo gwiŋir gwuḏuḏɩnu ga gwun gwate gwəjouwɩrico ŋanyaŋiḏəḏɩni ŋutəno ŋɩma ŋalo no, namɩni ḏɩḏeijo ḏe gwagele ṯaṯ ḏe ḏobɩḏina kani nyəṯi ŋɩma nyalaməṯo ḏɩməṯo ḏe dugwore.

ḏabɩra gi ḏorṯeḏa ŋɩdio

¹⁴ na dino nyaŋa lun ləmɩnyu, abɩrɩl gi ḏorṯeḏa ŋɩdio.

¹⁵ nyi gweiceijo liro gi liji lun ləṯi ŋadɩgɩɽenya no, akɩmilo nyaŋa ŋun ŋuməḏɩjejɩŋe.

¹⁶ kɩɽudo ge ḏorṯeḏa gun gaṯɩleico eloŋu sukran gədu ge ŋɩmaga ŋeḏi ŋuwən ŋeḏi kɩrisṯo na? na gia gun gaṯɩlakɩra ganu gədu giro ŋɩmaga ŋeḏi aŋɩnu yeḏi kɩrisṯo na?

¹⁷ na ilutu nilmɩni ro gia getɩdo na aŋɩnu yetɩdo, gi gwune liŋə wei ileʼe gia getɩdo ŋɩmaga lageŋu.

¹⁸ aŋəḏɩl liji lun lilɩŋinu liro lisreiyil; luŋa lun lateʼe ŋɩdio ŋeḏi lobo late lalɩje kal gete loboŋale na?

¹⁹ na dino nyi gwo gwarau? ŋɩdi ŋun ŋaṯɩḏəḏini ŋɩdio ŋe ḏorṯeḏa ŋəṯi jei ganu a? i ŋɩdi ŋe ḏorṯeḏa ŋəṯi jei ganu a?

²⁰ awe, namɩni ŋɩdi ŋun ŋaṯɩl liji lun liro ga dino ḏuge, ŋaṯɩliḏugɩjo diŋeroma, ŋədu ŋeḏi elo no. na nyi gwate gwəmɩnyu nyalajiga kal gete diŋerom de no.

²¹ nya late ləṯi ŋɩma leyu kɩɽudo geḏi gwele gwun gwiro elo na kɩɽudo geḏi diŋerom no, na nya late ləṯi ŋɩma laʼe kal gete gi ṯarabesa ḏeḏi gwele gwun gwiro elo na gi ṯarabesa ḏeḏi diŋerom no.

²² liŋə iliɽi gwelɩnya ganu gwun gwiro elo a? liŋə ilbɩɽeno nanu lugwun a?

²³ ŋɩdi wei ŋiŋir lugwi, namɩni ŋɩdi wei ŋate ŋideleḏo no. ŋɩdi wei ŋiŋir lugwi namɩni ŋɩdi wei ŋate ŋaṯɩlɩbɩɽi nanu no.

²⁴ gwo gwete gwabunyi ŋuɽuna ŋiŋir ŋan gwulo gwuŋun, nalmɩni ro ŋeḏi gwiji gwiro kaja.

²⁵ jɩḏḏi wei jun jiḏɩlɩnu gi cu iṯɩlo, na ŋa gwo gwaɽoṯeḏe ŋuɽuna ŋədi gwan ḏugwor ḏuŋa;

²⁶ gi gwune gɩḏilio wei geḏi gwele gwiro gwun gwiro elo, na ŋɩdi wei ŋun ŋijo.

²⁷ na ḏa gwete lagin lun late ləmɩnyu no majuməḏɩjo manarno nyalila lugwun nanyalməmɩnyi nyalmar lele, na wei ŋun ŋajilgelijo ga iṯɩlo, nya lo laɽoṯeḏe ŋuɽuna gwan ḏugwor.

²⁸ namɩni ḏa maɽeico gwete no, ŋeno ŋiḏugɩnu ŋwobo, ŋo ŋanyalʼe gwan ŋu gwun gwaŋijije, na gwan ḏugwor.

²⁹ nyi gwarno ḏugwor ḏuŋa ḏədu no, namɩni ḏeḏi gwiji gwiro kaja. na gwudaro gəko ḏɩkədəḏɩnə ga ḏinyi ŋɩdi ŋe ḏiṯa ḏɩmakɩmini ḏugwor ḏe ḏeḏi gwiji gwiro kaja?

³⁰ na ḏa nyi maṯeico eloŋu sukran gi ḏiṯa ḏinyi, gwudaro gəko aṯɩnyinuməḏəṯo elo gwan ŋɩdi ŋun ŋaṯiŋeico eloŋu sukran?

³¹ na dino ḏa nyalmaṯeʼe i nyalmeyu i ŋɩru ŋədi ŋun ŋanyalarre, arrɩlo wei kani nyəpijo eloŋu ḏɩbuḏia.

³² duḏɩl liji lun late laṯɩgele ḏobɩlkeja gi liju na gi ligrigi, na kɩniso geḏi elo no,

³³ ŋiro gi gwune nyi dino gwaṯiŋiri liji dugwore ŋuɽun ŋe wei, namɩni ŋate ŋɩɽoṯeḏɩlo ŋun ŋideleḏo kwulo gwi no, namɩni ŋun ŋideleḏo gi liji lutu kani alkədəḏɩni ga.