YOHANES 15 - BOWOT BOHUA

Yesus pu'un anggur ijo morongtu'u

¹ Hion Yesus hino, ‘‘AHKU TUH PU'UN ANGGUR IJO MORONGTU'U, TUTANG AMAI-KU ANAI TUHKANG KOBUNOH.

² Nyinong da'an aang Ahku ijo eam pomua, tonuhtuh-Oh, tutang nyinong da'an ijo pomua diai honjiot dauioh mangat labih aro hino buaoh.

³ Ihkam jari borasih tului ajaran ijo Ahku nongaoh ahkan'kam.

⁴ Tohtaprih hihco umba Ahku tutang Ahku ka'a ahkan tohtap hihco a'ang ihkam. Da'an bongoi eam tou momua, kocoali amat io tohtap aang batangoh. Kodorih ka'a ihkam tihkas tou momua, amat tohtap hihco a'ang Ahku.

⁵ AHKU TUH PU'UN ANGGUR, TUTANG IHKAM RIH DA'AI-DA'AIOH. Ulun ijo tohtap hihco honong Ahku, tutang Ahku honong io, ahkan momua aro; tului earo Ahku, ihkam eam tou monguanoh ino-inon.

⁶ Ulun ijo eam tohtap hihco honong Ahku ahkan ndian kolou da'an, turus jadi koring. Da'an-da'an ijo kolouorih ahkan tonipun tutang tonyakah nokuh baho turus bopahpong.

⁷ Amatmira ihkam tohtap hihco honong Ahku, tutang ajaran-Ku mohcon aang ahtoi'kam, nyawotrih umba Amai, inon iou ijo ihkam kani; sawot'kam rih ahkan tononga.

⁸ Amat ihkam mua aro, Amai-Ku konohajo; tutang honong kodorih ihkam tu'u-tu'u monjadi murid-Ku.

⁹ Kolou Amai ngasihoh Ahku, kodorih ka Ahku ngasihoh ihkam. Hondakrih ihkam tohtap bolum kolou ulun ijo Ahku ngasihoh.

¹⁰ Amat ihkam molalus poretah-poretah-Ku, ihkam tohtap te'et ahkan kasih-Ku, sama kolou Ahku tohtap te'et umba kasih Amai tului molalus poretah-poretah-Oh.

¹¹ Paringoh tuh Ahku mborihtaoh ahkan ihkam, mangat kojorih-Ku anai luwang ahtoi'kam, tutang kojorih'kam monjadi soporuna.

¹² Tuhrih poretah-Ku: Ngasih ohrih ihco sama 'jobohkon, sama kolou Ahku jari ngasih ihkam.

¹³ Ulun ijo paling mongasihoh sobat-sobatoh, anairih ulun ijo nonga pombolumoh bagi iro.

¹⁴ Ihkam tuh uras sobat-sobat-Ku, tului ihkam nguanoh inon ijo Ahku moretahoh ahkan'kam.

¹⁵ Ihkam eam hino Ahku na'ah jihpon, tului jihpon eam ta'an inon ijo rahat tonguan tepuioh. Ihkam Ahku na'ahoh sobat kotului paring ijo Ahku ngonih tahkan Amai, jari Ahku nyorihtaoh ahkan'mu.

¹⁶ Eam ihkam ijo mihtih Ahku. Ahku tuh ijo ngopili ihkam, tutang nyuhu ihkam tulak mangat ihkam momua aro – bua-bua ijo eam dahpot rusak. Mahka Amai ahkan nonga ahkan'kam inon ka'a ijo ihkam nyawot umba-Oh, ngosan arak-Ku.

¹⁷ Tuhrih poretah-Ku ahkan'kam: Hokasihrih sama arop'kam.’’

Kolunon ngohiri ihkam

¹⁸ ‘‘Amatmira kolunon ngohiri ihkam, pios ingat ijo Ahku jari labih houn tongohiri bain kolunon.

¹⁹ Jahkaioh ihkam puna ain kolunon, ihkam ahkan tonokasih bain kolunon rih kolou puna aiuoh. Tahpi Ahku jari ngopili ihkam tahkan kolunon tuh, jadi ihkam eam hino punaain kolunon. Orihrih kotuluioh kolunon ngohiri ihkam.

²⁰ Ingatlah inon ijo jari Ahku nuhtui ahkan'kam, ‘Jihpon eam labih hajo tahkan tepuioh.’ Amat iro jari ngarana Ahku, iro ahkan ngarana ihkam ka'a. Amat iro numbun auhajar-Ku iro ahkan numbun ajaran ihkam ka'a.

²¹ Paringoh rih ahkan iro nguaioh toharep ihkam, tului ihkam murid-Ku, bain iro eam ngosono Io ijo nyuhu Ahku.

²² Jahkaioh Ahku eam lombut tutang eam nuhtui paringoh rih ahkan iro, iro eam bodusa. Tahpi huntuh iro eam aro pahkingoh hino bagi dusan iro.

²³ Ulun ijo ngohiri Ahku, ngohiri Amai-Ku.

²⁴ Jahkaioh ang tohun-tohun iro, Ahku eam nguanoh hal-hal ijo jaha pu'u tonguan ulun bohkon, iro eam bodusa. Tahpi huntuh iro jari nohto inon ijo Ahku nguaioh, tutang iro ngohiri Ahku kanika Amai-Ku.

²⁵ Punajari koharusoh kodorih, mangat nyolung inon ijo tonyurat a'ang Buhku Torat iro, yorih: ‘Iro ngohiri Ahku earo pahkingoh.’

²⁶ Ahku ahkan nyuhu nokuh'kam Pondohop ijo asar tahkan Amai. Iorih Roh ijo ahkan ngorinah komorong tohou Pohotala. Amat Io lombut, Io ahkan nonga kosaksian tohou Ahku.

²⁷ Tutang ihkam ka'a harus nonga kosaksian tohou Ahku, tului ihkam jari hihco Ahku tahkan pahtukoh.