1 buṯrus 4 - ŋuɽun ŋun ŋiya ŋun ŋikaiilo elo 1966

asa 4 ḏiwino ŋuɽun ŋe ŋun ŋɩki kaja

¹ gi gwune kɩrisṯo gwiḏo gwan liŋə kaŋɩnu yuŋun, nyaŋa dino gi ajana yun yaṯape ŋɩdio ŋe ḏɩrra, apul ḏuməḏɩno gi gworo gweḏi yecu, na ŋu gwun gwiḏo kaŋɩnu gwuḏuḏɩnu ŋuɽun ŋun ŋɩki,

² kani ŋwate ŋwujiga kaja gun gɩṯanu kaŋɩnu no ŋuɽun ŋun ŋɩbunyɩlo jiŋɩno, namɩni ŋuɽun ŋeḏi elo ŋun ŋɩbunyulo.

³ na gaja ge ḏɩmiḏa ḏage ḏun ḏɩmete ŋidəḏeṯije nanu ŋiliduji gi gworo gweḏi liji lun liro ga dino, naṯɩlwewele ŋuɽun ŋɩki nilde gi ləməṯo jiŋɩno jage, na ŋuɽun ŋeḏi jiŋɩno, na ḏɩrləlo, na gwobɩɽo gwun gwɩki, na gɩmuri, na ḏorṯeḏa ŋɩdio ŋun ŋɩtumuḏu.

⁴ ŋuɽun ŋun ŋaṯɩliobəḏɩjo ga ṯuṯ gi gwune late lɩwiḏanyale gi ṯaṯ ḏe ḏɩmiḏa ḏagin ḏun ḏɩki no, naṯɩluməḏəṯo lagalo;

⁵ na luŋa leḏəḏə ḏiḏuɽəḏo ḏagin ŋuŋu gwun gwijiga muma gwakɩmi liji lun lɩmiḏo na lun laiyo.

⁶ na ŋuɽun ŋeno ŋuɽun ŋiŋir ŋeḏi yecu kɩrisṯo uməḏɩni gi liji lun laiyo, kani alakɩmini ŋuɽun ŋeḏi liji jiŋɩno je, namɩni lamɩḏe ḏi elo kwuɽɩwə.

⁷ namɩni gɩdo ganu ŋɩdi wei ŋo gɩṯo; na ŋiro dino ḏuḏɩl nyaŋa ŋadɩgɩɽenya muma nyagirini ŋi ḏuməḏɩjo eloŋu.

⁸ namɩni gwerre ganu ŋuɽun wei, nyəṯi ḏəmɩnyo ŋɩmaga gworki gi gwune ḏaminyiḏa ḏaṯɩkɩɽɩbə ŋuɽuna ŋun ŋɩki ŋutu.

⁹ məṯil liḏa ŋɩmaga lagaloŋu nyanəṯo ḏuməḏɩno ganu no.

¹⁰ naṯumɩni ro gwete gwete lagalo gi gwune ŋun ŋapɩlo kwuɽɩwə ŋe ḏapa ŋɩru nyaŋɩro ŋɩmaga lagaloŋu gi lɩwəkil lun liŋir leḏi ḏiŋiriḏa ḏeḏi elo ḏun ḏiro kajakaja.

¹¹ ḏa gwete maṯumə, ouwɩricil ŋuɽuna ŋuŋun alro gi ŋeḏi elo, na ḏa gwete mape ŋɩru, ouwɩricil ŋwuape ŋɩru ŋɩma ŋe ŋun ŋal elo ḏəḏə, kani nalɩbuḏi eloŋu ŋɩdi wei yecu kɩrisṯo gwe, gwun gwəṯi ḏoɽeḏa na ŋelɩnya gi gɩḏilio. gwerkwe.

ḏɩḏia ḏan yecu ḏiro ḏiŋiriḏa ḏagin

¹² nyaŋa lun ləmɩnyɩlo, aṯanyobeḏaga ṯuṯ no ŋuɽun ŋe ḏɩḏeijo ḏun ḏɩbuḏu gi igo ḏun ḏajilḏiḏeije ḏun ḏaje lagalo, ḏiwiḏi nuro gi ŋiwiljaje ŋun ŋiya no,

¹³ nyamɩni dile ganu na ḏa nyalmaje ŋɩmaga gi ḏɩḏia ḏeḏi kɩrisṯo, kani ḏa ḏoɽeḏa ḏuŋun ḏimaŋino na nyaŋa dino nyaladile ganu gworki.

¹⁴ namɩni ḏa nyalmaḏenɩni gwan jiri jeḏi kɩrisṯo na nyalmore, gi gwune gwuɽɩwə gwe ḏoɽeḏa na gwedi elo ŋwajinje elo, namɩni kɩḏɩriḏ gagin ŋu gwiḏenɩnu namɩni kɩḏɩriḏ galo ŋu gwubuḏinu.

¹⁵ namɩni gwo gwanouwɩrico gwete lagalo gwaniḏe gi gwuɽɩnyiḏo no, i gwun gwiro gwuɽam no, i gwun gwapo ŋuɽuna ŋun ŋɩki no, i gi gwun gwiro muɽul no.

¹⁶ namɩni ḏa maro gwukɩrisṯin gwate gwaḏarape no, nyamɩni ouwɩrico gwubuḏi eloŋu jiri je ceno.

¹⁷ gi gwune gaja gɩmila gun gagi ḏakɩmino iḏeije ga kwu dunu gweḏi elo; na ḏa ŋɩmaje gwerre ganu lage, na gɩdo aŋ gwiro gwaro lagin lun late ləṯeijo ŋuɽuna nəni ŋun ŋiŋir ŋeḏi elo no?

¹⁸ namɩni ḏa gwiji gwun gwiŋir makədəḏɩni ga mɩce gwe, namɩni gwun gwate gwuḏonyo eloŋu no na gwun gwɩki gwaŋino nigwegwe?

¹⁹ na ŋiro dino ouwɩricɩlo lun liḏe ŋuɽun ŋun ŋɩbunyɩlo elo, nalḏəḏə lula lagin ŋuŋu gwun gwiŋir gwuḏuḏɩnu ga ŋwuldɩme gwun gwugelo ŋɩdio wei, lore lapo ŋɩru ŋun ŋiŋir.