RUMA 8 - BOWOT BOHUA

Pombolum ijo numbun Roh Pohotala

¹ Uhuntuh eam anai hino pohukuman toharep iro ijo bolum hihco umba Kristus Yesus.

² Tului hukum Roh Pohotala ijo nguan ihto bolum hihco umba Kristus Yesus jari nguwat ahku tahkan hukum ijo kotuluioh dusa tutang popahtoi.

³ Inon ijo eam duon konuan bain hukum agama, kotului ihto ulun bolomu, orih jari konuanoh bain Pohotala. Pohotala ijo mongalah kowasa dusa luwang tobiat ulun, hawui ngirimrih Anak-Oh bongoi, ijo lombut aang koada'ai sama umba kolunon ijo bodusa, ahkan ngudap dusa.

⁴ Pohotala nguanoh orih, mangat kohondak-Oh ijo tongorinahoh aang hukum agama Yahudi rih duon tomolalus ang arop ihto ijo bolum numbun Roh Pohotala tutang eam numbun tobiat kolunon.

⁵ Ulun-ulun ijo bolum numbun tobiat kolunon, toturus niruk inon ijo tongojolikoh bain tobiat kolunon. Tahpi ulun-ulun ijo bolum numbun Roh Pohotala toturus niruk inon ijo tongojolikoh bain Roh Pohotala.

⁶ Amat tiruk'kam konowasa bain tobiat kolunon, mahka kojoriaioh popahtoi. Tahpi amat tiruk'mu konowasa bain Roh Pohotala, mahka kojoriaioh io rih bolum tutang damai umba Pohotala.

⁷ Ulun ijo tirukoh tongowasa bain tobiat kolunon, ulun rih homusuh umba Pohotala, kotului ulun rih eam tunduk umba hukum Pohotala; tutang puna io eam tou tunduk ahkan hukum Pohotala.

⁸ Ulun-ulun ijo bolum numbun tobiat kolunon, eam duon ngojorih ahtoi Pohotala.

⁹ Tahpi amat ihkam eam bolum numbun tobiat kolunon. Ihkam bolum numbun Roh Pohotala – amat, puna kotuhkasoh, Roh Pohotala tu'u-tu'u nambit paranan ang luwang arop'kam. Ulun ijo eam anaitepun Roh Kristus, ulun orih bohkon ain Kristus.

¹⁰ Tahpi amat Kristus bolum ang luwang behtin'mu, mahka oluka behtin'kam ahkan mahtoi tului dusa, tahpika Roh Pohotala nonga pombolum ahkan'kam, kotului kohihco umba Pohotala jari pios.

¹¹ Amat Roh Pohotala, ijo mombolum Kristus tahkan popahtoi, bolum ang luwang arop'kam, mahka Io ijo mombolum Kristus tahkan popahtoi rih, ahkan mombolum ka'a behtin'kam ijo dahpot mahtoi rih. Io nguan orih umba Roh-Aiou ijo bolum ang luwang'kam.

¹² Orihrih kotuluioh, Ari-Konduang, ihto tepun tanggung-jawab; tahpi bohkon tanggung-jawab ahkan tobiat kolunon; ihto eam porulu bolum numbun kojolikoh.

¹³ Kotului amat ihkam bolum numbun tobiat kolunon, mahka ihkam ahkan mahtoi. Tahpi amat ihkam konowasa Roh Pohotala, ihkam toturus iou munu konuan-konuan'kam ijo bodusa, mahka ihkam ahkan bolum.

¹⁴ Ulun-ulun ijo toniting bain Roh Pohotala, anairih anak-anak Pohotala.

¹⁵ Tului Roh, ijo tonongaoh bain Pohotala ahkan ihkam, eamrih napa ihkam monjadi jihpon nyiring ihkam bolum ang luwang kihkoh. Tobalikoh Roh Pohotala rih, ngonjorian ihkam anak-anak Pohotala. Tutang honong kowasa Roh Pohotala rih, tona'ah Pohotala rih, ‘‘Abba, io Amai'ku!’’

¹⁶ Roh Pohotala sama-sama umba Roh ihto, mongorinah, ijo ihto tuh anairih anak-anak Pohotala.

¹⁷ Nah, amat ihto anairih anak-anak-Oh, mahka ihto ka norima waris-Oh ijo tonahtap bain Pohotala ahkan anak-anak-Oh. Ihto ahkan norima hombo-homboh umba Kristus inon ijo jari tonahtap Pohotala ahkai-Oh, tului amat ihto ngarot umba Kristus, ihto ahkan tonohoromat ka'a homboh Io.

Horomat ijo kototahiu

¹⁸ Paring kongarot ijo ihto nyuruoh huntuh numbun tiruk'ku eam dahpot, tonihpong samasino umba horomat ijo ahkan tongorinah bagin ihto.

¹⁹ Sohopus ijopindalangit ngindoi honong paham rindu umba wayahoh Pohotala ngorinah anak-anak-Oh.

²⁰ Tului ijopindalangit jari tonohonouoh monjadi luhtek eam kotului konohuangoh bongoi, tahpi kotului Pohotala mohonouoh kodorih. Oluka kodorih anai ka'a horapan ihto tuh.

²¹ Ijo aang, ihco ohkot ijopindalangit ahkan konuwat tahkan kowasa ijo moluhtekoh tutang ahkan umba tomorodehkaoh tutang tonohajo; hombo-homboh umba anak-anak Pohotala.

²² Ihto kota'an ijo nyiring wayah tuh, sohopus kolunon ngorunguh tului kongarot, kolou ihcobehti inai ngarot aang ohkotoh nganak longa.

²³ Tutang eamoh sohopus kolunon bewe ijo ngorunguh; ihto bongon ka ngorunguh ang luwang homboruan'to. Ihto jari norima Roh Pohotala, kolou ponongan Pohotala ijo pahtukoh, tahpi ihto magun ka'a ngindoi Pohotala nguwat arop ihto paringoh, tutang ngonjorian ihto monjadi anak-anak-Oh.

²⁴ Tului umba koporocaya mahka ihto tonyolamatoh. Tahpi amat inon ijo ihto morocaya orih rih, jari ihto nohto-Oh, mahka orih eam hino porocaya. Kotului iaikah magun morocaya aang 'co ijo jari tonohtooh?

²⁵ Tahpi amat ihto morocaya aang-'co, ijo jaha ihto nohtooh, mahka ihto ngindoi hawui sabar.

²⁶ Kodorih ka'a Roh Pohotala lombut dohop ihto, amat ihto bolomu. Tului ihto eam kota'an koloukuwoh soharusoh, ihto bodo'a; Roh rih bongoi noharep Pohotala ahkan nyawot baginihto, hawui rindu ijo paham timbon nyiring eam duon konohawot.

²⁷ Mahka Pohotala ijo ngota'an usin ahtoi ulun, horahtiu konohuang Roh rih. Tului Roh rih nyawot ahkan Pohotala, bagi ukup Pohotala tutang tohorong umba konohuang Pohotala.

²⁸ Ihto kota'an, ijo Pohotala ijo ngahtur kokaron hal nyiring momua ijo pios ahkan ulun-ulun ijo ngasih Io, tutang ijo tona'ah-Oh, tohorong umba rancana-Oh.

²⁹ Iro ijo jari konopili bain Pohotala, jari ka'a tonahtap tahkan toparai-Oh ahkan monjadi samakolou umba Anak-Oh, io rih Yesus Kristus. Honong kodorih, Anak rih monjadi ijo pahtuk ang louk aro Konduang-konduang-Oh.

³⁰ Kodorihrih Pohotala na'ah iro ijo jari tonahtap-Oh labih soun; tutang iro ijo tona'ah-Oh rih, nongajalan-Oh hokopios hoduli umba Pohotala. Tutang iro ijo nongajalan Io hokopios hoduli umba Pohotala ngomin bagian a'ang pombolum ain Pohotala bongoi.

Sitan Pohotala honong nguha Yesus Kristus

³¹ Inon ijo duon tonuhtui huntuh tohou paringoh orih? Amat Pohotala momihak aang ihto iairih duon molawan ihto?

³² Anak-Oh bongoi eam tonyayang-Oh, molekan tonosorah-Oh ahkan kogunan ihto paring, lehan Io eam ahkan nonga ahkan ihto paring-aang ijo bohkonoh?

³³ Iairih ijo duon ngugat ihto ukup ihco konopili Pohotala, amat Pohotala bongoi ngorinah ijo ihto eam bosala?

³⁴ Inonrih anai ulun ijo kani monosalan ihto? Kristus Yesus noin ijo ndohop ihto! Iorih ijo jari mahtoi, ata'ai malahan Iorih ijo jari tonobolum hoduli tahkan popahtoi, tutang anai hihco Pohotala, ang unuk ijo bokowasa.

³⁵ Inonrih anai ijo duon mohalang Kristus ngasi ihto? Duonleh kosusah ngohanaoh rih, ata'ai kohali, ata'ai koporos, ata'ai bolo'u, ata'ai koporosbolum, ata'ai bohaya, ata'ai ka popahtoi?

³⁶ Aang Surat Borasih tonyurat koloutuh, ‘‘Nyinong ondou ihkai bolum ang luwang bohaya mahtoi tului Ihko. Ihkai pononguaioh ulun kolou tobiri ijo ahkan sonomalih.’’

³⁷ Eam! Malah ang luwang paringoh rih, ihto dahpot komanang ijo sompurna tu'u bain Io ijo ngasi ihto!

³⁸ Tului ahku porocaya samasino ijo ang hopus kolunon, pios popahtoi oluka pombolum, pios molehkat oluka pongowasa, pios ancaman-ancaman huntuh oluka ancaman-ancaman ijo uhun ahkan lombut, ata'ai koba'as-koba'as ijo bohkonoh,

³⁹ pios hal-hal ijo ang langit, oluka hal-hal ijo ang luwang ngosan tana, ata'ai inon ka ijo bohkon, paringoh eam dahpot mohalang Pohotala ngasi ihto. Kolou ijo jari tongorinah-Oh nguha Yesus Kristus, Tuhan ihto.