1 kurinṯus 1 - ŋuɽun ŋun ŋiya ŋun ŋikaiilo elo 1966

asa 1 ḏisalɩmia na ḏara sukran

¹ nyi gwan bulus gwun gworniḏɩnu niro ḏuwəjo ḏeḏi yecu kɩrisṯo ŋuɽun ŋe ŋun ŋɩbunyɩlo elo, na susṯanis gwun gwiro mage,

² ano nulijo kɩniso geḏi elo gun go kurinṯus, na liji lun lulpiḏi pɽul ḏi yecu kɩrisṯo, lun lorniḏɩnu alro lɩpiḏo pɽul, na luŋa wei kalo wei lun lorniḏo jiji je jeḏi yecu kɩrisṯo gwun gwiro gwele gwagin na gwage,

³ ḏiŋiriḏa ḏaje lagalo na ḏouwɩɽiḏa ḏeḏi elo gwun gwiro baba gwage, na gwele gwun gwan yecu kɩrisṯo

⁴ nyi gwaṯeico eloŋu gwinyi sukran bubruṯ gwan nyaŋa, na ḏiŋiriḏa ḏeḏi elo ḏun ḏiḏəḏəje ḏi yecu kɩrisṯo;

⁵ gi gwune ŋuɽun wei nyalmuti ḏɩbona lugwun, gi ḏuməḏo ŋuɽuna wei, na ḏilɩŋeḏa wei;

⁶ na ŋiro gi gwune ḏɩteijo ga ḏeḏi kɩrisṯo ḏɩmaṯaḏa ga lagalo,

⁷ na dino nyate nyanbɩɽaṯe ḏiḏəḏo ḏədi ḏeḏi gwuɽɩwə no, na ḏa nyalmaḏuḏɩnɩjo ḏəŋinio ḏeḏi gwele gwun gwan yecu kɩrisṯo,

⁸ gwun gwajimaṯaji ga kəbe gɩdo ganu, nya late ləṯɩn ŋuɽuna ŋədi ŋun ŋajɩnŋi elo akɩmi gi lamon leḏi gwele gwage gwun gwan yecu kɩrisṯo no.

⁹ na elo gwiŋir gwuḏuḏɩnu ga, na ŋu gwe nyaŋa lorniḏɩnu ŋɩmaga ŋeḏi ŋaɽe ŋuŋun ŋun ŋan yecu kɩrisṯo gwun gwiro gwele gwage.

ḏɩkenyɩḏiḏi ganu kɩniso

¹⁰ namɩni nyi gwuɽoṯeḏo lagalo gworki lɩmagəri, gi jiri jeḏi gwele gwage gwun gwan yecu kɩrisṯo, nyaŋa wei nyuməḏəṯe ŋuɽuna ŋetɩdo, ŋo ŋanje ŋajɩnkenyə ganu; nyamɩni aɽuwe nyakani muma ŋuɽun ŋe ŋetɩdo na dakɩmiḏo ḏetɩdo.

¹¹ gi gwune nyi gwudiŋɩnu gwan nyaŋa lɩmagəri, gi liji leḏi dunu gweḏi kuluwi ḏɩbereḏa ḏo lagaloŋu.

¹² na ŋuɽun ŋinyi ŋaro dino, na gwete gwete lagaloŋu naṯuarno, nyi gweḏi bulus gwiro, na nyi gweḏi abulus gwiro, na nyi gweḏi sapa gwiro, i nyi gweḏi kɩrisṯo gwiro.

¹³ kɩrisṯo kenyɩḏiḏi ganu a? na bulus gwuɽinyinu gi luɽi lun lɩmalɩḏo ganu gwan nyaŋa a? i nyaŋa libabṯaijinu jiri je jeḏi bulus a?

¹⁴ na nyi gweico eloŋu sukran, nyi gwate gwinbabṯaije gwetɩdo lagalo no, namɩni nyi gwibabṯaijo kɩrisibusaŋ na gaius kuwei,

¹⁵ kani gwo gwete gwanarno nyi gwaṯɩbabṯaijiḏi jiri je jinyi.

¹⁶ na nyi gwibabṯaijo liji leḏi dunu gweḏi isṯipanas dino, namɩni lutəno gi loro leno nyi gwate gwilɩŋiḏi ḏa nyi manbabṯaije gwete gwiro kaja no.

¹⁷ gi gwune kɩrisṯo gwate gwuwəjɩŋi gi ḏibabṯaijiḏia no, namɩni gi ḏuməḏɩjo liji ŋuɽuna ŋiŋir ŋeḏi yecu kɩrisṯo, ŋədu ŋeḏi ḏilɩŋeḏena ŋeḏi ŋuɽun ŋe ŋɩni no, kani ate ŋuduji luɽi lun lɩmalɩḏo ganu leḏi kɩrisṯo ga jai no.

ŋɩma ŋeḏi luɽi lun lɩmalɩḏo ganu

¹⁸ gi gwune ḏuməḏɩjo ŋuɽuna ŋeḏi luɽi lun lɩmalɩḏo ganu ŋiro ŋɩɽilo gi liji lun lɩweweləḏi gi ḏaiya, namɩni lage lun laṯɩkədəḏɩni ga na ŋuɽun ŋeno ŋiro ŋɩma ŋeḏi elo.

¹⁹ gi gwune ŋulinu, nyi gwaki ḏilɩŋeḏena ḏeḏi liji lun lilɩŋiḏi ŋuɽuna ŋutu, na ḏidiŋɩna ḏeḏi luŋa lun ləṯi ŋadɩgɩɽenya ḏidonye.

²⁰ na gwiji gwaḏa gwun gwəṯi ḏilɩŋeḏena ḏutu? na gwaḏa gwun gwiro gaṯɩm? na gwaḏa gwun gwaṯɩliwəwəɽɩṯijiḏi ŋuɽuna gweḏi gaja keno? elo gwate maduji ḏilɩŋeḏena ḏeḏi gɩḏilio keno ŋɩɽilo na?

²¹ na gwune ḏilɩŋeḏena ḏe ḏeḏi elo liji leḏi gɩḏilio late lilɩŋiḏi eloŋu ḏilɩŋeḏena ḏe no, na elo məmɩnyi lulkədə ga lun ləmɩnyu ŋɩɽilo ŋe ŋeḏi ŋuɽun ŋun ŋuməḏəŋe.

²² na liju liɽoṯeḏo ḏəŋinio na ligrigi libunyu ḏilɩŋeḏena,

²³ namɩni anaŋa laṯumə kɩrisṯo gwe gwun gwuɽinyinu gi luɽi lun lɩmalɩḏo ganu, ŋɩmaro gi liju gɩdol ge ḏobɩlkeja, na gi ligrigi giro ŋɩɽilo:

²⁴ namɩni gi liji lun lorniḏɩnu, lun liro liju na ligrigi dino, ŋɩmaro kɩrisṯo gwun gwiro ŋɩma ŋeḏi elo, na ḏilɩŋeḏena ḏeḏi elo.

²⁵ gi gwune ŋuɽun ŋeḏi elo ŋun ŋiro gi ŋɩɽilo gi jei ganu jeḏi liji ŋilɩŋeḏenano gi liji; na ŋun ŋaṯɩl liji are ḏɩmumɩḏa ḏeḏi elo ḏibɩɽeno nanu gi liji.

²⁶ iril jei galo ḏorniḏa ḏe ḏalo, lɩmagəri, late lagalo lutu lun ləṯi ŋadɩgɩɽenya ŋutu gi jei ganu jeḏi liji no, na late lutu lun ləṯi ŋɩma ŋutu no, na late lutu lun lilɩŋinu kəriḏ yeḏi ŋele no;

²⁷ namɩni elo gwubi ŋɩdio ganu ŋun ŋiro ŋɩɽilo ŋeḏi gɩḏilio kani alduji liji ḏare lun lilɩŋiḏi ŋuɽuna ŋutu; na elo gwubi ŋɩdio ganu ŋun ŋɩmumɩḏo ŋeḏi gɩḏilio kani alɩduji ḏare ŋun ŋɩbɩɽeno nanu,

²⁸ na elo gwubi ŋɩdio ganu ŋun ŋɩtiŋɩti ŋeḏi gɩḏilio, na ŋun ŋɩmal liji abɩlaṯe, na ŋun ŋate ŋijo no, kani aleti ŋɩma ŋeḏi gworo gwun gwijo gwunnɩno,

²⁹ kani ate an gwiji abupaḏe ganu gi jei ganu jeḏi elo no.

³⁰ na lugwun nyaŋa lo ḏi yecu kɩrisṯo gwun gwidujɩnu lage ḏilɩŋeḏena ḏeḏi elo, na ŋuɽun ŋiŋir, na ḏɩpiḏa pɽul, na ḏɩkəḏəḏɩna ga jili je,

³¹ na dino gi gwune ŋulinu, gwun gwabupaḏe ganu, gwabupaḏe ganu gwele gwe gwun gwiro elo.