RUMA 4 - BOWOT BOHUA

Abraham monjadi sutu

¹ Amat kodorih inon ijo duon ihto nuhtui, tohou Abraham tahtu ajuh uhtus ihto? Koloukuwohrih pongalamanoh?

² Amat hal-hal ijo konuaioh kotuluioh orih Pohotala norima Io monjadi ulun ijo ngojorihoh ahtoi Pohotala, mahka anai ka'a alasan ahkaioh ahkan tama-tamam umba aropoh. Tahpi Io eam duon botamam ang toharep Pohotala.

³ Luwang Surat Borasih anai tonyurat: ‘‘Abraham porocaya umba Pohotala, tutang tului koporocayaoh rih Io norima bain Pohotala, monjadi ulun ijo ngojorih ahtoi Pohotala.’’

⁴ Ulun ijo bogawi, norima upah, tutang upahoh rih eam tongohuoh monjadi ihco pononga bewe, tahpi tului orih anairih hakoh.

⁵ Tahpi anai ulun ijo eam monggahtung aang gawiuoh bongoi io moporocayaoh aropoh ahkan Pohotala, ijo ngorinahoh ulun bodusa liwus tahkan kosalaioh. Hogalang koporocayaoh orih rih Pohotala norima ulun rih, monjadi ulun ijo ngojorih ahtoi Pohotala.

⁶ Kodorihoh tiruk Dawid ka'a; orih kotuluioh io ngohawot solamat, kosanang ahkan ulun ijo bain Pohotala jari tonorima monjadi ulun ijo ngojorih ahtoi-Oh, earo Pohotala nohtoani gawin-gawin ulun rih. Dawid nuhtui numbun tuh,

⁷ ‘‘Kosanangrih ahkan ulun ijo kosalai-kosalaioh tongapun tutang dusai-dusaioh ius tongapun Pohotala!

⁸ Kosanangrih ahkan ulun ijo dusai-dusaioh eam tonuhtut bain Tuhan!’’

⁹ Inon tuhtui kosanang tuh tonihtu tihkas ahkan ulun ijo numbun poroturan sunat bewe? Ata'aioh ka'a ahkan ulun-ulun ijo eam numbun poroturan sunat? Jari ihkai ngohawotoh hounmbaoh, ijo Abraham tonorima bain Pohotala monjadi ulun ijo ngojorih ahtoi-Oh, tului Abraham porocaya umba Pohotala.

¹⁰ Nah, mirarih Pohotala ngorinah hal orih? Sounumba ata'ai uliumba Abraham tonyunat? Puna sounumba Io tonyunat eam uliumbaoh.

¹¹ Io tonyunat pongohuli tutang sunat orih rih tihkas monjadi tanda ijo Pohotala jari norima io, monjadi ulun ijo ngojorih ahtoi Pohotala, tului porocaya umba Pohotala. Io tonorima bain Pohotala aang ohkot io magun jaha numbun aturan sunat. Tutang Abraham monjadi amai socara rohani bagi paring ulun ijo porocaya, ahkan Pohotala, tutang ijo kotuluioh jari tonorima bain Pohotala, monjadi ulun ijo ngojorih ahtoi-Oh, oluka iro eam nambit poroturan sunat.

¹² Abraham ka'a amai rohani ahkan ulun-ulun ijo nuhtut poroturan sunat. Io amai rohani iro, eam baya tului iro nuhtut poroturan sunat, tahpi ka'a tului iro bolum honong porocaya umba Pohotala, sama kolou Abraham aang ohkot io jaha nuhtut poroturan sunat.

Bowot Pohotala tonorima, tului porocaya umba Pohotala

¹³ Pohotala nobowot ahkan Abraham tutang litingoh, ijo kolunon tuh ahkan monjadi ain Abraham. Pohotala hobowot kodorih, eam kotului Abraham te'et umba hukum agama Yahudi, tahpi kotului io percaya umba Pohotala; nyiring io tonorima bain Pohotala monjadi ulun ijo ngojorih ahtoi Pohotala.

¹⁴ Kotului amat baya ulun-ulun ijo bokehtep umba hukum-hukum agama Yahudi bewe, ijo ahkan norima inon, ijo tonobowotoh bain Pohotala, mahka porocaya umba Pohotala earo gunai samasino, tutang bowot Pohotala ka ngahus bewe.

¹⁵ Hukum agama Yahudi mopolombut hukum Pohotala. Tahpi amat aturan Pohotala eam aro, mahka polanggar ka'a eam aro.

¹⁶ Jadi bowot Pohotala rih, hogalangrih porocayaoh ulun ahkan Pohotala. Orih monjadi ihco jaminan ahkan paring lihit Abraham, ijo bowot rih tononga ahkan iro monjadi ihco pononga cuma-cuma tahkan Pohotala; eam tihkas mangat iro ijo bokehtep umba hukum agama Yahudi bewe, tahpi ka'a ahkan iro ijo porocaya umba Pohotala sama kolou Abraham porocaya umba Io. Tului Abraham orih rih amai ihto paring socara rohani.

¹⁷ Kotului Pohotala nuhtui koloutuh ahkan Abraham, ‘‘Ahku ius ngonjorian ihko amai bagi aro uhtus.’’ Kolouorih Pohotala nonga bowot rih ahkan Abraham. Tutang Abraham porocaya umba Io. Io rih Pohotala ijo mombolum ulun mahtoi: Iorih ka'a Pohotala ijo honong nuhtui iu, napa inon ijo eam pu'u anai, monjadi anai.

¹⁸ Abraham toturus ih harap tutang porocaya oluka eam anai harapan hino. Tului orih io monjadi amai aro uhtus. Numbun ijo tonyurat ang Surat Borasih. ‘‘Lihit'mu ahkan monjadi aro samasino.’’

¹⁹ Abraham ang ohkot rih kota'an ijo io jari eam aro harapan hino anaitepun lihit, tului bihtiouoh jari nokalou oko hawui umuroh jari doni solahtus toun; mahi hino Sarah, oruhoh rih, tomanang. Tahpioh koporocaya Abraham eam monjadi bokurang.

²⁰ Io tehtep porocaya tutang eam bembang ahkan bowot Pohotala. Malah koporocayaoh ngonjorian io botambah ba'as, nyiring io toturus monara-nara Pohotala.

²¹ Io porocaya samasino ijo Pohotala duon nguaioh inon ijo jari tonobowot-Oh.

²² Tului orih Abraham tonorima bain Pohotala monjadi ulun ijo ngojorih ahtoi Pohotala.

²³ Tuhtui, ‘‘tonorima monjadi ulun ijo ngojorih ahtoi Pohotala,’’ tonyurat eam tihkas ahkan Abraham bongoi bewe,

²⁴ tahpi ka'a ahkan ihto. Ihto ka'a ahkan tonorima monjadi ulun ijo ngojorih ahtoi Pohotala, kotului ihto porocaya ahkan Pohotala ijo mombolum Yesus Tuhan ihto, tahkan popahtoi.

²⁵ Yesus rih jari tonyorahoh ahkan tomunu tului dusa-dusan ihto; turus Io tonombolum hoduli bain Pohotala mangat nonga-jalan ihto hokohinut hoduli umba Pohotala.