PONGORINAH 7 - BOWOT BOHUA

Solahtus ohpat pulu ohpat kuhjan ulun tahkan uhkup Israel

¹ Uliorihrih, ahku nohto ohpat behti molehkat tombok ang koohpat puhting tana. Iro monahan koohpat mahtan bahiu ang tana, mangat ara anai bahiu ijo nahpi ang isun tana, ata'ai ang tasik, ata'ai ang pu'un-pu'un kahju.

² Turus ahku nohto ihcobehti molehkat ihco bohkon, soluka tahkan sila timur, Io ngomin segel tahkan Pohotala ijo bolum. Umba auh ijo muhing molehkat rih na'ah koohpat molehkat ijo jari dahpot kowasa tahkan Pohotala ahkan morusak tana tutang tasik.

³ Molehkat rih nuhtui, ‘‘Ara houn morusak isun tana tutang tasik, ata'ai ka pu'un-pu'un kahju amat ihkai jaha nonga tanda segel ang likou jihpon-jihpon Pohotalan ihto.’’

⁴ Turus ahku tonyorihta, ijo anai ihco jombalah 144.000 behti ijo tononga tanda segel tahkan Pohotala ang likou iro. Ulun-ulun rih tongomin tahkan koduo balas suku uhtus Israel;

⁵ tahkan nyinong suku 12.000 behti. Yorih tahkan suku: Yahuda, Ruben, Gad,

⁶ Asyer, Naftali, Manasye,

⁷ Simeon, Lewi, Isakhar,

⁸ Zebulon, Yusep, tutang Benyamin.

Tuyuk kolunon ijo holuhcak karoioh

⁹ Uliorih ahku nohto hino, turus gihtan tuyuk kolunon ijo holuhcak karoioh – eam anai ihcobehti ka ijo dahpot ngise jombalahoh. Iro anairih ulun-ulun tahkan nyinong uhtus, suku, nogara tutang basa. Umba hopokajan jubah ijo puhti-puhti, tutang hawui nambit da'an daun korma ang longoi, noharep pododusan tutang noharep Anak Tobiri rih.

¹⁰ Turus umba auh ijo muhing iro bososurak, ‘‘Kosolamatan ihto, polombutoh tahkan Pohotalan ihto, ijo tuot ang ngosan pododusan; tutang tahkan Anak Tobiri rih!’’

¹¹ Paring molehkat tombok ngodiling pododusan, tutang okon-okon hawui koohpat angbolum rih. Molehkat-molehkat rih sohumbok ang baun pododusan turus nyembah Pohotala.

¹² Iro bososurak, ‘‘Amen! Tara ahkan Pohotalan ihto ijo hajo tutang pihtar. Io pahtut tonusuh umba auh-auh torimakasih tutang kohoromatan. Io bokowasa tutang ba'as ahkan turus-jahamoh! Amen.’’

¹³ Anai ihcobehti tahkan okon-okon rih ngisok umba ahku, ‘‘Ulun-ulun ijo hapa jubah puhti tuh, iai iro tutang tahkan umoh iro lombut?’’

¹⁴ ‘‘Ahku eam kota'an, Tuan, Tuan bongon ijo ta'an,’’ mutah'ku. Mahka io nuhtui umba ahku, ‘‘Tuhrih ulun-ulun ijo jari hawui solamat nguha wayah konoporos ijo hebat. Iro jari muhi jubah iro tutang napaoh monjadi puhti umba dahan Anak Tobiri rih.

¹⁵ Orih kotuluioh iro tombok ang toharep pododusan Pohotala, tutang sombayang ahkai-Oh hondou ngolomi ang luwang Lohpou Pohotala. Tutang Io ijo tuot ang ngosan pododusan rih, ahkan lombut umba iro, ahkan ngolindung iro.

¹⁶ Iro eam ahkan hino nanyam kolou ata'ai tohjahbolai; mahtan ondou ata'ai ka'a kopodihoh eam hino ahkan mahpong iro,

¹⁷ kotului Anak Tobiri ijo tuot ang tohun-tohun pododusan rih nyolung sokahtik iro. Io ahkan ngitut iro nokuh tohasak danum ijo nonga pombolum. Tutang Pohotala ahkan ngapit karo danum mahto tahkan mahton iro.’’