YOHANES 13 - BOWOT BOHUA

Yesus muhi pa'an murid-murid-Oh

¹ Ihcoondou sounumba tahkan Ondou Pesta Paska, Yesus jari ta'an ijo jari ohkotoh Io ahkan nohtah kolunon tuh ahkan buli nokuh Amai-Oh. Io ngasih umba ulun-ulun ijo monjadi aiu-Oh ang kolunon tuh, tutang Io tohtap ngasih iro nyiring ko-opahoh.

² Yesus tutang murid-muridoh rahat kuman ngolomi. Sehtan jari nyolong nonga tiruk ang luwang ahtoi Yudas anak Simon Iskariot ahkan ngarana Yesus.

³ Yesus ta'an ijo Amai jari nonga paring kowasa ahkai-Oh. Io ta'an ka'a ijo Io lombut tahkan Pohotala tutang ahkan buli nokuh Pohotala.

⁴ Kotului orih Io tombok nguhkoi kolambiombu-Oh, tutang mohtong handuk aang kahang-Oh.

⁵ Uliorih Io nusuh danum nokuh luwang gadur, turus nopara muhi pa'an murid-murid-Oh, tutang ngapitoh umba handuk ijo tomohtong aang kahang-Oh.

⁶ Johcokrih Io ang gilir Simon Petrus, ijo nuhtui, ‘‘Tuhan, kuwohrih Tuhan ijo muhi pa'ak'ku?’’

⁷ Yesus mutah, ‘‘Uhuntuh ihko eam solembang, inon ijo Ahku nguaioh tuh, tahpi noin ihko ahkan solembang.’’

⁸ ‘‘Ara, Tuhan,’’ hion Petrus umba Yesus, ‘‘ara sosino Tuhan muhi pa'ak'ku!’’ Tahpi Yesus mutah, ‘‘Amat Ahku eam muhi ihko, ihko eam aro kohihco umba Ahku.’’

⁹ Simon Petrus nuhtui, ‘‘Amat kodorih, Tuhan, ara baya pa'ak'ku tahpi longok tutang kuhung'ku ka'a!’’

¹⁰ ‘‘Ulun ijo jari mondus, jari borasih sohopusoh,’’ hion Yesus umba Petrus. ‘‘Io eam usah tonorasih hino, kocoali pa'aioh. Ihkam tuh jari borasih, tahpi eam paringoh.’’ (

¹¹ Yesus jari ta'an iai ijo ahkan ngarana Io. Kotului orih Io nuhtui, ‘‘Ihkam tuh jari borasih, tahpi eam paringoh.’’)

¹² Uli Yesus muhi pa'an iro. Io mokehpan huli jubah-Oh tutang tuot hino. Turus Io nuhtui umba iro, ‘‘Solembangrih ihkam inon ijo punak iou Ahku nguai ahkan'kam?

¹³ Ihkam na'ah Ahku Guru tutang Tuhan. Tutang puna kolourih.

¹⁴ Amat Ahku kolou Tuhan tutang Gurun'kam muhi pa'an'kam, ihkam puna harus ka'a hotolinjam muhi pa'a.

¹⁵ Ahku nonga sutu tuh ahkan'kam, mangat ihkam ka'a nguan inon ijo jari Ahku nguai ahkan'kam.

¹⁶ Tu'u-tu'u morong hiok-Ku tuh: Ihcobehti jihpon eam labih hajo umba tepuioh, tutang ihcobehti sonuhu eam labih hajo umba ijo nyuhuoh.

¹⁷ Amat ihkam jari ta'an paringoh tuh, sananglah amat ihkam nguaioh.

¹⁸ Inon ijo Ahku nuhtuioh tuh, eam rih tohou ihkam paring. Ahku ta'an ia-iai ijo jari Ahku mitihoh. Tahpi inon ijo tonyurat luwang Surat Borasih harus nyolung, iorih ‘Ulun ijo kuman homboh Ahku, ahkan ngolawan Ahku.’

¹⁹ Hal orih Ahku mborihtaoh ahkan'kam uhuntuh, hounumba nyolung, mangat amat hal orih nyolung noin, ihkam ahkan porocaya ijo Ahku tuh Io, ijo konohawot AHKU ANAI.

²⁰ Tu'u morong auh'Ku tuh: Iai norima ulun ijo Ahku nyuhuoh, ulun orih norima Ahku ka'a. Tutang iai ijo norima Ahku, norima Io ijo nyuhu Ahku.’’

Yesus nujum tohou ulun ijo ngarana Io

²¹ Uliumba Yesus nuhtui kodorih, Io sihkinanyam sasino. Turus Io nuhtui, ‘‘Tu'u morong hiok-Ku tuh: Anai ihcobehti tahkan louk ihkam ahkan ngarana Ahku.’’

²² Murid-murid-Oh hotopahjah sama arop iro hawui paham helan kotului eam ta'an iai ijo konohuang.

²³ Murid ijo tongasih Yesus, tuot ang silan Yesus.

²⁴ Simon Petrus nonga tanda ahkaioh, mangat io ngisok umba Yesus iai ijo titun konohuangoh.

²⁵ Mahka murid-Oh rih morateparopoh aang Yesus, tutang ngisok, ‘‘Iai io Tuhan?’’

²⁶ Yesus mutah, ‘‘Ulun ijo Ahku nonga luhte ijo Ahku ninjokoh nokuh luwang pikan, iorih uluioh.’’ Mahka Yesus ngomin ihcokobitap luhte, ninjokoh nokuh luwang pikan; turus nongaoh ahkan Yudas anak Simon Iskariot.

²⁷ Tona'a uliumba Yudas norima luhte rih, sehtan nyolong nokuh luwang ahtoioh. Turus Yesus nuhtui umba io, ‘‘Nguaiohrih jeleng iou inon ijo kani ihko nguaioh.’’

²⁸ Eam ihcobehti ka tahkan iro ijo tuot kuman ang anan solembang auh orih, ombai Yesus nuhtui kodorih umba Yudas.

²⁹ Anai ijo ngohu Yesus nyuhu Yudas moli angihco ijo tomorulu ahkan pesta rih, ata'ai nonga honjiot isut duit ahkan ulun-ulun porosbolum – tului Yudas nambit duit kas iro.

³⁰ Uliumba Yudas kuman luhte rih, io cahpat soluka. Ondou jari pindong.

Poretah ijo bohua

³¹ Uliumba Yudas hihkas, Yesus nuhtui, ‘‘Huntuh Anak Ulun konohajooh, tutang Pohotala konohajo nguha Io.

³² Amat Pohotala konohajo nguha Io, Io ka'a ahkan konohajo bain Pohotala nguha arop-Oh bongoi. Malah Pohotala ahkan mopohajo Io honong jeleng.

³³ Anak-anak-Ku, Ahku eam ahkan mohcon tahi hino umba ihkam. Ihkam ahkan ngurah Ahku, tahpi kolou ijo jari Ahku nuhtuioh ahkan dolang okon Yahudi, kodorih ka'a Ahku nuhtui ahkan ihkam; nokuh unuk Ahku tulak, ihkam eam dahpot lombut.

³⁴ Poretah bohua Ahku nongaoh ahkan'kam: Hokasih ihco umba 'jobohkon sama kolou Ahku ngasih ihkam, kodorih ka'a ihkam harus saling hokasih.

³⁵ Amat ihkam saling mongasih, paring ulun ahkan ta'an ijo ihkam murid-murid-Ku.’’

Tujum ijo Petrus ahkan ngulim Yesus

³⁶ ‘‘Tuhan, Tuhan kani hihkas nokuh umoh?’’ hion Simon Petrus ngisok umba Yesus. Mutah Yesus, ‘‘Nokuh amoh Ahku hihkas, ihko eam duon umba huntuh. Ihko ahkan ngahasu Ahku pongohino.’’

³⁷ ‘‘Tuhan, ombai ahku eam duon ngahasu Tuhan huntuh?’’ kisok Petrus hino, ‘‘Ahku rela mahtoi bagi Tuhan!’’

³⁸ Yesus mutah, ‘‘Tu'u-tu'urih ihko rela mahtoi bagi-Ku? Ngota'an iou, sountahkan dalungmanuk nandu noin, ihko jari tolu tihkat nuhtui ijo ihko eam ngosono Ahku!’’