PONGORINAH 8 - BOWOT BOHUA

Segel ijo kopitu

¹ Ohkot Anak Tobiri rih musit segel ijo kopitu, soruga monjadi tonih tutang kotahin kurang-labih sotongah jam.

² Turus ahku nohto kopihtu molehkat ijo tombok ang toharep Pohotala, tutang ahkan iro tononga pihtu kobawak sorunai.

³ Ihcobehti molehkat bohkon, ijo ngomin dadupa bulou, lombut tutang tombok ang baun mesbeh. Ahkaioh tononga aro samasino manyan ahkan tomuwur ang do'a-do'a paring ukup Pohotala tutang ahkan tonyorah ang mesbeh bulou ijo anai ang baun pododusan.

⁴ Homboh umba do'a-do'a ukup-ukup Pohotala, asop duhpa ijo rahat bolum rih nyolobowuk nuhkat tahkan longon molehkat ijo tombok ang baun Pohotala rih.

⁵ Pongohuli molehkat rih ngomin dadupa orih, tutang nyuangoh umba baho tahkan mesbeh turus nyahkahoh nokuh ngosan tana. Mahka duhung ka'a ngorutung tutang kilat tutung-hotutung, tutang nyolung tana horuguh.

Karon-sorunai

⁶ Uliorih, pihtu molehkat ijo nambit pihtu sorunai rih botahtap ahkan moposoh.

⁷ Molehkat pahtuk mopos sorunaioh, mahka uhjan es tutang baho sampur daha boduruh hawui pahamoh nokuh ngosan tana. Ihco pertolu tana opah bosaha, kolourih ka'a ihco pertolu tahkan pu'un-pu'un kahju, tutang nyinong uru ijo bohijou.

⁸ Turus molehkat koduo mopos sorunaioh, mahka angihco ijo paham hajo ijo gihtan kolou puruk ijo honjelak-honjelau tonyahkah koluwang tasik. Sepertolu tasik boubah monjadi daha,

⁹ tutang mahtoirih sepertolu karo angbolum ang tasik; kolou rih hino dilap ka'a sepertolu tahkan karon-kapal.

¹⁰ Uliorih molehkat kotolu mopos sorunaioh, mahka ihco kobawak potion ijo hajo, ijo honyala kolou sohowan, nyahtu tahkan langit, turus nopahas sepertolu tahkan sungoi-sungoi tutang kombuhak-kombuhak danum.

¹¹ (Aran potion rih ‘‘Poit’’.) Mahka sepertolu tahkan danum monjadi poit, tutang mahtoi aro ulun kotului ngorih danum ijo jari monjadi poit rih.

¹² Turus molehkat koohpat mopos sorunaioh. Mahka bokiwak sepertolu tahkan mahtanondou, sepertolu tahkan potion-potion, nyiring dilap sepertolu tahkan koba'as koloang iro. Ka'a sepertolu tahkan hondou eam boloang tutang kolourih ka'a sepertolu tahkan ngolumi.

¹³ Turus ahku nohto, mahka ahku ngonih ihcokungan bulung rajawali ijo rahat na'ang isung ang bounondou, na'ah, ‘‘Colahka! Colahka! Colahkarih paring ulun ang tana, amatmira ngonih kotolu molehkat bohkonoh mopos sorunaioh noin!’’