YOHANES 1 - BOWOT BOHUA

Auh ijo nonga pombolum

¹ Aang pahtukoh, sounumba kolunon tonapa, Auh jari anai. Auh anai hihco Pohotala tutang Auh sama umba Pohotala.

² Tahkan pahtukoh Io hihco Pohotala.

³ Kokarooh tonapa nguha Io, tutang tahkan kokaro ijo anai, eam ihco ka tonapaoh earo Io.

⁴ Auhrih tohasak pombolum, tutang pombolum nonga koloang ahkan kolunon.

⁵ Koloang rih monyingah luwang kopindong, tutang kopindong eam dahpot mombolopoh.

⁶ Lombut rih ulun ijo tonyuhu Pohotala, Yohanes araioh.

⁷ Io lombut momborihtaoh tohou koloang rih, mangat paring ulun porocaya.

⁸ Io bongoi bohkon koloang orih, io baya momborihtaiuoh.

⁹ Koloang sojahti ijo mopoloang paring kolunon, lombut nokuh kolunon.

¹⁰ Auh anai ang kolunon, kolunon tonapa nguha Io, tahpi kolunon eam kosono-Oh.

¹¹ Io lombut nokuh lowui-Oh bongoi tahpi uhtus-Oh eam norima Io.

¹² Olukolouorih anai ka'a ulun ijo norima Io tutang porocaya umba-Oh; iro tononga-Oh hak monjadi Anak Pohotala,

¹³ ijo tonganakoh bohkon tahkan ulun, tului bolum bohua rih tahkan Pohotala asaroh.

¹⁴ Auh jari monjadi ulun, Io mohcon ang louk ihto, tutang ihto jari nohto kohajoi-Oh. Kohajoi orih tonorima-Oh kolou anak tukan Amai. Nguha Io ihto nohto Pohotala tutang kasih-Oh ahkan ihto.

¹⁵ Yohanes lombut kolou saksi-Oh, io momborihta rih: ‘‘Tuhrih Io ijo ahku nuhtuioh: Io ahkan lombut labih pongohuli tahkan ahku, tahpi labih hajo tahkan ahku, kotului sounumba ahku anai, Io jari anai.’’

¹⁶ Io tuwi umba kasih; earo kotondooh, Io mborehkat ihto.

¹⁷ Hukum Tuhan ihto torima nguha Museh. Tahpi kasih tutang kotehen Pohotala tongorinah nguha Yesus Kristus.

¹⁸ Eam aro ijo pu'u nohto Pohotala bohkonumba anak tukan Amai, ijo sama umba Amai tutang lehket sino umba Io. Iorih ijo ngorinah Amai ahkan ihto.

Kosaksian Yohanes

¹⁹ Dolang pongowasa Yahudi ang Yerusalem nyuhu imam-imam tutang ulun-ulun Lewi tulak nokuh Yohanes tutang ngisokoh umba io, ‘‘Ihko tuh iai?’’

²⁰ Yohanes mongahku honong torus-tarang, ‘‘Ahku bohkon Lahca Ponyolamat.’’

²¹ ‘‘Amat kolourih ihko tuh iai?’’ kisok iro. ‘‘Inonrih ihko Elia?’’ ‘‘Bohkon,’’ putah Yohanes. ‘‘Inonrih ihko Sang Nabi orih?’’ iro ngisok hino. ‘‘Bohkon,’’ putahoh.

²² ‘‘Amat kolouorih, nuhtuiohrih ahkan ihkai, iai ihko tuh,’’ hion iro, ‘‘mangat ihkai dahpot nonga putah ahkan ulun-ulun ijo nyuhu ihkai. Inon hiom tohou arop'mu bongom?’’

²³ Yohanes mutah, ‘‘Ahkurih io ijo tonuhtuioh bain Nabi Yesaya: ‘Ulun ijo na'ah-na'ah ang padang balambah: Ngomorongohrih jalan ahkan Tuhan.’ ’’

²⁴ Ulun-ulun ijo tonyuhu bain ulun Parisi orih

²⁵ ngisok, ‘‘Amat ihko bohkon Lahca Ponyolamat, bohkon Elia, bohkon ka'a Sang Nabi orih, ombai ihko mopondus?’’

²⁶ Yohanes mutah, ‘‘Ahku mopondus umba danum. Tahpi anai anglouk tohun ihkam, anai Ulun ijo eam ihkam kosonooh.

²⁷ Io lombut labih pongo tahkan ahku, tahpi ahkan nguwat kahut soruhpah-Oh ka ahku eam pahtut.’’

²⁸ Paringohrih nyolung ang Betania, hila timur Sungoi Yordan unuk Yohanes mopondus.

Anak tobirin Pohotala

²⁹ Anghawun ondouoh Yohanes nohto Yesus lombut ahkaioh. Turus Yohanes nuhtui, ‘‘Nohto, orihrih Anak Tobirin Pohotala ijo ngapit dusan kolunon.

³⁰ Iorih ijo ahku nuhtuioh ahkan lombut pongo tahkan ahku, tahpi labih hajo tahkan ahku, tului hounumba ahku konanak, Io jari anai.

³¹ Sounumbaoh, ahku eam ta'an iai Io rih. Podahar ahku lombut mopondus umba danum, mangat uhtus Israel ngosono Io.’’

³² Yohanes ka'a nonga kosaksian tuh, ‘‘Ahku nohto Roh Pohotala mosuluh, kolou bulung dala tahkan langit, turus mohcon ang ngosan-Oh.

³³ Ohkot rih ahku jaha ta'an iai Io. Tahpi Pohotala ijo nyuhu ahku mopondus umba danum, jari nuhtui umba ahku, ‘Amat ihko nohto Roh Pohotala mosuluh, turus mohcon ang ngosan ihcobehti Iorih ahkan mopondus umba Roh Pohotala.’

³⁴ Ahku jari nohto-Oh bongok,’’ hion Yohanes, ‘‘tutang ahku nonga kosaksian ijo Io rih Anak Pohotala.’’

Murid-murid Yesus ijo pahtukoh

³⁵ Anghawun ondouoh Yohanes anai ang unuk rih hino homboh duo behti muridoh.

³⁶ Kotihka io nohto Yesus nguha, io nuhtui, ‘‘Topahjah! Orihrih Anak Tobirin Pohotala.’’

³⁷ Koduo behti murid Yohanes rih ngonih karon-auh orih, turus hihkas ngohasu Yesus.

³⁸ Yesus ngulos nokuh lihkut, tutang nohto iro rahat ngahasuoh Io. Io ngisok, ‘‘Ihkam ngurah inon?’’ Mutah iro, ‘‘Rabi, ang umohrih Rabi mohcon?’’ (Tuhtui ‘Rabi’ rimaioh guru.)

³⁹ ‘‘Olai nohtooh bongom,’’ hion Yesus. Iro tulak homboh Io tutang nohto umoh unuk Io mohcon. Ohkot rih jam ohpat sohit. Ondou rih iro mohcon umba Io.

⁴⁰ Anai ihco tahkan koduo behti ijo jari ngonih, inon ijo tonuhtuioh bain Yohanes, tutang pongohuli tulak ngahasu Yesus, anairih Andreas, konduang Simon Petrus.

⁴¹ Jio-jion Andreas ngurah Simon, konduangoh, tutang nuhtui umba io, ‘‘Ihkai jari hosombang umba Mesias!’’ (Mesias sama umba Kristus, iorih: Lahca Ponyolamat.)

⁴² Andreas ngitot Simon nokuh Yesus. Yesus nutuneng Simon, hawui nuhtui, ‘‘Ihko Simon anak Yona. Ihko ahkan konohawot Kefas.’’ (Kefas sama umba Petrus, rimaioh: puruk bahtu.)

Yesus na'ah Pilipus tutang Natanael

⁴³ Anghawun ondouoh Yesus monuhkasoh ahkan tulak nokuh Galilea. Io hosombang umba Pilipus, tutang nuhtui umba io, ‘‘Olai, ngahasu Ahku!’’

⁴⁴ Pilipus asaroh tahkan Betsaida, yorih unuk mohcon Andreas tutang Petrus.

⁴⁵ Pilipus monyombangoh umba Natanael tutang nuhtui umbaoh, ‘‘Ihkai jari nyombangoh ulun ijo konohawot bain Museh a'ang buhku Turat Pohotala, tutang ijo tomborihta bain nabi-nabi. Iorih Yesus tahkan Nasaret, anak Yusep.’’

⁴⁶ Tahpi Natanael mutah, ‘‘Duonrih angihco ijo pios lombut tahkan Nasaret?’’ ‘‘Olai, nohto bongom,’’ hion Pilipus.

⁴⁷ Yesus nohto Natanael lombut, turus nuhtui tohou io, ‘‘Nohto, orih ulun Israel sojahti. Eam aro pobula aangoh.’’

⁴⁸ ‘‘Koloukuwoh Amai ngosono ahku?’’ Natanael ngisok umba Yesus. Yesus mutah, ‘‘Sounumba Pilipus na'ah ihko, Ahku jari nohto ihko ang pinda batang sikun rih.’’

⁴⁹ ‘‘Amai Guru,’’ hion Natanael, ‘‘Amai anairih Anak Pohotala! Amai rih Lahca uhtus Israel!’’

⁵⁰ Yesus nuhtui, ‘‘Ihko porocaya, baya tului Ahku nuhtui rih ijo Ahku jari nohto ihko ang pinda batang sikun orih? Hal-hal ijo mahcu labih hajo tahkan orih ahkan ihko nohto!’’

⁵¹ Hion Yesus huli, ‘‘Tu'u-tu'u, porocayalah, ihko ahkan nohto langit bokuap, tutang molehkat-molehkat Pohotala nuhkat nosuluh aang Anak Ulun.’’