TITUS 3 - BOWOT BOHUA

Hadat ulun Kristen

¹ Mopingatrih anak-anak ukup'mu, mangat iro tunduk umba okon-okon tutang pongowasa nogara, hawui te'et tutang bosodia nguan nyinong hal ijo hinut.

² Nuhtuirih ahkan iro mangat ara mopitnah ata'ai hojawab umba iai ka ka'a molekan mangat bojoin bojenta. Pios iro bojoin bolomu lembai toharep paring ulun.

³ Kotului soun ihto bongon ka'a uong, lahcat tutang eam te'et. Ihto tohojihpon bain mahca-mahcam bolaiusi tutang kojolik; ihto bolum umba niat-niat ja'at, tutang hiri ahtoi, hawui saling hokosingi.

⁴ Tahpi Pohotala, Ponyolamat ihto ngorinah kasih tutang kohinut ahtoi-Oh ahkan ihto.

⁵ Io monyolamat ihto, eam kotului ihto jari nguan aang'co ijo pios, molekan kotului Io bongoi mongasihan ihto. Io nyolamat ihto nguha Roh Pohotala, ijo nonga ihto konanak bohua, tutang bolum bohua, umba jalan muhi kosalan ihto.

⁶ Pohotala nusuh Roh-Oh ahkan ihto honong poholat Yesus Kristus, Lahca Ponyolamat ihto.

⁷ Mangat bain pononganasi Yesus, ihto hokopios hoduli umba Pohotala tutang ihto dahpot pombolum ijo sojahti tutang kototahiu ijo ihto mohara-harap-Oh.

⁸ Auh tuh tu'u-tu'u morong. Ahku kani ihko monihkin hal-hal tuh, mangat ulun-ulun ijo porocaya umba Pohotala tu'u-tu'u bousaha, ahkan nguan gawi-gawi ijo pios tutang boguna ahkan paring ulun.

⁹ Mokila tahkan hotokian-tokian ijo eam anai gunai, sosana-sosana asal-usul, hokosingi tutang hokolahi tohou hukum agama. Paring orih eam anai gunaioh, tutang eam anai utungoh.

¹⁰ Ulun ijo kotuluioh kopusit ang ukup pios ihko ningaksino, duo tikat; uliorih rih ara hino pahkat umba io.

¹¹ Ihko ta'an ijo ulun somahcam rih bijat tutang dusai-dusaioh monanda ijo io bosala.

Potunjuk potunjuk laiu-Oh

¹² Jeleng ulimba ahku nyuhu Artemas ata'ai Tikhikus ahkan'mu, bousaha jeleng jiontou ahkan lombut nokuh ahku ang Nikopolis, bain ahku boniat mohcon ang anan kotahin musim sorongin.

¹³ Bousaharih tu'u-tu'u ahkan mondohop Senas, ahli hukum rih, tutang Apolos, mangat iro tou tulak tutang eam tahpas ino-inon.

¹⁴ Ulun-ulun iro harus bolajar nguan hal-hal ijo pios, mangat duon nyukup koporoluan-koporoluan ijo paham baguna, a'ai nyiring iro bolum eam gunai.

¹⁵ Paring konduang ijo anai hihco ahku, ngirim tabe ahkan'mu nyiaroh iou taben ihkai ahkan injah-jolahan ihto ijo hihco koporocaan. Keleh Tuhan mborehkat Konduang paring. Horomat ihkai, Paulus