YAKOBUS 4 - BOWOT BOHUA

Hosobat umba kolunon

¹ Tahkan umoh asaroh karon kolahi, tutang botengkar ang louk ihkam? Eamorih rih asar tahkan kojolik-kojolik'kam, ijo turus iou hokolahi ang luwang behtin'kam, ahkan dahpot kosanang kolunon!

² Ihkam jolik, tahpi eam ngondahpot, mahka ihkam kani munu! Ihkam bosomangat, tahpi eam mondinu inon ijo ihkam ngurah, mahka ihkam botengkar tutang hokolahi. Ihkam eam ngondahpot ino-inon kotului ihkam eam nyawot umba Pohotala.

³ Tutang amatka ihkam jari nyawotoh, ihkam ka eam ngondahpotoh, tului titun ponyawot'kam sala; inon ijo ihkam nyawotoh bayarih ahkan kosanang arop'kam bongon.

⁴ Ihkam anairih ulun ijo eam tehtep! Kota'anrih ihkam, ijo amat ihkam hopahkat umba kolunon, mahka ihkam monjadi musuh Pohotala? Jadi dolangiai kani monjadi sobat kolunon tuh, io ngonjodian aropoh musuh Pohotala.

⁵ Ara ngohu ijo Surat Borasih earo alasan nuhtui, ‘‘Ang luwang arop ihto, Pohotala ngina Roh ijo karas kojolikoh.’’

⁶ Oluka kolourih, pononganasi Pohotala ijo tononga ahkan ihto labih ba'as, tahkanumba kojolik-kojolik roh ihto rih. Orihrih kotuluioh ang luwang Surat Borasih tonyurat ka'a, ‘‘Pohotala ngolawan ulun ijo bojuhu, tahpi sobalikoh, Io ngasih ulun ijo randah ahtoi.’’

⁷ Kotului orih tunduk umba Pohotala, tutang lawanrih Sehtan, mahka Sehtan ahkan nokoru tahkan ihkam.

⁸ Ngondonirih Pohotala, tutang Pohotala ka'a ahkan ngondoni ihkam. Muhiohrih longon'mu, ihkam ijo bodusa! Tutang nokiningoh rih ahtoi'mu, ihkam ijo holambang ahtoi!

⁹ Hondakrih ihkam tu'u-tu'u monyasal tutang nangih hawoi nahtum; hondakoh kota'on'mu monjadi tangih, tutang kojorih'mu monjadi koporosahtoi!

¹⁰ Hondakrih ihkam morandah arop ang toharep Tuhan, mahka Tuhan ahkan ngahtang ihkam.

Auh tingak mangat ara nosalan ulun

¹¹ Konduang-konduang, ara saling moncela ata'ai monosalan. Ulun ijo moncela ata'ai nosalan konduangoh ijo sama-sama Kristen, io moncela ata'ai nosalan hukum Pohotala. Tutang amat ihkam nosalan hukum Pohotala, orih rimai ihkam eam numbun hukum-hukum rih, molekan monjadi hakimoh.

¹² Padahal tihkas ihco ijo bohak nonga hukum ahkan ulun tutang momuhtus ulun. Iorih Pohotala ijo bokowasa monyolamat tutang morusakoh. Jadi, iairih ihkam, nyiring ihkam kani nosalan sosama kolunon?

Popingat mangat ara mombual

¹³ Konduang-konduang ijo homouh, ‘‘Hondou tuh, ata'ai hawun ihkai ahkan tulak nokuh lowu Anu, tutang mohcon anan ihco toun kotahiuoh ahkan borahkang tutang ngurah duit,’’ – ngonih rih tingak'ku tuh.

¹⁴ Inon ijo ahkan nyolung umba pombolum'mu hawun, ihkam bongom ka eam mongota'aioh! Ihkam tihkas kolou asep ijo honjulu iou gihtan, pongohino dilap.

¹⁵ Soharusoh ihkam ngohawot koloutuh, ‘‘Amat Tuhan bokohandak ihkai ahkan bolum tutang nguan tuh ata'ai orih.’’

¹⁶ Tahpi uhuntuh ihkam tuh bojuhu tutang mombual. Paring bualan kolourih sala.

¹⁷ Tului orih, ulun ijo ta'an inon ijo hinut ijo harus io tononguaioh, tahpi eam tononguaioh, ulun rih bodusa.