RUMA 5 - BOWOT BOHUA

Hokohinut hoduli umba Pohotala

¹ Huntuh ihto ius hokohinut hoduli umba Pohotala, tului ihto porocaya. Tutang bain tului orih ihto bolum a'ang hokubuah umba Pohotala, nguha Tuhan ihto Yesus Kristus.

² Bain tului ihto porocaya ahkan Yesus, mahka Io nguapjalanahkan ihto mongenang asin Pohotala tutang honong kasih orihrih ihto bolum huntuh. Tului orih ihto jorih-jorih ahtoi, tului ihto anaitepun koharap, ijo ihto ahkan nginyam kosanang ijo tononga Pohotala.

³ Tutang molowi tahkan orih, ihto ka jorih ang luwang kokarot, tului ihto kota'an ijo kokarot rih napa ulun monjadi bokehtep,

⁴ tutang kokehteprih mangat ngonjorian ulun tahan tihkos; tuhrih ijo mopolombutoh koharap.

⁵ Koporocaya ijo kolouorih rih eam ahkan poki'aoh ihto, tului ahtoi ihto ius sonuang bain Pohotala umba Asiu-Oh. Pohotala nguan orih rih honong nguha Roh-Oh, ijo jari tononga-Oh ahkan ihto.

⁶ Kotihka ihto a'ang koada'an eam aro daya, Kristus mahtoi ahkan ihto aang ohkot ijo kona, ijo tonuhkas bain Pohotala; podahal ihto ulun-ulun, ijo ngomahcuarop tahkan Pohotala.

⁷ Ahkan ihcobehtiulun ijo adil ka bahali ulun kani mahtoi. Mihkohhirah ahkan ihcobehti ijo pios, anai ka'a ulun ijo bohanyi mahtoi.

⁸ Tahpi Pohotala ngorinah Asiu-Oh ahkan ihto kotihka Kristus mahtoi ahkan ihto, aang ohkot ihto magun ulun bodusa.

⁹ Huntuh ihto jari hokopios hoduli umba Pohotala, nguha popahtoi Yesus Kristus; kotului rih musti ihto ahkan duon tonyolamat ka'a tahkan kosangit Pohotala, bain Kristus.

¹⁰ Amat anai wayah ihto homusuh umba Pohotala, ihto tongobuahoh umba Io nguha popahtoi Anak-Oh; mahihino huntuh ulimba kohihcon ihto umba Pohotala pios hoduli, puna ihto ahkan tonyolamat ka'a nguha pombolum Kristus.

¹¹ Tutang molowi tahkanumba rih, ihto hokojorih ka'a ngosan kohinut Pohotala nguha Tuhan ihto Yesus Kristus. Tului nguha Yesus Kristus, ihto huntuh nginyam kohihco ijo morong rih honong Pohotala.

Adam tutang Kristus

¹² Dusa nyolong nokuh luwang kolunon nguha ihcobehti, tutang tahkan dusa orih lombut popahtoi. Kojorian popahtoi ijo nanyap aang paring ukup kolunon, tului paringoh ulun jari bodusa.

¹³ Sounumba hukum agama Yahudi tononga, dusa jari anai ang luwang kolunon. Tahpi dusa eam tonuhtut tului eam anai hukum ijo tou tonoturung.

¹⁴ Tahpi tahkan jaman Adam nyiring ang jaman Museh, popahtoi jari mongowasa paring ukup kolunon. Malah ulun-ulun ijo eam nguan toturung umba cara ijo sama, kolou ijo konuan bain Adam, ulun-ulun rih ka tahput ka'a konowasa bain popahtoi. Adam anairih gambar tahkanumba Io, ijo ahkan lombut pongohuli.

¹⁵ Tahpi ijo koduooh rih eam sama; tului ponongan Pohotala mahcu labih kohajoi, amat tonihpong umba kototurung ijo konuan bain Adam. Kototurung ihco behti, kotuluirih aro ulun mahtoi. Eam inon labih hajo hino kojorian tahkan pononganasi Pohotala, tutang ponongan solamat ijo tononga-Oh, ahkan kodorih karon ulun nguha kohinut ahtoioh ihcobehti, yorih Yesus Kristus.

¹⁶ Ponongan Pohotala ka'a mahcu labih hajo tahkanumba dusan ulun ijo ihco rih. Tului uliumba ihco behti nguan toturung, lombut ponis, ‘‘Bosala’’. Tahpi ulimba aro ulun nguan dusa lombutrih pononga tahkan Pohotala ijo bokorinahoh, ‘‘Eam Bosala’’.

¹⁷ Tului kototurung ihco behti, popahtoi nanyap koumo-umoh nguha ulun ijo ihco rih. Eam inon labih hajo hino, kojorian tahkan inon ijo tokonuanoh bain ihco behti ijo bohkon, yorih, Yesus Kristus. Nguha Io, Pohotala nusuh pononganasi-Oh ahkan kolourih karon ulun, tutang honong cuma-cuma, nguapjalan iro hokopios hoduli umba Pohotala; iro ahkan bokowasa ang kolunon tuh nguha Kristus.

¹⁸ Jadi, koloukuwoh kototurung ihco behti ngonjorian sohapus ukup kolunon tonohukum; kodorih ka'a gawin ihco behti ijo nuhtut kohondak Pohotala, mongonjorian paring ulun konoliwus tahkan kosala'an, tutang tononga pombolum.

¹⁹ Tutang koloukuwoh aro ulun monjadi ulun bodusa, kotului ihco behti eam te'et. Kodorih ka'a aro ulun duonjalan hokopios hoduli umba Pohotala, tului ihco behti te'et umba Pohotala.

²⁰ Ijo nonga hukum agama Yahudi iorih Pohotala bongoi. Tahpi mahi-mahi ulun ngurah-jalan moneet hukum rih, mahi-mahi iro noturungoh tutang bodusa toharep Pohotala. Oluka kodorih, mahi-mahi ulun napa dusa, Pohotala mahi-mahi ka'a masi iro.

²¹ Ho, ihto harus mahtoi, tului ihto napa dusa. Tahpi Pohotala mongasih ihto tutang nonga jalan ahkan ihto mangat hokopios hoduli umba Io. Tutang tului kohihcon ihto umba Pohotala jari pios hoduli, Io nonga ka'a pombolum ijo sojahti tutang kototahiu ahkan ihto nguha Yesus Kristus, Tuhan ihto.