RUMA 9 - BOWOT BOHUA

Pohotala honong ukupoh ijo tonopili

¹ Inon ijo ahkan ahku nuhtuioh tuh, anairih morong, tului ahku ain Kristus. Ahku eam bobula. Ahtoi bua'ku ijo toniting bain Roh Pohotala, moyahkin ahku ka'a, ijo tuhtui'ku rih morong.

² Ahku paham sedih tutang ahtoi'ku paham ngarot,

³ tului Konduang-konduang'ku ijo 'coutus umba ahku. Tului ahkan iro ahku bongok rela tonulat bain Pohotala tutang hopisah tahkan Kristus.

⁴ Iro anairih ukup ijo tonopili tutang Pohotala ngonjorian iro anak-anak Aiu bongoi, honong pokarah kowasa-Oh ahkan iro. Io poanaioh bowot umba iro, tutang nonga ahkan iro hukum agama. Pohotala mborihtaoh ahkan iro, koloukuwoh iro harus sombayang tutang iro jari norima hino bowot-bowot-Oh.

⁵ Iro anairih lihit tahkan tahtu ajuh ihto. Kristus socara kolunon asaroh tahkan uhtus iro rih. Io labih isun tahkan paringoh. Tonotararih ahkan Pohotala nyiring turus-jahamoh. Amen.

⁶ Ahku eam nohuang nuhtui, ijo bowot Pohotala jari eam hapan hino; tahpi, eam paring ulun Israel anairih ukup ijo konopili bain Pohotala.

⁷ Eam paring lihit Abraham anairih anak-anak Pohotala. Tului Pohotala nuhtui ahkan Abraham, ‘‘Tihkas lihit Isaak bewe ijo ahkan konohawot lihit'mu.’’

⁸ Orih rimai ijo lihit Abraham ijo monjadi anak-anak Pohotala, baya lihitoh ijo konanak tului bowot Pohotala. Tutang bohkon tahkan paring lihitoh.

⁹ Tului bowot Pohotala anai kolou pongotuh ‘‘Aang ohkot ijo tonahtapoh, Ahku ahkan hoduli, tutang Sarah ahkan anainorima ihcobehti anak bahkas.’’

¹⁰ Tutang tuh ka'a: Rabeka nganak duo behti anak bahkas tahkan ihco amai, yorih Isaak, tahtu ajuh 'to.

¹¹ Sounumba duo behti anak rih konanak, Pohotala jari nuhkas pitih-Oh ahkan hototurusoh. Pitih Pohotala rih eam bogatung umba inon ijo duon konuan bain ulun, tahpi bogatung umba pona'ah Pohotala bongoi. Tului aang ohkot koduo anak bahkas Rabeka rih jaham duon nguan aang'co ijo pios ata'ai ijo ja'at.

¹² Pohotala jari nuhtui umba Rabeka, ‘‘Ijo ohko ahkan mohalu ijo biou.’’

¹³ A'ang Surat Borasih tonyurat ijo Pohotala nuhtui koloutuh, ‘‘Yakub, Ahku ngasi io, tahpi Esau Ahku beleoh.’’

¹⁴ Kuwoh kobulatoh ihto huntuh? Ijo Pohotala rih eam morongkah? Jari puna tu'u Pohotala rih morong!

¹⁵ Tului Pohotala nuhtui umba Museh, ‘‘Ahku ahkan ngorinah Pononganasi ahkan ulun ijo Ahku kani ngorinah pononganasi, tutang Ahku akan ngorinah kasihsayang ahkan ulun ijo Ahku kani ngorinah kasihsayang.’’

¹⁶ Jadi, koputusan Pohotala rih eam, bogatung umba korela kolunon ata'ai ahkan usaha kolunon, molekan tahkan kopios ahtoi Pohotala bewe, toharep ulun ijo tonopili-Oh rih.

¹⁷ Tului ang Surat Borasih tonyurat, ‘‘Pohotala nuhtui umba lahca Misir, ‘Ahku ngonjorian ihko lahca mangat ihco konohuang tuh bewe, yorih mangat umba ihko, Ahku ngorinah koba'as-Ku tutang napa arak-Ku bosewut ang hapus kolunon.’ ’’

¹⁸ Jadi, Pohotala rih ngasikaras ahkan ihcobehti kolunon, amat Pohotala nohuang kodorih. Tutang Pohotala ngotului ihcobehti ulun monjadi karas kuhungoh, amat Pohotala nohuang kodorih ka'a.

Kosingin Pohotala tutang kohinut ahtoi Pohotala

¹⁹ Nah, Konduang ahkan nuhtui umba ahku, ‘‘Amat kodorih ombai Pohotala magun kani monosalan kolunon? Ombai eam ihcobehti ka duon mohalang konohuang Pohotala?’’

²⁰ Tahpi Konduang! Konduang baya ulun kolunon bewe. Tutang Konduang earo bohanyi numbah auh Pohotala! Tou potoran ngisok umba tuhkang ijo napa io? ‘‘Ombai ihko napa ahku koloutuh?’’

²¹ Eamkah ulun tuhkang potoran rih bohak napa tana liat rih, napaoh numbun konohuang ahtoioh? Tahkan ihcokobuhtup tana liat rih, ulun rih bohak potoran napa duo mahcam, napa ihco paling pios, tutang napa ijo bohkon ijo kurang pios.

²² Kodorih ka'a umba inon ijo tonapa bain Pohotala. Io boniat ahkan timbun kosangit-Oh tutang mopotohto kowasa-Oh. Tahpi Io sabar toharep iro ijo harus tonohukum, tului nguan Io bosingi.

²³ Pohotala ka'a boniat ngorinah ahkan ihto kosanangkomangat molowi-lowi ijo tonusuh-Oh ahkan ihto ijo ponokasih-Oh. Ihto jari tonahtap-Oh ahkan monorima kosanangkomangat rih.

²⁴ Ihto ijo jari tona'ah-Oh, eam baya tahkan uhtus Yahudi, tahpi ka'a tahkan uhtus ulun bohkon.

²⁵ Tului aang Buhku Nabi Hosea, Pohotala nuhtui, ‘‘Ulun-ulun ijo bohkon ukup-Ku, Ahku ahkan ngohawotoh ‘Ukup-Ku’. Uhtus ijo eam Ahku ngasi-Oh, Ahku ahkan ngohawot ‘Kokasih-Ku’.

²⁶ Tutang ang unuk ang umoh tonuhtui ahkan ulun, ‘Ihko bohkon ukup-Ku,’ ang anan ulun-ulun rih ahkan konohawot anak-anak ain Pohotala ijo bolum.’’

²⁷ Nabi Yesaya nuhtui hawui tegas tohou uhtus Israel, ‘‘Tu'u ka jombalah uhtus Israel karo baras saran tasik tihkas honjiot bewe ijo ahkan solamat;

²⁸ tului Tuhan ahkan jeleng muhtus hukuman toharep suang kolunon.’’

²⁹ Nabi Yesaya nuhtui koloutuh ka'a, ‘‘Jakaoh, Pohotala Ijo Mahakowasa, eam nohtah ahkan ihto lihit, musti ihto paring jari monjadi kolou lowu Sodom tutang Gomora.’’

Hubungan holat ukup Pohotala umba Kabar Hinut tahkan Pohotala

³⁰ Jadi koloputaioh io rih tuh, uhtus-uhtus bohkon ijo eam lihit Yahudi, eam bousaha mangat kohihco iro umba Pohotala monjadi pios hoduli. Tahpi kotului iro porocaya, mahka Pohotala, napa kohihcon iro umba Io, tutang monjadi pios hoduli.

³¹ Tobalikoh ulun-ulun Yahudi, toturus bousaha bokehtep umba hukum, mangat kohihcon iro umba Pohotala monjadi pios huli. Tahpi iro mahi-mahi eam aro bohasir?

³² Ombai iro eam aro bohasir? Kotului iro nguanoh rih eam nguha koporocaya umba Pohotala, molekan nguha usaha iro bongoi. Mahka iro ngonyatu tosahap aang ‘‘Bahtu Ponoturung.’’

³³ Tohou bahtu dih ang luwang Surat Borasih jari tonyurat koloutuh, ‘‘Nuneng houn tuh: Ang Sion jari Ahku ngina ihco bahtu, ijo ahkan ngojorian ulun ponoturung; yorih ihcokobuhtup bahtu hajo ijo ahkan ngojorian ulun tosahap. Tahpi ulun ijo porocaya umba Io, eam ahkan kocewa.’’