TITUS 1 - BOWOT BOHUA

¹ Anak'ku Titus! Ahku, Paulus, nyurat surat tuh kolou jihpon Pohotala tutang rasul Yesus Kristus. Ahku tonopili, tutang tonyuhu, ahkan dohop ulun-ulun ijo tonopili Pohotala, mangat monjadi ba'as a'ang koporocayan iro. Ahku ka'a harus ngagalan iro mangat kosono ajaran ijo morong ijo tongajarrih bain agaman ihto.

² Ajaran rih hogalang koharap, ijo ihto ahkan norima pombolum sojahti, tutang kototahiu. Pohotala jari mbowotoh pombolum rih hounumba pahtuk jaman – tutang Pohotala eam pu'u bobalik.

³ Ang ohkot ijo kona, Pohotala ngorinah bowot-Oh rih a'ang pohtoh-Oh. Pohtoh orih jari tomorocaya ahkak'ku, tutang ahku mborihtaoh bain poretah Pohotala Ponyolamat ihto.

⁴ Titus, ihko puna anairih anak'ku, kotului ihko tutang ahku, sama-sama ius porocaya umba Kristus. Ahku moharap, keleh Pohotala, Amai, tutang Kristus Yesus Lahca Ponyolamat ihto, nonga borehkat tutang kosanang ahkan'mu.

Gawin Titus ang Kreta

⁵ Ahku nohtah ihko ang Kreta mangat ihko dahpot hogoguan hal-hal ijo magun porulu ngobuah: Ka'a mangat ihko mitih ponotua-ponotua ang ukup, ang nyinong lowu. Tutang ingat iou potunjuk-potunjuk tahkan ahku tuh:

⁶ Ihcobehti ponotua ukup hondakrih ihcobehti ijo eamanai kosalaioh: Io tihkas ngina ihcobehti oruhoh, anak-anakoh harus jari porocaya umba Kristus tutang eam ijo bosewut kolou anak brandal tutang ijo eam dahpot tongahtur.

⁷ Okon ukup, anai ulun ijo hogoguan gawin Pohotala, io eam tou josala-sala. Io eam tou bojuhu, ata'ai ponyingi, ata'ai pobusou, ata'ai jolik hokolahi, ata'ai jolik mahta duitan.

⁸ Io harus sanang norima ulun ang lohpouoh, jolik ahkan hal-hal ijo pios, duon nahan aropoh, morong, borasih tutang toahtur.

⁹ Io harus nambit segah aang ajaran ijo dahpot ulun tomorocaya, kolou ijo jari tongajarrih ahkaioh. Honong kodorih io sanggup moningak ulun hogalang ajaran ijo morong, tutang ngorinah kosalan ulun-ulun ijo molawanoh.

¹⁰ Tului aro ulun ijo jolik mohiwang, pahtuk ulun-ulun ijo nanaioh boagama Yahudi; iro monihpu ulun bohkon umba pander puang iro.

¹¹ Ulun-ulun kolouorih harus tomangop bauioh, tului iro monderohrih aro bobuhan umba ajaran-ajaran ijo eam-eam. Iro nguan orih, tihkas kotului kani ngurah utung ijo eam pantas!

¹² Pu'u ihcobehti nabi iro bongon, ijo asaroh tahkan Kreta ka'a, nuhtui, ‘‘Ulun-ulun Kreta toturus pobalik tutang kolou ohcin bosiak ijo bobongo tutang kodian.’’

¹³ Inon ijo tonuhtui bain nabi rih puna morong. Orih kotuluioh ihko harus ningak iro hawui tegas; mangat iro tohtap nambit ang ajaran ijo morong,

¹⁴ tutang eam hino nambit ang kolimoi-kolimoi Yahudi, ata'ai aturan-aturan ijo tonapa bain ulun-ulun, ijo nulak ajaran ijo morong rih.

¹⁵ Kokaron ang'co, anairih borasih ahkan ulun-ulun ijo borasih. Tahpi bagi ulun-ulun ijo tirukoh ja'at tutang ijo eam porocaya, eam anai ang'co ka ijo borasih, tului tiruk tutang ahtoi-bua iro jari ja'at!

¹⁶ Iro nuhtui ijo iro kosono Pohotala, padahar gawin iro ngobeleoh. Iro ngojilokoh, tutang iro eam kani te'et; iro anairih ulun-ulun ijo eam dahpot nguan ang'co ijo hinut.