1 buṯrus 5 - ŋuɽun ŋun ŋiya ŋun ŋikaiilo elo 1966

asa 5 ŋuɽun ŋe ḏibɩɽia nanu gi lele leḏi kɩniso

¹ nyi gwuɽoṯeḏo gi lele leḏi kɩniso lun lijo lagalo, nyi gwiro gwele gwun gwiro maḏalo gwalo gwun gwaŋɩḏi ḏɩḏia ḏeḏi kɩrisṯo, na gwun gwəṯi ŋɩmaga gi ḏoɽeḏa ḏun ḏaŋino,

² ḏɩmiŋil joŋolia jeḏi elo jun jijo lagalo, na nyaldaŋa ḏirmeṯeḏeica ŋɩma ŋe ŋədu no, namɩni ḏiḏino ḏe ḏugwor, na ŋate ŋiro ḏibəḏeicɩno ḏun ḏɩki no, namɩni dugwor de diŋir.

³ ŋate ŋiro ŋɩma ŋe ŋɩbɩɽe gi joŋol jun jiḏəḏəjɩlo elo no, namɩni gi ḏaŋijo joŋolia alarre gi nyaŋa.

⁴ na ḏa gwele gweḏi laɽa maŋino nyalape laḏe le ḏoɽeḏa lun late laṯɩdigɩɽe no.

⁵ na ŋiro dino nyaŋa lun logeno, dɩtienijilo lun luɽano. yɩti, nyaŋa wei dɩtlenijilo gworo nyaŋa ŋɩmaga, nyamɩni kani dɩtieno, gi gwune laṯɩl elo upəḏeice kaja lun libuḏi lula lagin, namɩni lun lɩtilɩtieno nalulḏəḏə ḏiŋiriḏana.

ŋuɽun ŋe ḏibɩɽia nanu gi liji

⁶ na dino dɩtienɩl gi ḏi ganu ḏeḏi elo ḏun ḏibɩɽe nanu, kani ŋwajabuje kaja gun gila.

⁷ gelil ŋuɽuna galo wei ŋun ŋɩni lugwun gi gwune gwaṯajidɩme.

⁸ gelil ŋadɩgɩɽenya muma, nyagirini, gi gwune iblɩs gwun gwɩkiḏiḏianyale gwiro gi lima lun ləri gwula naṯuwewele, nubunyi əḏi ro gwaŋaḏɩnane.

⁹ akadaicɩl kaja, nyaḏuḏɩni didir ḏɩməṯo ḏe, nyalɩŋe nyarno ḏɩḏia ḏaje gi lɩmagalo lalo lun lijo kɩḏilio ḏiro gi gworo gwalo.

¹⁰ na elo gwe ḏiŋiriḏa wei gwun majorniḏeico ḏoɽeḏa ḏuŋun ḏeḏi gi gɩḏilio ḏi kɩrisṯo, kaja gun gɩmanyagiḏe ŋwamon ŋwouwɩrio gwajiṯɩmeje, na gwajimaṯaji ga, na gwajibɩɽi nanu, na gwajibɩɽeji ga ḏiḏir.

¹¹ ŋele ŋaje lugwun gi gɩḏilio. gwerkwe.

¹² gi ḏi ḏeḏi siluwanus gwun gwiro mage gwun gwiŋir gi gwune arine, nyi gwulijeje ŋuɽuna ŋɩti ŋajibɩɽi nanu, na ḏɩṯeɩjo ḏe ga na ŋiro ŋeno ŋiro ḏiŋiriḏa ḏeḏi elo ḏun ḏiro gwerkwe ganu. ḏuḏɩnɩl didir gi ḏiŋiriḏa ṯeno.

¹³ lo lisalɩmiaje lun lijo babil lun lɩməṯinanyale, na markus dino gwun gwiro ŋaɽe ŋinyi.

¹⁴ salɩmiḏil ŋɩmaga lagaloŋu ḏɩmɩɽəḏo ḏe ḏəmɩnyo ḏe. ḏouwɩɽiḏa ḏaje lagalo wei lun lijo ḏi kɩrisṯo. gwerkwe.