PONGORINAH 9 - BOWOT BOHUA

¹ Turus molehkat kolimo mopos sorunaioh, tutang ahku nohto ihco potion ngonyahtu tahkan langit kongosan tana. Potion rih tononga kuhci lowun popahtoi.

² Mahka potion rih nguap lowun popahtoi rih, turus asop soluka tahkan luwangoh kolou asop tahkan dahpur hajo. Mahtanondou tutang angkasa monjadi pindong bain asep tahkan lobohurih.

³ Turus tahkan luwang asop rih, soluka mokalap-mokalap ijo nosuluh ahkan tana. Mokalap-mokalap rih, tononga kowasa ijo sama kolou ijo tononga ahkan kahtipkala.

⁴ Iro ngohana morusak uru, ata'ai pu'un-pu'un kahju, ata'ai kombulan-kombulan bohkonoh. Iro tihkas tou nyarang ulun-ulun ijo ang lihkouoh eam anai tanda segel tahkan Pohotala.

⁵ Mokalap-mokalap rih, eam tonongaijin munu ulun-ulun dih, molekan tihkas nyiksa iro kotahin limo bulan. Nyilu ijo kotuluioh bain siksa mokalap-mokalap rih sama kolou nyilu ijo kotuluioh bain kahtipkala.

⁶ Kotahin limo bulan rih, ulun-ulun rih bousaha mangat mahtoi, tahpi iro eam tou mahtoi; iro jolik mahtoi, tahpi popahtoi mahcu tahkan iro.

⁷ Tapan mokalap rih sama kolou kuda ijo tahtap ahkan parang. Ang kuhung iro anai ang'co, ijo topahjah kolou ahkur bulou. Mahka iro kolou boun kolunon.

⁸ Balou iro kolou balou ulunbawi, tutang nyihpon iro kolou nyihpon singa.

⁹ Husuk iro tonuhtup umba angihco, ijo mirip baju bosi. Auh ilat iro kolou auh, jombalah hajo korehta-korehta kuda ijo rahat monyarang a'ang kolahi.

¹⁰ Iro anaingina ikuh, tutang ngina butut kolou kala. Tutang ang luwang ikuh iro orihrih anai koba'as, ahkan nyiksa kolunon kotahin limo bulan.

¹¹ Iro anaingina lahca ijo moretah iro, tutang lahca rih, iorih, molehkat ijo botanggung-jawab ngosan lowun popahtoi. Konohawotoh ang a'ang bahasa Ibrani, iorih Abadon; tutang ang a'ang bahasa Yunani konohawot Apolion (ijo rimaioh ‘‘Porusak!’’).

¹² Colahka ijo pahtuk jari nokalou. Uliorih rih, anai duo colahka hino ijo harus lombut.

¹³ Pongohuli molehkat ijo koonom, mopos sorunaioh. Mahka ahku ngonih auh lombut tahkan koohpat pahting mesbeh bulou ijo anai ang husuk Pohotala.

¹⁴ Auh rih nuhtui umba molehkat koonom rih, ‘‘Liwusiourih koohpat molehkat ijo ponohtong ang Sungoi Efrat rih!’’

¹⁵ Koohpat molehkat rih ka toliwusoh. Iro jari tonyodia khusus, ahkan jam, ondou, bulan, toun rih, tutang ahkan munu sepertolu tahkan paring ukup kolunon.

¹⁶ Ahku tonyorihta ijo jumbalahoh kawan-kawan bokuda rih, anairih karoi duo ratus kuhjan.

¹⁷ Tutang a'ang pongorinah rih, ahku nohto kuda-kuda rih, tutang ponunggang-ponunggangoh. Ponunggang-ponunggangoh hapa baju bosi ijo warna bohandang ngonjolak, biru kolou bahtu nilam, tutang hendan sandawa. Kuhung kuda-kuda rih, kolou kuhung singa, tutang ang nyamaioh soluka baho, asop tutang sandawa.

¹⁸ Sepertolu tahkan ukup kolunon tomunu bain tolu porusak orih; iorih baho, asop tutang sondawa ijo soluka tahkan nyaman kuda-kuda rih.

¹⁹ Koba'as kuda-kuda rih anai ang nyamaioh tutang ka'a ang ikuhoh. Ikuh-ikuhoh, kolou lohi hokuhung. Umba ikuhoh rih, kuda-kuda rih monyiksa kolunon.

²⁰ Tahpi putan ukup kolunon ijo eam tomunu bain porusak-porusak rih ka, eam hino nohtah gawin longon iro bongoi. Iro eam tondo nyembah roh-roh ja'at tutang dewa-dewa bulou, perak, tombaga, bahtu tutang kahju ijo eam dahpot nohto ata'ai ngonih, ata'ai ka nyalan.

²¹ Iro eam hino nohtah, gawin-gawin iro ijo ja'at, iorih pomunu, ilmu-ilmu seher, nyundal tutang ponahkou.