YAKOBUS 3 - BOWOT BOHUA

Ilat kolunon

¹ Konduang-konduang! Ara aro-aro tahkan louk'kam ijo kani monjadi guru. Ihkam kota'an, ijo ihto ijo monjadi guru ahkan tomosara umba labih paham tahkan ulun bohkon.

² Ihto paringoh bojoin nguan kosalan. Tahpi ulun ijo eam pu'u nguan kosalan umba tuhtui-tuhtuioh, io ulun ijo soporuna, ijo duon mongowasa hopus aropoh.

³ Amat ihto kehpan tali gandali ang boun kuda mangat io numbun konohuang ihto, mahka ihto dahpot ngondali hopus behtin kuda rih.

⁴ Ominrih ka'a kapal kolou sutu. Oluka kapal anairih angihco ijo kolourih kohajoioh, tutang omin bain bahiu ijo paham, tahpika io tongondali bain pohipit ijo paling koik, numbun konohuang tuhkangngomburi.

⁵ Kolourih ka'a umba ilat ihto, oluka ilat ihto rih koik, tahpi amat io dahpot mopojuhu aropoh tohou hal-hal ijo hajo-hajo. Ngenangrih, eaminon kolumbah himba, dahpot tononyaha bain baho ijo paling koik!

⁶ Ilat sama kolou baho. Ang behtin ihto, io sama kolou tahasak koja'at, ijo moponanyap koja'at ahkan hopus behtin ihto. Umba baho ijo asaroh tahkan norahka, io monyaha sohopus pombolum ihto.

⁷ Kokaron mahcam ohcin bosiak, bulung, ohcin nyoli, tutang ohcindanum, dahpot bolinok, tutang jari ka'a tonolinok bain kolunon.

⁸ Tahpi ilat kolunon eam dahpot tonolinok bain ihcobehti ka'a. Ilat rih ja'at tutang eam dahpot tongowasa; tuwi umba sowui ijo mopahtoi.

⁹ Ihto monggunaoh ahkan ngohawot torimakasih ahkan Tuhan, tutang Amai ihto, tahpi ka'a ahkan nulat sosama ulun, ijo jari tona'oi numbun tapan Pohotala.

¹⁰ Tahkan nyama ijo sama, soluka auh-auh torimakasih, tutang auh-auh tulat. Soharusoh eam kolourih!

¹¹ Inonkah anai luwang danum, ijo nyoluka danum botawah tutang danum poit, tahkan luwang ijo sama?

¹² Pu'un sikun, Konduang-konduang'ku, eam tou mohasil bua Zaitun, tutang pu'un anggur, eam dahpot mohasil bua sikun. Luwang danum ijo mohit eam tou ka'a polua danum tawah.

Kopihtar ijo lombut tahkan diang

¹³ Amat ang louk ihkam, anai ulun ijo pihtar tutang bobudi hondakrih io pokarahoh umba pombolum hinut, tutang hawui nguan hal-hal ijo hinut, ijo honong korandah ahtoi tutang kopihtar.

¹⁴ Tahpi amat ihkam ngobohu, poros ahtoi, tutang ngohu arop bongon, a'airih namam kopihtar arop rih, kotului umba orih ihkam mutarbalik borihta ijo morong tahkan Pohotala.

¹⁵ Kopihtaran mahcam orih eam asar tahkan soruga. Io asar tahkan kolunon, tahkan kojolik ulun tutang tahkan sehtan!

¹⁶ Ang amoh anai kobohu, tutang sipat kogunan arop bongon, ang anan ka'a sombang korusuh, tutang karo mahcam gawi ijo ja'at.

¹⁷ Tahpi ulun ijo anaingina kopihtaran ijo lombut tahkan diang, io sula-sulak samasino borasih, pongohuli jolik hokobuah, bojenta, tutang ponumbun. Io tuwi umba balos kasih tutang mua gawi-gawi ijo pios. Io eam bopihak tutang eam pura-pura.

¹⁸ Puna kopiosoh anairih bua tahkan bonyi kobuah ijo tonuhkan bain ulun ijo nyita kobuah!