PONGORINAH 5 - BOWOT BOHUA

Balun surat tutang Anak Tobiri

¹ Pongohuli, ahku nohto ijo balun surat, ang longon Io ijo tuot ang pododusan rih. Surat rih tuwi umba surat ang sila-ngosilaoh, tutang tonyegeloh umba pihtu segel.

² Turus ahku nohto ihcobehti molehkat ijo mamut na'ah-na'ah umba auh ijo hajo, ‘‘Iai ijo pahtut musit segel-segel tuh, tutang nguap surat tuh?’’

³ Tahpi pios ang soruga kanika ang tana, ata'ai ang pinda tana sinoka eam anai sombang ihcobehti ka'a ijo sanggup nguap surat tuh, tutang nohto koluwangoh.

⁴ Mahka ahku nangih sosoguk tului eam anai ihcobehti ka ijo pahtut nguap surat rih, tutang nopahjah ko luwangoh.

⁵ Turus anai ihcobehti tahkan louk okon-okon rih, nuhtui umba ahku, ‘‘Ara nangih! Nohto! Singa tahkan uhtus Yahuda, lihit Dawid ijo hajo, jari manang. Io sanggup musit pihtu segel tutang nguap surat rih.’’

⁶ Pongohino ahku nohto ihcokungan Anak Tobiri, tombok ang tohun pododusan-pododusan rih, tokodiling bain koohpat angbolum tutang paring okon rih. Anak Tobiri rih gihtanoh kolou jari tonyombolih. Io tepun pihtu tanduk tutang pihtu mahta; yorih pihtu roh tahkan Pohotala, ijo jari tonyuhu nokuh hopus kolunon.

⁷ Pongohuli Anak Tobiri rih miar, tutang ngomin balun surat rih, tahkan longon kotoun ulun ijo tuot ang ngosan pododusan.

⁸ Pondehan Anak Tobiri rih nguan kolourih, sembah-sukuh koohpat angbolum tutang koduo pulu ohpat ohkon rih ang husukoh. Iro nyino-nyinong nambit kocahpi tutang pihkan bulou ijo bosuang manyan, yorih do'a-do'a ukup Pohotala.

⁹ Iro monyanyi ihco lagu ijo bohua: ‘‘Ihko pahtut ngomin surat rih tutang musit segel-segeloh. Tului Ihko jari tomunu, tutang honong popahtoi-Mu, ulun tahkan kokaro lihting, bohasa, nogara tutang uhtus jari tonomoli bain'mu ahkan Pohotala.

¹⁰ Ihko jari ngonjodian iro ihco uhtus khusus imam-imam, mangat iro mohalu Pohotalan ihto tutang moretah ang ngosan tana.’’

¹¹ Pongohuli ahku nohto hino. Ahku ngonih auh molehkat, ijo bo kuhja-kuhjan tutang bo laksa-laksa karoioh. Iro tombok ngodiling pododusan tutang koohpat angbolum, homboh okon-okon rih.

¹² Tutang iro monyanyi umba auh ijo muhing, ‘‘Anak Tobiri ijo jari tonyombolih rih, pahtut ahkan norima kowasa, ponahtou, kopihtaran tutang koba'as; Io pahtut tonohoromat iou, tonohajo, tutang tonara-nara!’’

¹³ Turus ahku ngonih angbolum-angbolum ang langit, ang tana, ang pinda tana, tutang ang luwang tasik – kourusoh angbolum-angbolum rih ang hopus-pinda-langit tuh – monyanyi, ‘‘Io ijo tuot ang ngosan pododusan, tutang Io Anak Tobiri rih, anairih tonara tutang tonohoromat, hawui ponohajo tutang bokowasa ahkan turus-jahamoh!’’

¹⁴ Mahka koohpat angbolum rih numbah, ‘‘Amen!’’ Tutang okon-okon rih ka'a suhkuntu'ut tutang nyembah.