RUMA 15 - BOWOT BOHUA

Posanangohrih ulun bohkon, ara arop-bongon

¹ Ihto ijo tu'u-tu'u yahkin, ahkan inon ijo ihto porocayaoh, harusrih sabar toharep kobahat-kobahatoh ulun bohkon ijo bolomu koporocayaoh. Ara ihto tihkas nyanang arop ihto bongon iou.

² Tombolikoh ihto nyino-nyinong koharusoh monyanang ahtoi sosama konduang ihto ahkan kopiosoh, mangat koyakinanoh botambah ba'as.

³ Tului Kristus ka eam monirukoh kosanang arop-Oh bongoi. Ang luwang Surat Borasih anai tonyurat koloutuh, ‘‘Kokaron tosalan ijo tonitu ahkak-Ku jari tomuat ngosan ahku.’’

⁴ Paring ijo tonyurat ang luwang Surat Borasih anairih, mangat majar ihto. Tului ajaran ijo ihto torimaoh rih tahkan Surat Borasih ngonjorian ihto sabar tutang ba'as nyiring ihto tou bokoharap umba Pohotala.

⁵ Keleh Pohotala, ijo nonga kosabar tutang apung ahkan ulun, dohop ihkam ahkan bolum hihcoahtoi numbun sutu Kristus Yesus.

⁶ Honong ihcoahtoi Konduang paringoh hombo-homboh duon monara Pohotala, Amai Tuhan ihto Yesus Kristus.

Kabar Hinut ahkan ulun ijo bohkon uhtus Yahudi

⁷ Tului orih, hondakoh Konduang-konduang norima ihco umba ijo bohkon honong sanang ahtoi, sama kolou Kristus ka'a norima ihkam ahkan pohajo aran Pohotala.

⁸ Tului, ingatrih, ijo Kristus jari mohalu ulun Yahudi ahkan mongorinah ijo Pohotala sotia aang molalus bowot-bowot-Oh umba tahtu ajuh ihto.

⁹ Yesus ka'a monapa uhtus-uhtus bohkon monara Pohotala tului kohinut ahtoi-Oh ahkan iro. Ang luwang Surat Borasih tonyurat koloutuh, ‘‘Tului orih ahku monara Ihko ang louk karon uhtus, ahku kani monyanyi tara ahkan aran-Aim.’’

¹⁰ Anai ka'a tonyurat koloutuh hino, ‘‘Jori-jorih ihkam homboh ukup Pohotala ijo tongopili o karon-uhtus!’’

¹¹ Tutang tuh ka'a, ‘‘Tararih Pohotala, o paring uhtus kohondakoh paring ulun monara Io!’’

¹² Tutang tuh hino ijo tonuhtui bain Yesaya, ‘‘Tahkan lihit Isai ahkan lombut ihcobehti ijo ahkan moretah karon uhtus; umba Io karon uhtus rih ahkan porocaya.’’

¹³ Pohotala anairih, unuk ihkam porocaya. Keleh Io nyuang ahtoi'kam hapa kokaron kojorih tutang kasanang, tului ihkam porocaya umba Io, mangat umba kowasa Roh Pohotala ihkam mahi-mahi porocaya ahkan Pohotala.

Karon kotuluioh Paulus nyurat hawui botarang

¹⁴ Konduang-konduang! Ahku yahkin ijo anai aro samasino hal ijo pios aang ihko. Ihkam ka ngota'an kokaron paringoh tutang duon majar ihco umba ijobohkon ka'a.

¹⁵ Tahpi tohou hal-hal ijo botatu ahku mopingat ihkam hawui tegas aang surat tuh, tului Pohotala jari nyarah ahkak'ku gawi tuh.

¹⁶ Io ius ngojorian ahku monjadi pohalu Kristus Yesus ahkan sonuhu, ahkan nokuh uhtus-uhtus ijo bohkon Yahudi. Tutang ahku molalusoh kolou imam, ijo mborihta Kabar Hinut tahkan Pohotala, mangat ulun-ulun ijo bohkon Yahudi, monjadi ihco ponyorahan ahkan Pohotala, ijo dahpot tonorima baiou-Oh. Keleh Roh Pohotala napa iro monjadi ihco ponyorahan ijo khusus bagi Pohotala.

¹⁷ Jadi, kotului ahku jari hihco umba Kristus Yesus, mahka ahku duon nginyam tamam ngosan gawik'ku bagi Pohotala.

¹⁸ Ahku bahanyi nuhtui kolouorih tihkas tohou inon ijo jari konuan Kristus nguha ahku, mangat ngonjorian ulun-ulun ijo bohkon Yahudi, te'et ahkan Pohotala. Ahku nguan orih honong tuhtui-tuhtui oluka umba gawik'ku,

¹⁹ ijo pohayak kohelan-helan tutang hal-hal luar biasa, paringoh rih bain kowasa Roh Pohotala. Kabar Hinut tohou Kristus jari ahku mborihtaoh paringoh ahkan ulun-ulun, nopara tahkan Yerusalem johcok nokuh Ilirikum.

²⁰ Cihta-cihta ahtoi'ku iorih mborihta Kabar Hinut tahkan Pohotala ang karon-unuk ang amoh ulun jaha ngonih tohou Kristus. Tului ahku eam kani nombok ang konuak'ku isun galang ijo konina bain ulun bohkon.

²¹ Ang luwang Surat Borasih tonyurat, ‘‘Ulun-ulun ijo jaha pu'u norima borihta tahou Io, ahkan nopahjah; tutang iro ijo jaha pu'u ngonih, ahkan horahti.’’

Rancana Paulus ahkan tulak nokuh Ruma

²² Orih kotului jari kinjap ahku tohalang ahkan masap ihkam.

²³ Tahpi huntuh karon-gawik'ku ang daerah-daerah rih jari opah. Botoun-toun kotahiu ahku jolik masap ihkam.

²⁴ Noin amat ahku nguha lowun'kam ang ponomuoi'ku ahkan Spanyol, ahku harap duon hosombang umba ihkam tutang jorih honyulu honong ihkam. Uliorih ahku harap ihkam duon dohop ahku ahkan ponyalak'ku nokuh Spanyol rih.

²⁵ Tahpi huntuh ahku kani nokuh Yerusalem ahkan ngitot pononga ahkan ukup Pohotala ang anan.

²⁶ Tului ukup-ukup ang Makedonia tutang Akhaya jari sotuju ahkan nonga pononga ahkan konduang-konduang ijo porosbolum ang louk ukup Pohotala ang Yerusalem.

²⁷ Honong sanang ahtoi iro monahtap, ahkan nguan orih. Puna komorongoh, iro pahtut dohop konduang-konduang ijo porosbolum, ang Yerusalem rih, tului tahkan ulun-ulun Yahudi rih, ulun-ulun bohkon Yahudi rih ius norima borehkat-borehkat tahkan Pohotala. Jadi, ulun-ulun ijo bohkon Yahudi rih, pahtut ka'a dohop ulun-ulun bohkon Yahudi umba borehkat-borehkat ramuioh.

²⁸ Amat ahku jari ngopah karon-gawik'ku tuh, tutang monyorah ahkan iro ijo ang Yerusalem rih, pononga ijo jari tonipunoh rih, mahka ahku ahkan tulak nokuh lowu Spanyol, nyihing lowun'kam.

²⁹ Amat ahku lombut nokuh ihkam, pasti ahku lombut umba aro borehkat tahkan Kristus ahkan ihkam.

³⁰ Aangaran Tuhan ihto Yesus Kristus, tutang aang asiu ijo tononga bain Roh Pohotala, ahku nyawot honong paham umba ihkam. Keleh ihkam umba bodo'a tu'u-tu'u, hombo-homboh ahku ahkan Pohotala, ahkak'ku.

³¹ Bodo'arih iou, ahkan Pohotala moliwusoh ahku tahkan longon ulun-ulun ijo eam porocaya ang Yudea, tutang mangat gawik'ku ahkan ngitot pononga nokuh Yerusalem, tonorima honong sanang ahtoi bain ukup Pohotala ang anan.

³² Honong kolouorih, amat Pohotala bokohondak, ahku dahpot lombut nokuh ihkam, hawui ahtoi ijo sanang. Tutang ahku ahkan nginyam toapung ang tohun ihkam.

³³ Mudah-mudahan Pohotala ijo nongaoh kosanang ahkan ulun, pahahyak Konduang paringoh. Amen.