RUMA 1 - BOWOT BOHUA

¹ Konduang-konduang paring ang Ruma ijo tonokasih Pohotala tutang ijo jari tona'ah Pohotala ahkan monjadi ukup-Aiu. Pohotala jari mitih tutang ngahtang ahku khusus mangat mborihta Kabar Hinut tahkan Pohotala.

² Kabar Hinut rih jari tonobowot bain Pohotala ang ohkot lomoi nguha nabi-nabi Aiu, tutang jari tonyurat luwang Surat Borasih.

³ Kabar Hinut rih tohou Anak Pohotala, Tuhan ihto Yesus Kristus. Socara kolunon Io anairih lihit Dawid,

⁴ tahpi socara ko-Pohotala-Oh Io korinah anairih Anak Pohotala. Orih nyahta umba kobasa ijo luar biasa nguha komonyun Aiu tahkan popahtoi.

⁵ Nguha Io ka'a Pohotala nonga ahkak'ku pononga monjadi rasul, mangat ahku – ahkan mohoromat Kristus – ngogalan ulun-ulun tahkan kokaron uhtus, mangat porocaya tutang te'et.

⁶ Ijo konohuangoh umba kokaron uhtus iorih ihkam ka'a ijo anai ang Ruma jari tona'ah mangat monjadi ukup Yesus Kristus.

⁷ Orih kotuluioh ahku nyurat ahkan'kam. Keleh Pohotala Amai ihto, tutang Tuhan Yesus Kristus nonga borehkat tutang kosanang ahkan'kam.

Do'a torimakasih

⁸ Pahtuk-pahtuk nguha Yesus Kristus, ahku monorimakasih ahkan Pohotala tului Konduang-konduang paringoh; tului sohopus kolunon jari ngonih ijo ihkam porocaya samasino umba Kristus.

⁹ Ahku toturus mingat ihkam amat ahku bodo'a. Pohotala nyaksioh, ijo inon ijo ahku nuhtui rih morong. Iorih Pohotala ijo ahku mohaluoh ang kotuwi ahtoi, hawui mborihta Kabar Hinut tohou Anak-Oh.

¹⁰ Ahku nyawot honong paham umba Pohotala, keleh Io kani mongijinoh ahku huntuh masap ihkam.

¹¹ Tului ahku jolik samasino hosombang umba ihkam, mangat ahku duon mbagi umba ihkam, pononga tahkan Roh Pohotala ahkan ngoba'as ihkam.

¹² Konohuang'ku iorih, tului ihto sama-sama jari porocaya umba Yesus Kristus, mahka ihto dahpot saling hokomba'as.

¹³ Konduang-konduang! Ahku jolik mangat ihkam kota'an ijo jari aro tikat ahku nohuang masap ihkam, tahpi toturus anai iou holanganoh. Ahku jolik mangat aang louk'kam ka, aangkonuak'ku anai buaoh. Koloukuwoh aangkonuak'ku jari mua ang louk ulun-ulun, ijo bohkon Yahudi, ang unuk-unuk ijo bohkon.

¹⁴ Tului ahku tepun gawi toharep karon uhtus: ijo jari bohadat tutang ijo eambohadat, ijo sokula ata'ai ijo eamsokula.

¹⁵ Orihrih kotuluioh ahku jolik samasino mborihta Kabar Hinut rih ahkan ihkam, ijo mohcon ang lowu Ruma ka'a.

Kowasa Kabar Hinut rih

¹⁶ Ahku porocaya samasino ahkan Kabar Hinut rih, tului kabar rih anairih kowasan Pohotala ahkan monyolamat paring ulun ijo porocaya; pahtuk pahtukoh ulun Yahudi, tutang uhtus bohkon ka'a.

¹⁷ Tului umba Kabar Hinut rih Pohotala ngorinah kolouinon caraoh kohihco kolunon umba Pohotala, monjadi hinut hoduli; caraoh iorih honong porocaya umba Pohotala, tahkan pahtuk nyiring laiuoh. Orih sama kolou ijo tonyurat luwang Surat Borasih, ‘‘Ulun ijo porocaya umba Pohotala nyiring kohihcooh umba Pohotala monjadi hinut hoduli, ulun orih ahkan bolum!’’

Kosalan ulun

¹⁸ Tahkan soruga Pohotala ngorinah kosingi-Oh toharep paring dusa tutang koja'at ulun, tului koja'at, pojajong kalunon ahkan ngosono ajaran morong tohou Pohotala.

¹⁹ Inon ijo duon ngota'an kolunon tohou Pohotala jari tarang ang luwang ahtoi bua kolunon, tului Pohotala bongoi jari ngorinahoh rih ahkan kolunon.

²⁰ Tahkanpahtuk Pohotala na'oi kolunon, sipat-sipat Pohotala ijo eam gihtan, yorih koada'an-Oh kolou Pohotala tutang kowasa-Oh ijo abadi, jari duon toniruk bain ulun, nguha paring ijo jari tona'oioh. Jadi kolunon samasino eam anai alasan ahkan ngomorong aropoh.

²¹ Ulun ngosono Pohotala, tahpi ulun eamkani mohoromat Io kolou Pohotala, tutang eam ka'a botorimakasih ahkai-Oh. Tobalikoh kolunon nirukoh ijo bohko-bohkon; ahtoi iro jari kotinget.

²² Iro ngomo arop bobudi bosara podahal iro uong.

²³ Bohkonoh Pohotala ijo abadi, ijo iro nyembah, molekan pahtung-pahtung ijo nyoruwa angbolum ijo tou mahtoi; yorih kolunon, bulung, ohcin ijo hopa'a ohpat, tutang ohcin ijo nyoli.

²⁴ Bain tului orih Pohotala mohonau iro konowasa bain kojolik ahtoi'ndo, ahkan nguan ijo bejad, nyiring iro nguan hal-hal ijo kojilok toharep sama arop.

²⁵ Pohotala ijo morong, iro ngatioh umba ang'co ijo palasu. Bohkon ijo pona'oi, molekan ijo tona'oi orih justru ijo tonyembah tutang ijo tonohalu bain iro. Podahal ijo pona'oioh orih rih ijo soharusoh tomonara turus-jaham! Amen.

²⁶ Kotuluioh kolunon nguan ijo kodorih, mahka Pohotala mohonau iro numbun kojolik iro ijo hina. Bawin-bawin iro eam hino jolik umba ulunbahkas, kolou ijo lajimoh aang ulun, molekan karasjolik umba sama bawi.

²⁷ Bahkas ka kodorih ka'a, iro eam hino socara lajimoh nguan kohihcoi umba ulunbawi, molekan jolik tohimo sama bahkas. Bahkas nguan gawiu ijo komia-mia toharep sama bahkas, nyiring iro norima balos ijo sotimpal umba gawin iro ijo ja'at rih.

²⁸ Bain tului ulun eam komo porulu ngosono Pohotala, mahka Pohotala mohonau tiruk'ndo monjadi rusak, nyiring iro nguanoh hal-hal ijo iro eam tou nguaioh.

²⁹ Ahtoi iro tuwi umba paring ijo ja'at, ijo eam morong; tuwi umba kokuhuahtoi; komaram tutang nanyam bohiri; tuwi umba kojolik ahkan munu, hokolahi, ngobula, tutang dandam. Iro rajin nohou ulun bohkon;

³⁰ rajin ngonja'at-ja'at aran ulun bohkon; iro bojuhu tutang kurang ajar ijo bosingi umba Pohotala, tutang rajin mongolitar. Iro ahpik ngurah cara-cara bohua ahkan nguan koja'at. Iro molawan ulun oko,

³¹ iro eam kani ngorahti ulun bohkon, iro eam bokehtep tutang eam boperikemanusiaan.

³² Iro kota'an, ijo numbun hukum Pohotala, ulun ijo nguan paringoh rih, harus tonohukum mahtoi. Oluka kodorih, iro nguan ka'a hal-hal orih; tutang malah sotuju hino ulun bohkon nguaioh.