YOHANES 17 - BOWOT BOHUA

Yesus bodo'a ahkan murid-murid-Oh

¹ Uli hopander kolouorih, Yesus nokara nokuh langit tutang nuhtui, ‘‘Amai, huntuh jari johcok ohkotoh. Pohajoohrih Anak-Mu, mangat Anak-Mu ka mopohajo Amai.

² Amai jari nonga kowasa ngosan sohopus ukup kolunon ahkan Anak, mangat Io nonga pombolum sojahti tutang kototahiu, ahkan paring ulun ijo Amai nongarih ahkai-Oh.

³ Tuhrih pombolum ijo sojahti tutang turus-jaham; mangat ulun ngosono Amai, puna ihco-ihcooh Pohotala ijo morong, tutang ngosono Yesus Kristus ijo sonuhu bain Amai.

⁴ Ahku jari mopohajorih Amai ang ngosan tana tuh, hapan ngumbotoh konuak-Ku ijo Amai nyuhu ahkak-Ku.

⁵ Amai! Pohajoohrih Ahku uhuntuh aang Amai, honong kohajo ijo Ahku tepui hihco Amai sounumba kolunon tuh tona'oi.

⁶ Ahku jari pokosonorih Amai ahkan ulun-ulun tahkan kolunon tuh, ijo jari Amai nongaoh ahkak-Ku. Iro anairih ain Amai, tutang Amai jari nongaoh iro ahkak-Ku. Iro jari numbunoh auh Amai.

⁷ Uhuntuh iro ta'an ijo paring ijo Amai nongaoh ahkak-Ku, asaroh tahkan Amai.

⁸ Jari Ahku nuhtuioh ahkan iro auh ijo Amai nongaoh ahkak-Ku; tutang iro jari norimaoh. Iro ta'an ijo Ahku moro-morong tahkan Amai tutang iro porocaya ijo Amairih ijo jari nyuhu Ahku.

⁹ Ahku bodo'a bagi iro. Ahku eam bodo'a bagi kolunon, molekan bagi ulun-ulun ijo jari Amai nongaoh ahkak-Ku, tului iro anairih ain Amai.

¹⁰ Paring aik-Ku anairih ain Amai ka'a; tutang paring ain Amai orih anairih aik-Ku ka'a. Ahku tonohajo ang louk iro.

¹¹ Uhuntuh Ahku kani lombut nokuh Amai. Ahku eam mohcon hino ang kolunon; tahpi iro anai ang kolunon. Amai ijo borasih! Jaga rih iro umba kowasan aran Amai, io orih aran ijo jari Amai nongaoh ahkak-Ku – mangat iro monjadi ihco, sama kolou Amai tutang Ahku ka'a ihco.

¹² Ang ohkot Ahku magun hihco umba iro, Ahku jari mohaga iro umba kowasa aran Amai – aran ijo Amai nongaoh ahkak-Ku. Ahku jari mohaga iro tutang eam ihcobehti ka tahkan iro nihou, kocoali io ijo puna jari kopahtutoh nihou; mangat honong orih nyolungrih inon ijo tonyurat a'ang Surat Borasih.

¹³ Uhuntuh Ahku lombut nokuh Amai. Paringoh tuh Ahku nuhtuioh pondehan Ahku magun ang kolunon; mangat iro umba kotuwioh nginyamoh kojorihaik-Ku.

¹⁴ Ahku jari nyiaroh ahkan iro auh Amai, tutang kolunon bosingi umba iro, tului iro eam ain kolunon, sama kolou Ahku ka'a eam ain kolunon.

¹⁵ Ahku eam nyawot, mangat Amai ngomin iro tahkan kolunon tuh, tahpi Ahku nyawot mangat Amai mohaga iro tahkan ijo Ja'at.

¹⁶ Sama haloh, kolou Ahku eam ain kolunon, iro ka eam ain kolunon.

¹⁷ Jadiohrih iro ain 'cokobilah Amai, nguha komorong; auh Amai orih puna komorong.

¹⁸ Kolou Amai jari nyuhu Ahku nokuh kolunon, kodorih ka'a Ahku nyuhu iro nokuh kolunon.

¹⁹ Bagi gunan iro, Ahku nyorahoh arop kolou ain 'cokobilah Amai, mangat iro ka monjadi 'cokobilah ain Amai nguha kotu'u.

²⁰ Eam baya ahkan iro tuh iou Ahku bodo'a. Ahku ka'a bodo'a ahkan ulun-ulun ijo ahkan porocaya umba Ahku, bain kosaksian iro tuh.

²¹ Ahku nyawot, Amai, mangat iro paringoh monjadi ihco, kolou Amai hihco umba Ahku, tutang Ahku hihco umba Amai. Keleh iro monjadi ihco umba Ihto, mangat kolunon porocaya ijo Amai ijo nyuhu Ahku.

²² Ahku jari nongarih iro kohajo ijo Amai nongaoh ahkak-Ku, mangat iro monjadi ihco, sama kolou Ihto ka'a ihco;

²³ Ahku umba iro, tutang Amai umba Ahku; mangat iro moro-morong ihco. Mahka kolunon akan ta'an, ijo Amai iou ijo nyuhu Ahku, tutang ijo Amai ka'a ngasih iro, kolou Amai ka'a ngasih Ahku.

²⁴ Amai, Ahku jolik mangat iro, ijo Amai nongaoh ahkak-Ku, anai hihco Ahku ang unuk Ahku anai, mangat iro nohto kohajon aik-Ku; iorih kohajon ijo Amai nongaoh ahkak-Ku, kotului Amai ngasih Ahku sounumba kolunon tuh tona'oi.

²⁵ Amai ijo adil! Kolunon eam kosono Amai, tahpi Ahku ngosono Amai; tutang ulun-ulun tuh ta'an ijo Amai nyuhu Ahku.

²⁶ Ahku jari ngorinah aran Amai ahkan iro; tutang Ahku ahkan toturus nguai kodorih, mangat kasih Amai ahkak-Ku tohtap ang luwang ahtoi iro tutang Ahku hihco umba iro.’’