YUDAS 1 - BOWOT BOHUA

¹ Konduang-konduang ijo jari tona'ah, tutang ijo paham tonongasih bain Pohotala, Amai, hawui tonojaga bagi Yesus Kristus. Kolou jihpon Yesus Kristus, ahku – Yudas – konduang tahkan Yakobus,

² moharap: Keleh Pohotala nonga borehkat, pononganasi, tutang kosanang ahkan'kam honong bolowi-lowi.

Guru-guru alik

³ Konduang-konduang ijo tonongasih! Ahku tu'u-tu'u bokohondak ngirim surat ahkan'kam, tohou solamat ijo ihto hombo-homboh jari nginyamoh. Tahpi huntuh ahku anyamoh tojuhung ahkan mopingat ihkam umba surat tuh, mangat ihkam turus ngolahi ahkan koporocaya ijo jari sino tikat tononga Pohotala ahkan turus-jahamoh ahkan ukup-Oh.

⁴ Kotului earo ihto ngota'anoh anai nyombihti-nyombihti ulun ijo botatu, ijo nosolat nyolong nokuh louk ihto. Iro ulun-ulun bejad ijo mutarmokilaoh borihta, tohou pononganasi Pohotalan ihto, ahkan dahpot kosapet momedaoh kojolik bolai iro. Tutang iro nulak Yesus Kristus, ijo ihco-ihcooh Pongowasa tutang Tuhan ihto. Tahkan lomoi hukuman ahkan iro jari tonujum luwang Surat Borasih.

⁵ Paring orih ihkam jari kota'an. Tahpi ahku jolik mopingat ihkam tohou koloukuwoh Tuhan monyolamat ukup Israel tahkan lowu Misir, tahpi pongohuli morusak ulun-ulun ijo eam porocaya ang marak iro.

⁶ Ingatrih, ka'a, dolang molehkat ijo nokalou holat-holat kowasan iro, nyiring tulak nohtahoh unuk mohcon iro. Pohotala masung molehkat-molehkat rih, umba rantai abadi, ang luwang unuk ijo pindong ang pinda tana. Ang anan iro tonahan turus johcok hukuman ijo tongonyahtu nokuh ngosan iro ang Ondou ijo hebat rih noin.

⁷ Ingatrih ka'a, lowu Sodom tutang Gomora, hawui lowu-lowu ang hokodiling, ijo rayatoh nguan hal-hal kolou ijo tonguan bain molehkat-molehkat orih. Iro nguan hal-hal ijo kihal tutang bejad, nyiring iro tonosiksa umba hukuman baho ijo kototahiu, ahkan monjadi pongingat bagi paring ulun.

⁸ Kolourih ka'a nyombihti-nyombihti rih, bohayal-hayal nyiring iro nguan dusa, toharep behtin iro bongoi. Iro nopahjah randah kowasan Pohotala tutang mohina kokaro angbolum ijo tonohoromat ang Soruga.

⁹ Mikhael bongoi, ijo mongopala dolang molehkat, eam pu'u nguan kolourih. Ang ohkot io hokolawan umba Sehtan a'ang hotokian tohou iai ijo ahkan ngondahpot otun Museh, Mikhael eam bohanyi mosara Sehtan umba auh-auh mohina. Mikhael tihkas nuhtui, ‘‘Tuhan ahkan ngorahang ihko!’’

¹⁰ Tahpi umba pohina-pohina'an, ulun-ulun rih, nyarang kokaro ang'co ijo iro eam horahti. Iro sama kolou ohcin-ohcin ijo eam anai ahkaroh, ijo ngota'an hal-hal umba nanyamoh. Tahpi justru hal-hal orih, ijo kotuluioh kolonyuh iro.

¹¹ Colahka iro! Iro jari nitoi jalan, ijo tonyuru bain Kain. Mangat dahpot duit, iro nombohos arop luwang dahtah kolahcat, sama kolou Bileam. Tutang iro ka tolonyuh, tului molawan kolou Korah.

¹² Aang ohkot ihkam napa pesta ukun, hadat ulun-ulun rih mombusou ang marak ihkam. Tului iro kuman hawui kobongo eam aro mia-mia, tutang tihkas kogunan aropoh bongoi. Iro kolou baunondou ijo tonahpi bain bahiu, tahpi eam mosuluh uhjan. Iro ka'a kolou pu'un ijo eam mohasil bua, oluka musim bua-mamua, pu'un-pu'un ijo jari tojawut uhatoh tutang jari mahtoi samasino.

¹³ Sama kolou luhcak ijo nyawung ang tasik, polombut puhtak, kolourih ka'a iro hopohtak gawiu-gawiu ijo ngomia. Iro anairih kolou potion-potion ijo kindah-kondaha, tutang ijo jari tonyodia unukoh bain Pohotala, ang luwang kopindong, ijo paling paham ahkan turus-jahamoh.

¹⁴ Henoh, lihit ijo kopitu tahkan Adam, lomoi pu'u nujum tohou ulun-ulun rih. Henoh homouh, ‘‘Nohto, Tuhan ahkan lombut umba bokuhjan-kuhjan molehkat-molehkat-Oh ijo borasih,

¹⁵ ahkan mosara paring ulun. Tuhan ahkan mohukum ulun-ulun ja'at tului gawin-gawin iro ijo bejad. Tutang Io ahkan mohukum ulun-ulun bodusa tutang bosala, kotului paring auh pohina'an ijo konohawotohrih.’’

¹⁶ Ulun-ulun rih toturus iou bokuhtuk tutang nosalan ulun bohkon. Iro bolum numbun kojolik-kojolik iro ijo bodusa. Iro panderalik tohou aropoh bongoi, tutang monjilat ulun mangat duon utung.

Pongingat tutang tingak

¹⁷ Tahpi Konduang-konduang'ku ijo tonongasih! Ingatrih ahkan inon ijo soun tomborihta, bain rasul-rasul Tuhan ihto Yesus Kristus.

¹⁸ Iro mborihta labih soun ahkan'kam, ijo doni lain jaman, ahkan lombut ulun-ulun ijo ahkan hololenge ihkam, io rih ulun-ulun ijo bolum numbun kojolik-kojolik iro ijo bodusa.

¹⁹ Iro tuhrih ulun-ulun, ijo polombut kopusit. Iro eam konowasa bain Roh Pohotala, molekan bain kojolik-kojolik hadat dasar kolunon tuh.

²⁰ Tahpi ihkam, Konduang-konduang'ku, mbinaoh toturus pombolum ihkam hogalang porocaya'mu umba Yesus Kristus. Koporocaya'mu rih paham borasih. Pondehan rih bodo'a umba kowasa Roh Pohotala,

²¹ tutang bolumrih toturus ang pinda kosingou kasih Pohotala kotahin ihkam ngindoi pononganasin Yesus Kristus Tuhan ihto, ijo ahkan nonga ahkan'kam pombolum sojahti tutang kototahiu.

²² Toharep ulun-ulun ijo bembang ahtoioh, hondakrih ihkam ngorinah kasih mongasih.

²³ Nguhut rih ulun-ulun soluka tahkan luwang baho, ahkan monyolamatoh iro. Toharep ulun-ulun bohkonoh, hondakrih ihkam ngorinah kasih mongasih tonohawui nanyam mihkoh, tahpi bosingirih nyiring hahtin iro ka ijo jari tongoluhtak umba kojolik iro ijo bodusa.

Do'a tara

²⁴ Pohotala ijo sanggup mojaga, mangat ihkam ara ngonyahtu, tutang ijo sanggup ngomin ihkam nokuh toharep-Oh ijo tohoromat honong kojorih tutang earo kosalai.

²⁵ Iorih ihco-ihcooh Pohotala, Ponyolamat ihto nguha Yesus Kristus Tuhan ihto. Iorih Pohotala ijo tonohoromat Hajo, Bokowasa tutang Bopongaroh tahkan jaman houn lomoi nyiring huntuh tutang ahkan turus-jahamoh! Amen.