Biblia Todo Logo
Bìoball air-loidhne

- Sanasan -

1 buṯrus 3 - ŋuɽun ŋun ŋiya ŋun ŋikaiilo elo 1966


asa 3 ləmɩnyo na la

1 na dino nyaŋa lun liro la, əṯeijil ləmɩnyəŋe lalo nəni, na ḏa kworo late liməṯeijo ŋuɽuna nəni no, laro ləmɩnyo le lɩḏaminu ŋuɽun ŋun ŋiŋir ŋeḏi la jai late lɩmalɩnuməḏɩjo no,

2 na ḏa lɩmaŋu ŋuɽuna ŋalo ŋun ŋiŋir ḏinəjio ḏe.

3 aṯanyouwɩrico ḏɩkana ḏalo ŋwuḏəḏə kɩluḏo no gi ḏukɩɽa ŋwuja, i gi ḏɩkana ḏab na jiria no,

4 nyamɩni ouwɩrico ḏɩkana ṯeno ŋwuje gi dugwor ganu gɩdəno, ḏun ḏate ḏaṯɩdigɩɽe no, ḏɩkana ḏeḏi gwuɽɩwə gwun gwɩti na gwun gwate ŋuɽuna ŋede ŋe ŋutu ganu no, na ṯeno ḏijo gi jei ganu jeḏi elo ḏutu jilɩnya.

5 na ŋiro dino la lun lijo gwerre lun lɩpiḏo pɽul naṯɩlgele ḏiḏuḏɩnɩjo ḏagin ḏi elo, nalkaii lula lagin gi ḏɩkana ṯeno naṯɩləṯeijo ləmɩnyəŋe lagin nəni.

6 ŋiro gi gwune sara gwaṯəṯeijo ibraimŋ gəni naṯueico gwele, namɩni nyaŋa liro nyaɽe nyuŋun ḏa nyalmaṯɩgele ŋuɽuna ŋiŋir, nya late ləṯɩn ŋɩḏe no.

7 na ŋiro dino nyaŋa lun liro ləmɩnyo, jil laŋale lalo muma gi ḏiḏuḏɩno ga. aṯanyalnəji gi gwune gwa gwouweno gi jei, nyalduji gi ḏiɽenyeḏa gi ḏiŋiriḏa ŋɩmaga lagaloŋu ḏe ḏɩmiḏa, kani ate a ḏuməḏijo eloŋu ḏalo ŋwate ŋwirərega no.


ŋino ŋeḏi lɩkɩrisṯin

8 na gɩdo ganu duḏɩl letɩdo nyaŋa wei, əṯeḏil ŋino ŋɩmaga lagaloŋu, əmɩnyiḏil ŋɩmaga, nyəṯi dugwor dorɩwa, nyouwɩri ŋadɩgɩɽenya ŋalo.

9 na aṯanyawəɽeico ŋuɽuna kworo ŋun ŋɩki no, i ḏɩḏenɩḏia nyawəɽeice kworo no, namɩni ŋamaliḏe nanu nyamora liji, nyalɩŋiḏi nyalarno lorniḏaṯaje kani nyaɽenyeḏe ŋuɽun ŋun ŋiŋiriaje.

10 na ŋu gwun gwarno gwar gwəmɩnyi ḏɩmiḏa nuaŋu ŋwamon ŋwun ŋwiŋir, ouwɩricil ŋwudɩme ḏiŋɩla ḏuŋun ŋuɽun ŋun ŋɩki, na linyu luŋun kani ŋwate ŋwumə ŋuɽuna ŋun ŋiro ḏirdəḏeico no;

11 ouwɩrico ŋwuwɩrla ga ŋuɽun ŋun ŋɩki ŋwulouwɩrico ŋwuduji ŋuɽuna ŋiŋir; ŋwubunyi ḏouwɩɽiḏa ŋwugwuje ŋwara ganu ŋwuŋun.

12 gi gwune gei geḏi gwele gwun gwiro elo gaṯɩje gi liji lun liŋir, na gəni guŋun iḏinɩjo ḏiɽoṯeḏa ḏagin, namɩni jei jeḏi gwele jikiḏiḏɩlo lijiŋale lun laṯape ŋuɽuna ŋun ŋɩki.


ḏiḏia ḏeḏi ŋuɽun ŋun ŋate ŋiḏuḏɩnu ga no, na ḏəŋinio ḏeḏi yecu ḏan ŋuɽun ŋeno

13 əḏi gwiro gwapa ŋwuɽeḏɩnya lagalo ḏa ŋɩmaṯanyalgwujane ŋun ŋiŋir?

14 na ḏa nyalmiḏe gwan ŋuɽun ŋun ŋiŋir nyalmorəḏinu, na nya lo lanḏonye ŋɩḏe ŋagin ŋun ŋar ŋajiliŋɩḏonyi, na dugwor do dajimɩɽi,

15 nyamɩni buḏi kɩrisṯoŋ gi gwele gwun gwiro elo gi dugwor ganu dalo, nyaji muma bubruṯ gi ḏiwəɽijo liji ŋuɽuna ḏa gwete majiɽoṯəḏɩjo ga gwan ḏiḏuḏɩnɩjo ḏun ḏijo lagalo ḏɩtieno ḏe na ḏinəjio ḏe.

16 nyəṯi dugwor diŋir kani lun laḏene ŋuɽuna ŋalo kwilo gwalo gwun gwiŋir ḏi kɩrisṯo, laḏarape gi ḏɩḏenɩḏia ḏagin.

17 na ḏa ŋuɽun ŋɩmaro dino ḏi elo, ŋiŋirano nyaliḏe ŋuɽun ŋun ŋiŋir gi gwune ŋaŋanyalape ŋun ŋɩki.

18 gi gwune kɩrisṯo dino nuiḏe lamon letɩdo gwan ŋuɽun ŋun ŋɩki, gwiŋir gwan liji lun lɩki, kani ŋwijidikaḏaice ḏi elo, mai kaŋɩnu, namɩni mamiḏe gwuɽɩwə gwe;

19 gwun gwijo lugwun dino mele nuuməḏɩjo gwuɽɩwə gwun gwijo kɩrkon,

20 gweḏi liji lun late ləṯeijo eloŋu nəni uro kili no, kaja gun giḏuḏɩnge elo numəṯo ḏugwor ḏuŋun ŋwamon ŋwun ŋwukaduŋwe nouwa murkab, namɩni murkab kweno nan elo əbɩreje liji louwɩrio dubə kuwei ŋau ganu.

21 na ŋuɽun ŋeno ŋiro ŋəṯi gworo gwe ḏibabṯajɩno ḏun ḏɩjikədə ga gwunnɩno, ŋate ŋiro ḏuweia jiŋɩno ŋuɽun ŋun ŋɩki no, namɩni ḏiɽoṯeḏa ḏe dugwor dun diŋir ḏi elo ḏiḏiɽo ḏe gi ḏaiya ḏeḏi yecu kɩrisṯo.

22 gi gwune ŋu mabo kanyin nujiga gi ḏi ḏeḏi elo ḏun ḏiro ḏiŋir, na liji leḏi kanyin na ŋele na ŋɩma ŋɩmagelini ŋele ŋuŋun.

Nuba, Otoro New Testament

© British and Foreign Bible Society, 1966.

British & Foreign Bible Society
Lean sinn:



Sanasan