YAKOBUS 2 - BOWOT BOHUA

Tingak toharep pongohu

¹ Konduang-konduang! Kolou ulun ijo porocaya umba Tuhan Yesus Kristus, Tuhan Ijo Mahahoromat, ara ihkam ngobohkon-bohkon ulun hogalang hal-hal koului.

² Tului amat anai ihcobehti ulun tahtou, ijo hapa isim bulau tutang pokahjan pios, lombut nokuh pesta'mu, turus lombut hino ihcobehti ulun porosbolum ijo hapa pokahjan tumpang-tambing,

³ mahka ihkam labih, mohoromat ulun ijo hopokajan pios rih. Ihkam nuhtui ahkaioh, ‘‘Turus Tuan, tuot ang koruci ijo kopios rih.’’ Tahpi ahkan ulun, ijo porosbolum ihkam nuhtui, ‘‘Tombok ang anan,’’ ata'ai ‘‘Tuot ang saoh ang ohtoi.’’

⁴ Honong nguan kolourih, ihkam nguan kobohkon ang louk sosama arop'kam tutang monilai ulun hogalang tiruk ijo jaat.

⁵ Ingatrih, Konduang-konduang ijo tonokasih. Ulun ijo porosbolum ang kolunon tuh, tonopili Pohotala ahkan monjadi ulun ijo tahtou a'ang kaporocaya. Ulun-ulun rih ahkan monjadi ukup ain Pohotala, kolou ijo tonobowot Pohotala ahkan ulun ijo mongasih-Oh.

⁶ Tahpi ihkam malah mohina ulun porosbolum, podahal ulun-ulun tahtou rih ijo mohonyok ihkam tutang nunda ihkam nokuh akan bosara!

⁷ Iro rih, ijo mohina aran ijo tonohoromat, ijo ihkam torima tahkan Pohotala!

⁸ Ihkam nguan ijo morong, amat ihkam molalus hukum Kolahca'an ijo tonyombang luwang ayat Surat Borasih tuh, ‘‘Ngasirih sama arop'mu kolou ihko ngasih arop'mu bongom.’’

⁹ Tahpi amat ihkam ngobohkon-bohkon ulun hogalang hal-hal kouluioh ihkam nguan dusa, tutang hukum Pohotala ngorinahoh, ijo ihkam anairih polanggar hukum.

¹⁰ Ulun ijo molanggar anai ihco tahkan hukum-hukum Pohotala, rimai molanggar paringoh.

¹¹ Kotului ijo homauh, ‘‘Ara hobandung,’’ Io rih ka'a ijo nuhtui, ‘‘Ara munu.’’ Jadi, amat ihkam eam hobandung, tahpi munu, mahka ihkam anairih polanggar hukum ka'a.

¹² Bopanderrih tutang molalusohrih kolou ulun ijo ahkan ponosara numbun Hukum Pohotala ijo momorodehka kolunon.

¹³ Tului Pohotala eam ahkan monunjukoh balos kasih ahkan ulun ijo eam kosono balos kasih. Tahpi balos kasih labih ba'as tahkan hukum!

Porocaya tutang gawi

¹⁴ Konduang-konduang! Inon gunaioh ulun nuhtui, ‘‘Ahku ulun ijo porocaya,’’ amat io eam ngorinahoh umba gawiuoh? Dahpot-rih koporocaya somahcam rih monyolamatoh?

¹⁵ Jahkaioh, ihcobehti konduang bahkas, ata'ai konduang bawi porulu hahtin tutang eam aro ukun ahkan nyinong-ondou.

¹⁶ Inon gunai ihkam nuhtui ahkaioh, ‘‘Sana-sanang hapa hahtin ijo bolasut, tutang solamat kuman!’’ – amat ihkam eam nonga ahkaioh inon ijo tomoruluoh ahkan pombolumoh?

¹⁷ Kolourih ka'a umba koporocaya, jahka eam ngorinahoh umba gawi, mahka koporocaya rih eam anai gunaioh.

¹⁸ Mihkohtou anai ijo homouh, ‘‘Anai ulun ijo bosikuh umba koporocaya, tutang anai hino ulun ijo bosikuh umba gawiuoh.’’ Ahku ahkan mutah, ‘‘Pokarahiou rih ahkak'ku, koloukuwoh ulun dahpot anaingina koporocaya earo gawiu, tutang ahku ahkan ngorinah umba gawi ijo ahku anaingina koporocaya.’’

¹⁹ Ihkam porocaya ijo Pohotala tihkas ihco, kowa? Nah, roh-roh ja'at ka porocaya tutang iro kitik genjeh mihkoh!

²⁰ Ihkam bobaleh samasino! Inonrih porulu mombukti ahkan'kam ijo eamanai gunai anaingina koporocaya earo gawiu?

²¹ Topahjah iou Abraham tahtu ajuh ihto. Io tonorima pios bain Pohotala tului gawiuoh, yorih ang ohkot io nyorah Isaak, anakoh, ahkan Pohotala ang ngosan mesbeh.

²² Ang ohtoi korinah ijo koporocaya harus mokarah umba gawiu mangat monjadi soporuna.

²³ Orih tohorong umba ayat Surat Borasih tuh, ‘‘Abraham porocaya ahkan Pohotala, tutang tului koporocayaoh rih Pohotala monorimaoh kolou ulun ijo molalus kohondak Pohotala.’’ Orih kotuluioh Abraham konohawot, ‘‘Sobat Pohotala’’.

²⁴ Korinahrih uhuntuh, ijo ulun tonorima pios bain Pohotala, kotului inon ijo konuan bain ulun rih, tutang eam baya tului porocayaoh iou.

²⁵ Nohto ka'a aang Rahab, bawi sundal rih. Io tonorima pios bain Pohotala, kotului gawiuoh, yorih kotihka io norima ang luwang lohpouoh ulun-ulun pongolahti ain uhtus Israel tutang dohop iro nasah nguha jalan bohkon.

²⁶ Nah, koloukuwoh behti eam-anai roh anai rih behti ijo mahtoi, kolourih ka'a koporocaya eamanai gawiu iorih porocaya ijo mahtoi.