RUMA 10 - BOWOT BOHUA

¹ Konduang-konduang! Ahku rindu samasino ahkan uhtus aik'ku dahpot tonyolamatoh. Tutang ahku tu'u-tu'u bodo'a ahkan Pohotala bagi iro.

² Ahku bohanyi nuhtuioh ijo iro bosomangat samasino bosorah umba Pohotala. Tahpi somangat iro rih eam aro hogalangoh pongotaan ijo tahkan Pohotala.

³ Iro eam kota'an caraoh Pohotala napa kohihco ulun umba Io monjadi pios hoduli. Tutang tului iro kani numbun cara iro bongoi, mahka iro eam tunduk umba cara ijo pokarah Pohotala ahkan'ndo.

⁴ Hukum agama ius pononggenap bain Kristus. Jadi nyinong ulun ijo porocaya umba Kristus, kohihcooh umba Pohotala monjadi pios hoduli.

Solamat anai ahkan paring ulun

⁵ Museh nyurat ijo ulun, ijo hokopios umba Pohotala hogalangoh hukum agama, ulun rih ahkan bolum, tului bokehtep ahkan hukum agama rih.

⁶ Tahpi tohou cara ulun hokopios umba Pohotala hogalangoh koporocaya ahkan Pohotala. Surat Borasih monuhtuioh koloutuh, ‘‘Eam porulu ihko nuhtui ang luwang ahtoi'mu, ‘Iairih ijo ahkan nuhkat nokuh soruga?’ (rimaioh ngomin Kristus mosuluh),

⁷ ata'ai, ‘Iairih ijo mosuluh nokuh tana unuk ulun mahtoi?’ (Rimaioh ngahtang Kristus nuhkat tahkan popahtoi).’’

⁸ Konohuangoh anairih koloutuh, ‘‘Kabar tahkan Pohotala rih doni samasino aang ihko; aang nyaman'kam tutang a'ang ahtoi'mu.’’ Orih rih borihta ijo ihkai mborihtaoh; borihta ijo ulun harus porocaya.

⁹ Tului amat Konduang ngahku honong nyaman'kam ijo, ‘‘Yesus rih Tuhan,’’ tutang Konduang porocaya luwang ahtoi'kam, ijo Pohotala jari mombolum Kristus Yesus tahkan popahtoi mahka Konduang ahkan solamat.

¹⁰ Tului honong ahtoioh ulun porocaya, nyiring Pohotala norima io kolou ulun ijo hokopios umba Pohotala. Tutang honong nyamaioh ulun ngahku, nyiring io tonyolamat.

¹¹ Ang luwang Surat Borasih tonyurat, ‘‘Ulun ijo porocaya eam ahkan tonomia.’’

¹² Orih nyolung toharep paring ulun, kotului eam aro bedaoh holat ulun Yahudi umba ulun-ulun uhtus bohkon. Pohotala ijo ihco orih anairih Tuhan ahkan paring ulun. Io nonga borehkat ijo molowi-lowi ahkan paring ulun ijo nyawot dohop umba Io.

¹³ Aang Surat Borasih tonyurat, ‘‘Paring ulun ijo na'ah umba Tuhan, ahkan solamat.’’

¹⁴ Tahpi koloukuwohoh ulun ijo na'ah umba Tuhan amat iro jaha porocaya? Tutang koloukuwohoh iro duon porocaya umba Tuhan, amat iro jaha ngonih tohou Io? Ka'a, koloukuwohoh iro duon ngonih tohou Tuhan, amat eam aro ijo mborihtaoh?

¹⁵ Tutang koloukuwohrih ulun duon ngomin borihta rih, amat iro eam tonyuhu? Ang aang Surat Borasih tonyurat koloutuh, ‘‘Eam inon kopioioh polombut ulun-ulun ijo ngomin Kabar Hinut tahkan Pohotala!’’

¹⁶ Tahpi eam paring ulun norima Kabar Hinut rih. Tului Yesaya nuhtui, ‘‘Tuhan, iaikah ijo porocaya umba borihta tahkan ihkai?’’

¹⁷ Orih kotuluioh ulun-ulun monjadi porocaya, tului iro ngonih borihta, tutang borihta rih konahan, tului anai ulun ijo mborihtaoh tohou Kristus.

¹⁸ Tahpi ahku ngisok: Kuwoh puna iro jaha ngonih borihta rih? Musti jari! Tului luwang Surat Borasih tonyurat koloutuh, ‘‘Auh iro jari ngua-nguak ang sohapus kolunon, tuhtui-tuhtui'ndo jari johcok nokuh topahkan kolunon.’’

¹⁹ Ahku ngisok hino. Kuwoh uhtus Israel jaha iro ngota'aioh? Nauh pokisok orih ijo pahtuk-pahtukoh tonumbah bain Museh. Museh nuhtui, ‘‘Koloutuh hion Pohotala, ‘Ahku napa ihkam bohiri ahtoi umba ihco uhtus ijo bohkon ukup, tutang Ahku ahkan napa ihkam bosingi toharep ihco uhtus ijo uong!’ ’’

²⁰ Yesaya labih bohanyi hino. Io nuhtui, ‘‘Koloutuh auh Pohotala, ‘Ulun-ulun ijo eam ngurah Ahku, jari monyombang Ahku; tutang Ahku mongorinahoh arop-Ku ahkan iro ijo eam mongisokoh tohou Ahku!’ ’’

²¹ Tahpi nitu uhtus Israel Yesaya nuhtui, ‘‘Koloutuhrih auh Pohotala, ‘Nyinong ondou Ahku nyuhcu longok-Ku ahkan ihco uhtus ijo mahang kuhungoh tutang eam sotia.’ ’’