YOHANES 14 - BOWOT BOHUA

Yesus anairih jalan nihtu Amai

¹ ‘‘Ara ahtoi'kam bimbang,’’ hion Yesus umba iro. ‘‘Porocayarih umba Pohotala, tutang porocayarih umba Ahku ka'a.

² Ang lohpou Amai-Ku anai aro unuk mohcon. Ahku tulak nokuh anan ahkan monyodia unuk bagi'kam. Ahku eam ahkan nuhtui kodorih ahkan'kam, jahkaioh orih eam kolourih.

³ Uliumba Ahku tulak nahtap unuk ahkan'kam, Ahku hoduli hino tutang ngomin ihkam, mangat ang umoh Ahku anai, ang anan ka'a ihkam anai.

⁴ Nokuh unuk Ahku tulak ihkam ta'an jalanoh.’’

⁵ Turus Tomas nuhtui umba Yesus, ‘‘Tuhan, ihkai eam ta'an nokuh umoh Tuhan tulak, koloukuwoh ihkai ta'an jalanoh?’’

⁶ Yesus mutah, ‘‘AHKU TUH JALAN AHKAN NGOSONO POHOTALA TUTANG NGONDAHPOT POMBOLUM. EAM ARO IHCOBEHTI KA DAHPOT LOMBUT NOKUH AMAI AMAT EAM NOKALOU AHKU.

⁷ Jahkaioh ihkam ngosono Ahku, musti ihkam ahkan ngosono Amai-Ku ka'a. Huntuh ihkam ahkan ngosono Io, tutang jari nohto Io.’’

⁸ Mahka Pilipus nuhtui umba Yesus, ‘‘Tuhan, pokarahohrih Amai ahkan 'kai, mangat ihkai umbothuang.’’

⁹ Tahpi Yesus mutah, ‘‘Jari kolourih kotahiu Ahku hihco umba ihkam, tutang jaha ka'a ihkam ngosono Ahku, Pilipus? Ulun ijo jari nohto Ahku, jari ka'a nohto Amai. Koloukuwoh ihko dahpot nuhtui, ‘Pokarahohrih Amai ahkan 'kai’?

¹⁰ Pilipus! Eamkah ihko porocaya, ijo Ahku hihco umba Amai tutang Amai hihco umba Ahku? Inon ijo Ahku nuhtuioh ahkan'mu, eam Ahku nuhtui tahkan arop-Ku bongok. Amai ijo tohtap hihco honong Ahku, Iorih ijo nguanoh paringoh orih.

¹¹ Porocayarih honong Ahku ijo Ahku hihco honong Amai, tutang Amai hihco umba Ahku. Ata'ai soea-eamoh, porocayarih tului inon ijo jari Ahku nguaioh.

¹² Tu'u morong hiok-Ku tuh: Ulun ijo porocaya umba Ahku, ahkan nguanoh inon ijo Ahku jari nguaioh, – malah io ahkan nguan ijo labih hajo hino – tului Ahku tulak nokuh Amai-Ku.

¹³ Tutang inon ijo ihkam monyawotoh a'ang arak-Ku, orih ahkan Ahku nonga ahkan'kam, mangat Amai konohajo nguha Anak.

¹⁴ Inon iou ijo ihkam monyawot ngosan arak-Ku ahkan Ahku nguai.’’

Yesus nombowot Roh Pohotala

¹⁵ ‘‘Amat ihkam ngasihoh Ahku, ihkam ahkan molalusoh poretah-poretah-Ku.

¹⁶ Ahku ahkan nyawot ahkan Amai, tutang Io ahkan nonga ahkan'kam Pondohop bohkon, ijo ahkan mohcon dahang ihkam nyiring turus-jahamoh.

¹⁷ Io rih Roh Pohotala ijo ahkan ngorinah komorong tohou Pohotala. Kolunon eam dahpot norima Io, kotului eam nohto ata'ai eam ngosono-Oh. Tahpi ihkam ngosono Io, kotului Io mohcon umba ihkam, tutang ahkan ihco honong ihkam.

¹⁸ Ihkam eam Ahku ahkan nohtahoh bongon, kolou anak nulo. Ahku ahkan hoduli nokuh'kam.

¹⁹ Mohcon honjulu iou kolunon eam ahkan nohto Ahku hino. Tahpi ihkam ahkan nohto Ahku. Tutang tului Ahku bolum, ihkam ka ahkan bolum.

²⁰ Amat lombut ondou orih, ihkam ahkan kota'an ijo Ahku hihco honong Amai, ihkam hihco honong Ahku, tutang Ahku hihco honong ihkam.

²¹ Ulun ijo norima poretah-poretah-Ku, tutang nguaioh iorih ijo ngasihoh Ahku. Amai-Ku ahkan ngasih ulun ijo ngasihoh Ahku. Ahku ka ahkan ngasihoh ulun orih tutang ngorinahoh arop-Ku ahkaioh.’’

²² Hion Yudas (bohkon Yudas Iskariot) ngisok umba Yesus, ‘‘Tuhan, ombai Tuhan kani ngorinahoh arop-Mu ahkan ihkai tutang eam ahkan kolunon?’’

²³ Yesus mutah, ‘‘Ulun ijo ngasih Ahku, ahkan numbunoh ajaran-Ku. Amai-Ku ahkan ngasihoh io. Amai tutang Ahku ahkan lombut nokuh io, tutang mohcon hihco io.

²⁴ Ulun ijo eam ngasih Ahku, tutang eam numbun ajaran-Ku. Ajaran ijo konahan'kam orih, bohkon tahkan Ahku, molekan tahkan Amai ijo nyuhu Ahku.

²⁵ Paring orih Ahku nuhtui ahkan'kam, kotahin Ahku magun hihco ihkam.

²⁶ Tahpi Roh Pohotala, Pondohop ijo ahkan sonuhu Amai ngasan arak-Ku, Iorih ijo ahkan majar ihkam, koparingoh tutang mopingatoh ihkam ahkan paring ijo jari Ahku monyorihtaoh ahkan'kam.

²⁷ Kosanangkomangat Ahku nohtahoh ahkan ihkam. Kosanangkomangat aik-Ku bongok ijo Ahku nongaoh ahkan ihkam. Ijo Ahku nonga rih eam kolou ijo tongan kolunon ahkan'kam. Ara galisah ara mihkoh.

²⁸ Ihkam jari ngonih Ahku nuhtui, ‘Ahku ahkan tulak, tahpi Ahku ahkan lombut hoduli ahkan ihkam.’ Amat ihkam ngasih Ahku, ihkam sanang Ahku tulak nokuh Amai, tului Amai labih hajo tahkan Ahku.

²⁹ Ahku mborihta rih ahkan'kam huntuh, sounumba paringoh nyolung, mangat amat nyolung noin, ihkam ahkan porocaya.

³⁰ Ahku eam ahkan bopander labih aro hino umba ihkam, tului jari ohkotoh okon kolunon tuh lombut. Tahpi io eam bokowasa ngosan arop-Ku.

³¹ Tahpi oluka paring rih harus nyolung, mangat kolunon borondong ijo Ahku sita Amai tutang nguanoh kokaron ijo ponoretah Amai ahkak-Ku. Nah, olai ihto tulak tahkan ohtoi.’’