1 buṯrus 2 - ŋuɽun ŋun ŋiya ŋun ŋikaiilo elo 1966

asa 2 gɩdol gun gɩmiḏo na liji leḏi amɩrɩgen lun lɩpiḏo pɽul

¹ na ŋiro dino winɩl ḏɩkia mage wei na ḏirdəḏeico, na ŋuɽun ŋun ŋiro ganu ŋɩttən, na ḏɩɽeḏa kwiji ganu, na ŋuɽun ŋeḏi boinyaja gwiji.

² gi nyaɽe nyun nyilɩŋinu gwunnɩno, bunyɩl gworki ŋan ŋun ŋiro gwerkwe ŋeḏi ŋuɽun kani nyaŋbuḏe nyakədəḏɩni ga.

³ ḏa nyalmalɩŋaico nyalaŋarno gwele gwiŋir gwun gwiro elo.

⁴ nyalaṯɩwila lugwun, kɩdol gun gɩmiḏo gɩdonyo liji, namɩni gɩməṯinu ḏi elo giŋir gworki,

⁵ na nyaŋa dino gi nyɩdol nyun nyɩmiḏo, nyaṯuṯini kwu dunu gweḏi gwuɽɩwə, nyalro jɩsis jun jɩpiḏo pɽul jun jaṯɩgele ḏiḏuga ḏeḏi gwuɽɩwə ḏɩməməṯini ḏi elo yecu kɩrisṯo gwe.

⁶ na. dino ŋulinu kɩḏam ganu geḏi elo dino, eʼe, ŋilgele siʼun gɩdol geḏi gɩḏul gun gɩməṯɩnu ginəjinu, na gwun gwəmɩnyi gwate gwəṯi ḏare no.

⁷ na ŋiro dino nyaŋa lun ləmɩnyu, ḏinəjio ḏalo ḏiro, namɩni lun laṯe lɩdeŋɩnejilo no, gɩdol ke gun gɩdonyo liji lun luṯo gɩmaro lɽa leḏi gɩḏul,

⁸ na, gɩdol ge ḏobɩlkeja, na loɽi le ḏubɩliḏio, luŋa lo lobɩlkejo ŋuɽuna gi gwune ŋaṯe ŋəṯeijɩlo nəni no. ŋiro ŋeno ŋun ŋɩmaligelinijo.

⁹ namɩni nyaŋa nyalro liji lun lɩməṯɩnu, na jɩsis jeḏi gwele, na liji leḏi amɩrɩgen lun lɩpiḏo prul, na leḏi elo, kani nyumə ŋuɽuna ŋun ŋiŋir ḏɩbuḏia ḏe ŋuŋu gwun gwumajigwuloḏa kirɩm najigwuloḏeico bure gwuŋun gwun gwiŋir gworki.

¹⁰ nyaŋa gwerre ganu nya late liro liji no, namɩni gwunnɩno nyalamaro liji leḏi elo; gwune janya gwerre nya late linəḏɩnu no, namɩni gwunnɩno nyalmɩni əḏini.

¹¹ nyaŋa lun ləmɩnyɩlo, nyi gwuɽoṯeḏo lagalo gi liji lun laṯɩje gala gwola ganu na lun lɩwɩreḏelo, niarno nyalouwɩrico ŋuɽuna ŋeḏi jiŋɩno ŋun ŋaṯɩlrre lulo le.

¹² nanyaje muma gi jei ganu jeḏi liji lun liro ga dino, kani ḏa limuməḏəṯo lagalo gi lun laṯape ŋuɽun ŋun ŋɩki, nalmɩni buḏi eloŋu gi lamon le ḏiɽeleḏeica liŋəje ga gwan ŋuɽun ŋalo ŋun ŋiŋir ŋun ŋaṯɩlɩnŋalaḏe.

ḏɩtieno ŋele ŋeḏi lakuma

¹³ dɩtienɩl ŋuɽuna wei ŋun ŋɩḏuḏɩnu ga ŋeḏi liji ŋan gwele gwun gwiro elo, ḏa gwele gweḏi liji maje kɩɽelo ŋuɽun wei,

¹⁴ i lɩmudir gi luŋa lun liwəjɩnu lugwun nalakɩmi liji lun lapo ŋuɽuna ŋɩki, na ŋwuliŋiri gi lun laɽo ŋuɽuna ŋiŋir.

¹⁵ gi gwune ŋuɽun ŋun ŋɩbunyɩlo elo ŋiro naŋanyalduji ŋun ŋiŋir ŋanyaŋijinye gworo gweḏi liji lun ŋaṯɩlumə ga ŋɩɽilo ŋe.

¹⁶ nyamɩni ji muma gi liji lun likədəḏɩnu ga, nyamɩni dujia ḏɩkədəḏɩnə ga ḏalo gi giria gun gaṯɩkɩɽɩbə ŋɩdio ŋun ŋɩki no, nyamɩni ro gi lɩwainy leḏi elo.

¹⁷ nəjil liji wei. əmɩnyil lɩmage. donyɩl eloŋu. nəjil gwelɩnya.

ŋuɽun ŋun ŋɩmaje ŋɩru

¹⁸ nyaŋa jaḏam, məṯɩl ŋelɩnya ŋeḏi lele lalo ŋɩḏe ŋe wei, lədu lun liŋir lun laṯape ŋɩru ŋɩḏuḏɩnu ga kuwei no, namɩni dino lun late laṯape ŋuɽuna ŋun ŋɩḏuḏɩnu ga no.

¹⁹ na ŋeno ŋɩməṯɩnu, ḏa gwiji gwete kalo geḏi ḏugwor ḏuŋun gi jei ganu jeḏi elo, gwaṯape ŋuɽuna ŋun ŋɩbɩɽe na ḏɩḏia jai na gwate gwɩki no.

²⁰ namɩni ḏoɽeḏa ḏaḏa ḏa nyalmaṯɩgwuruṯɩmini ŋidujianyalo ŋun ŋɩki aṯanyaḏoḏeice ŋuɽuna ga? namɩni ḏa nyalmape ŋuɽuna ŋiŋir nyaliḏe gwan ŋeno nyalḏoḏeico ŋuɽuna ga, ŋeno ŋɩməṯɩnu ḏi elo.

²¹ na ŋeno nyalorniḏɩnu, gi gwune kɩrisṯo dino gwiḏo gwan nyaŋa ŋajilgelijene ŋiro dino, kani nyalgwujane ŋwara ganu,

²² gwun gwate gwapo ŋuɽuna ŋetɩdo ŋɩki no, nate nalɩnbuje gi linyu luŋun ŋe ḏirdəḏeico no.

²³ gi gwune gwiḏenɩnu numɩni ate nunɩwəɽeice nanu no, na gwune nuiḏe nate nunɩgelijo ŋuɽuna ŋɩbɩɽe no, numɩni ḏəḏə gwula gwuŋun gwun gwakɩmiḏo ḏakɩmiḏa ḏiḏuḏɩnu ŋa.

²⁴ na ŋu mape ŋuɽuna ŋage ŋun ŋɩki kaŋɩnu yuŋun gi luɽi lun lɩmalɩḏo ganu, kani ilai ŋuɽun ŋun ŋɩki nilmamiḏe ḏɩpiḏa ḏe pɽul; nyalmamiḏe dəɽi de duŋun.

²⁵ gi gwune gwerre nyalro gi joŋol jun jouwɩreḏelo, namɩni nyalmaɽuwa gwunnɩno kwaɽa gweḏi lulo lalo na gwun gwajidɩme.